Read Paite Chin EZEKIEL 7 Bible Online

EZEKIEL 7 - Paite Chin bible

EZEKIEL 7

¹TOUPA thu ka kiang ah a hongtung nawn a:

²Nang mihing tapa, TOUPA Pathian in Israel gam kiang ah hichi in a chi ahi: Tawpna, tawpna gam ning li ah a hongtung hi.

³Tu nang ading in tawpna ahi, na tung ah ka hehna k’on tungsak ding a, na omdan bangzel in vai k’on hawmsak ding a, na kihhuaina tengteng na tung ah k’on tun ding hi.

⁴Ka mit in a honmaih kei dia, k’on hehpih sam kei ding hi: na omdan bang in na tung ah kontun zaw ding a, huchi in, TOUPA ka hi chih na thei ding uh.

⁵TOUPA Pathian in hichi in a chi hi: Siatna, siatgawpna mah, ngai dih, a hongtung hi.

⁶Tawpna a hongtung hi, tawpna a hongtung hi, na tung ah a hongthouta, ngai in, a hongtung hi.

⁷Aw gam luahpa, na siatna ding na tung ah a hongtung hi, hun a hongtung hi, ni a naita hi; buaina, kipak a tangtung a kikouna ni hilou.

⁸Tuin ka hehna na tung ah k’on buakzok ding hi, na tung ah ka hehna ka lungdamsak ding a; na omdan bangzel in k’on vaihawmsak ding hi; na kihhuaina tengteng na tung ah kontun ding hi.

⁹Huan ka mit in a honmaih kei dia, k’on hehpih sam kei ding: na omdan bangzel in na tung ah ka hontun ding a, na kihhuaina leng na lak uah a om ding: huchi in kei TOUPA gawt theipa ka hi chih na thei ding uh.

¹⁰Ngai in, a ni, ngai in, a hongtung hi, na siatna ding a pawtta, satna chiang a pakta, kisaktheihna a pakmumta hi.

¹¹Hiamgamna gitlouhna chiang a suakta ahi; kuamahmah a omta kei ding a, a husa uhiam, a hauhsakna uhiam leng: kuamah in a it sam kei ding uh.

¹²Hun a hongtungta, a ni a hongnaita: a leimi kipak kei henla, a khawngmi leng dah kei hen: thangpaihna avek ua tung ah a omta hi.

¹³Khawngmi in, damlai mah leh, a thil khot a munawn kei ding hi; kilakna avek ua tungthu ahi a, kuamah a kik kei ding uh, kuamah a nuntakna thulimlouhna uah a khosa suak sam kei ding uh.

¹⁴Pengkul a mut ua, bangkim a kimanta a; himahleh kidouna ah kuamah a hohkei ua; ka hehna avek ua tung ah a om hi.

¹⁵Inpua ah namsau, asung ah hipi leh kial: gam a om namsau in a si ding ua, khopi a om kial leh hipi in a nekhin ding hi.

¹⁶Himahleh a taikhete, a pawt ding ua, tangte ah phaizang gam vakhu bang in; avek un, lungzuangtak in amau thulimlouhna chiat ah a om ding uhi.

¹⁷Khut tengteng a zaw ding a, khuk tengteng tui bang in a nem ding.

¹⁸Saiip puan a teng ding ua, mulkimna in amau a tuam ding a, mel chiteng ah zumna a lang ding a, a lutang tengteng uh a giaukhin ding hi.

¹⁹A dangkasik uh leh a dangkaengte un TOUPA hehni chiang in a hunkhe theikei ding a, a hinna uh a taisak kei ding a, a gil uh a vahsak sam kei ding a, a thulimlouhna uh pukna a hihkhit tak ziak in.

²⁰A kizepna kilawmna uh a kisaktheihpih ua, a kihhuaina milim un leh a nitna thil un a suaksak zawlel uhi; huaiziak in amau ading in thil kihhuai ding in ka na bawlta hi.

²¹Huan gallak ding in namdang khut ah ka pedia, lei a migiloute kiang ah gallak ding in ka pe ding a, amau a na hihnin ding uhi.

²²Amaute ka nungngatsan ding a, ka mun siang a hihnin ding uh: huan guta a honglut dia, a hihnin ding uh.

²³Khainiang bawl un, gam lah sisan suahhat vaihawmna in a dim a, khopi hiamgamna in ahi.

²⁴Huaiziak in namdang giloupente k’on pilut ding a a innte uh a neihsak ding ua; a hatna otpih uh ka hihtawp ding a, a mun siangte uh hihnit in a om ding hi.

²⁵Lungzinna a hongtung a, muanna a zong ua, a om hetkei hi.

²⁶Siatna tung ah siatsemna, thuthang tung ah thuthang a hongom ding a, zawlnei lak ah kilakna a zong ding ua, himahleh dante siampu lak ah a mang ding a, upate lak ah thudot a omkei ding hi.

²⁷Kumpipa a dah ding a, kumpi tapa lungdonna puansilh in a kivan ding a, vantang khut leng a ling ding, a kiang uah a om danthu un ka hih ding a, a thilhih bangzel un vai ka hawmsak ding; huan TOUPA ka hi chih a theita ding uh, a chi hi.