Read Paite Chin EZEKIEL 8 Bible Online

EZEKIEL 8 - Paite Chin bible

EZEKIEL 8

¹A kum gukna, kha gukna, huai kha ni ngani’n hichi ahi a, ka inn a ka tut a, Judah upate ka ma a a tut lai un TOUPA Pathian khut ka tung ah a hongom hi.

²Huchi in ka en a, ngai in, mi mei bang a kimu a hongom a; a kawng chiang nuailam hidia kilawm mei bang ahi a; a kawng chiang tunglam bel sik hal-ap bang a vaktak ahi.

³Huchi in khut bang a honsawk khia a, ka tal sam in a hon man hi, kha in lei leh van kikal ah a hon domkang a, Pathian kilakna in Jerusalem ah a honpi hi, Jerusalem mallam huang sungnung kongpi khakna kiang a hon tunta a, huai ah mullitna lim tutna mun a om a, huai in a mullit sak hi.

⁴Huan, ngai in, phaizang a ka muh bangmah in huai ah Israel Pathian thupina a om hi.

⁵Huchi in aman ka kiang ah, “Mihing tapa, mallam nga in na mitsuan dihve leh, a chi hi. Huchi in mallam nga in ka mit ka suan a, ngai in, maitam kongpi mallam lutna ah hiai mullitna lim a na om hi.

⁶Aman ka kiang ah, Mihing tapa, a thilhih uh na mu hia? Israel inkawte’n thil kihhuai mahmah, hiai a a hih ngei uh, ka inn siangthou a kipan a gamla a ka paimangna dia a hih uh? Himahleh thildang kihhuai zaw na mu nawn lai ding” a chi hi.

⁷Huan huangsung lutna ah a honpi a; ka en a, bang ah vang a na om hi.

⁸Huchi in ka kiang ah, “Mihing tapa, huai bang hon khuakdih” a chi hi. Ka khuak leh kongkhak a na om hi.

⁹Aman ka kiang ah, “Lut inla, hiai a khelhna kihhuai tak a hih uh en dih” a chi hi.

¹⁰Huchi in ka lut a, ka mu a, ngai in, thil hing chichih limte, gamsa kihhuai limte, Israel inkawte milim tengteng bang ah a kimvel in a na tuang hi.

¹¹Huan a ma uah Israel inkuan, upate lak a mi sawmsagihte a ding ua, a laitak uah Sephan tapa Jaazaniah a ding a, michih in belhbu a tawi chiat ua; huan gimlim khu gim a zam tou ngoingoi hi.

¹²Huchi in ka kiang ah, “Mihing tapa, Israel inkuan upate mial nuai a thilhih na mu hia? Michih in milim dantan a a hih uh? TOUPA’N a hon mu kei a, TOUPA’N gam a paisanta a ka, a chi uhi.

¹³Ka kiang ah,“A thilhih uh kihhuai sem dang leng na mu nawn lai ding” a chilai hi.

¹⁴Huchi in TOUPA inn mallam panglutna kongkhak ah a honpi a, ngai dih, huai ah numeite Tamuz ngai in kap in a tu uhi.

¹⁵Aman ka kiang ah, Aw mihing tapa, hiai na mu hia? Hiai sang a kihhuai zawsem na mu nawnlai ding a chi hi.

¹⁶Huan, TOUPA in um sungnungzaw ah a honpi lut a, ngai in, TOUPA inn siangthou kongkhak ah Inlim leh maitam kikal ah mi sawmnih leh nga TOUPA inn siangthou lam nungngat a, a maite uh suahlam nga in a na om ua, suahlam ah ni a na bia uhi.

¹⁷Huchi in, aman ka kiang ah, “Hiai na mu hia, aw mihing tapa, a thil kihhuai hih uh, hiai a hih uh Judah inkawte ding in thil neutham hia? Gam hiamgamna in a hihdim ua, hon hehsak nawnsem ua, a nak uah sing hiang a bat uhi;

¹⁸Huaiziak in ken leng hehtak in ka hih ding a; ka mit in a maih kei dia, ka hehpih sam kei ding; aw ngaihtak in ka bil ah hong kikou mahle uh ka ngaikhe kei ding” a chi hi.