Read Paite Chin EZEKIEL 6 Bible Online

EZEKIEL 6 - Paite Chin bible

EZEKIEL 6

¹TOUPA thu ka kiang ah a hongtung a, ka kiang ah,

²Mihing tapa, Israel tanglam nga inla, a kiang uah thu gen inla, Israel tangte aw, TOUPA Pathian thu ngaikhia un;

³TOUPA Pathian in tangte leh mualte kiang ah leh guamte leh kuamte kiang ah hichi in a chi: Ngai un, kei, keimahmah in na tung uah namsau ka honlik ding a, na munsangte uh ka hihse vek ding hi.

⁴Na maitamte uh a segawp ding a, na ni Pathian limte uh a kitam zan ding: na mi thah luangte uh na milimte uh ma ah ka pai ding.

⁵Israel tate luang a milimte uh ma ah ka koih ding a, na guhte uh na maitam kim uah ka theh zak ding hi.

⁶Na tenna mun tengteng uah khopi a se ding a, mun sangte a segawp ding; na maitamte uh hihsiat leh hihgawp a hih theihna ding un leh na milimte uh a kitapnen a, a man theihna ding in leh na ni Pathian limte uh phukpaih a a om theihna ding un, na nasepte uh aman theihna ding in.

⁷Huan mi thahte na lak uah a puk ding ua, huchi in TOUPA ka hi chih na thei ding uh.

⁸Himahleh gamchih a na dalhzak hun chiang un namte lak ah namsau pelte a om ding ziak un a khen k’on hawi ding.

⁹Huan nalak ua kipan a pawtte’n sal a a pina namte uh lak ah kei a hon theigige ding ua, a angkawmna lungtang uh ka lakmang sakleh a mit uh, a milim lam ua angkawmte ka hihsiat sakdante a thei ding uh: thil gilou a na hih ziak uleh a kihhuai ziak un amau mitmuh ngei in leng kihhuai a kisa ding uh.

¹⁰Huchi in TOUPA ka hi chih a thei ding ua, hiai thil hoihlou a kiang uah ka hih ding a, a mawk in ka chi kei chih a thei ding uh, chi in, a chi hi.

¹¹TOUPA Pathian in hichi in a chi a: Na khut beng in na khe pek inla, Maizen! Israel inkawte kihhuaina gitlouh ziak maw! Namsau in, kial in, hipi in a puk ding uhi.

¹²Gamlapi a om hipi in a si ding ua, a nai a om namsau in a puk ding ua, a val, um a omte kial in a si ding uh; hichibang in ka heh mahmahna a tung uah ka lungdam sak ding hi.

¹³Tangsangte ah, mualvumte ah leh sing hing peuhmah nuai ah leh tosaw bawkpha chih nuai a a milimte uh kiang a gimlim a latna mun ua a maitam kim ua a milimte uh lak a a misi luangte uh a om hun chiang in kei TOUPA ka hi chih a thei ding uh.

¹⁴A tung uah ka khut ka lik ding a, gamdai a kipan a Diblah lam a a tenna mun tengteng uah gam ka hihsia in ka hihgawp vek ding; huchi in kei TOUPA ahi chih a thei ding uh, chi in.