Read Paite Chin DANIEL 12 Bible Online

DANIEL 12 - Paite Chin bible

DANIEL 12

¹Huai hun chiang in Mikael, heutu thupi na mite tapate vengbittu a hong dingkhe ding hi. Leitung pianchil a kipan tu hun tanpha a om ngei nailou, mangbat hun a hongtung ding hi, huai hun chiang in laibu sung a gelh a om a, muhkhiak a om na mite hutkhiak in a om ding uhi.

²Huan a lak ua mi tampi lei a leivui a ihmute a khanglou ding ua, a khen tangtawn hinna tang ding in, a khen zumna leh tangtawn simmohna tang ding in.

³A pilte vansin vakna bang in a vak ding ua; mi tampi diktatna lam a heite tangtawn tangtawn in aksite bang in a tang ding uhi.

⁴Himahleh nang, Aw Daniel, huntawp tan ading in thute khakkhum bikbek inla, laibu bilh in; mi tampi a vialtai ding ua, theihna a pung ding.”

⁵Huailai in kei, Daniel in ka en a, ngai in, midang nih, luigei hiai lam pang ah khat, luigei langlam pang ah khat ading uhi.

⁶Huan khat in puanmalngat a silh a, lui tuite tung a ompa kiang ah, “Hiai thillamdangte tawpna ding bangchi a sawt ahi ding?” a chi hi.

⁷Puanmalngat silh a, luituite tung a dingpa’n vanlam a a khut taklam leh a khut veilam liktou in, amah tangtawn a hingpa min a kichiam in hun khat, hunte leh hun kimkhat ahi ding a chih kazata hi; misiangthoute thilhihtheihna a suknen dimdem khit chiang un, hiai thil tengteng zoh ahi ding hi, chi in.

⁸Huai ka za a, himahleh ka theisiam kei hi. Ken, “Aw ka TOUPA, hiai thilte tawpna bang ahi ding?” ka chi hi.

⁹Aman, “Pai in, Daniel: thute khakkhum bikbek ahita ua, hun tawp matan a bilh bikbek ahita hi a chi hi.

¹⁰Mi tampi a kihihsiangthou ding ua, a ngou ding ua, a kibawlhoih ding uh; himahleh giloute a gilou sem ding ua; giloute lak a kuamah in a theisiam kei ding uh; himahleh a pilte’n a theisiam ding uh.

¹¹Huchi in haltum thillat gige lakmang a om a, hihgawptu kihhuai tunkhiak a hongom ding hun a kipan, ni sang khat za nih leh sawmkua a om ding hi.

¹²Ni sang khat za thum leh sawmthum leh nga ngak a, huai a hong a paite’n nuam a sa uhi.

¹³Himahleh a tawp matan nang zaw pai in; na khawl ding a, nang adia piak na mun ah nite beina ah na goutan sang ding in na thounawn ding hi.