Read Paite Chin DANIEL 5 Bible Online

DANIEL 5 - Paite Chin bible

DANIEL 5

¹Belshazzar kumpipa’n a toupate lak a mi sang khat ading in Ankuang thupitak a bawl a, sang khatte ma ah uain a dawn hi.

²Belshazzar in uain a cheplai in, a pa Nebukadnezzar in Jerusalem a om biakin a kipan a a lak dangkaeng leh dangka tuium belsuante kumpipa leh a toupate, a zite leh a meite’n huaite a a dawn theihna ding un honla ding in thu a pia hi;.

³Huchi in Jerusalem a om Pathian inn, biakin a kipan a lakkhiak dangkaeng tuium belsuante a hon lata ua; kumpipa leh a toupate, a zite leh a meite’n, huaite in a dawn uhi.

⁴Uain a dawn ua, dangkaeng, dangka, dalsik, sing, leh suang pathiante a phat uhi.

⁵Huai dakmah in mihing khutzungte a hong langkhia a, kumpipa Inpi bang pek tung, khawnvak koihna toh etdenna tak ah a lai a gelhta hi; kumpipa’n laigelhtu khut bangtan hiam a muta hi.

⁶Huailai in kumpipa mel a hong lamdang a, a ngaihtuahnate’n amah a patau sakta hi; a khut a khe a kipzou takei a, a khukte a kisat tuah nomnom uhi.

⁷Bummite, Kaldaimite leh aisanmite honpi un chi in nakpitak in kumpipa a kikou hi. Kumpipa’n thu a gen a, Babulon mipilte kiang ah, “Kuapeuh in hiai laigelh sim a, a hilhchetna hon ensak, puansandup silhsak ahi ding a; a ngawng kimvel in dangkaeng khainiang a awk ding a; gamsung ah vaihawmmi thumna ahi ding” a chi hi.

⁸Huchi in kumpipa mipilte tengteng a honglut ua: himahleh laigelh a sim theikei ua, a hilhchetna leng kumpipa a theisak theikei uhi.

⁹Huchi in kumpipa Belshazzar a patau mahmah a; amah ah a mel a hong lamdang a; a khawnbawlte a lungzing uhi.

¹⁰Huchi in kumpipa leh khawnbawlte thu ziak in kumpinu Ankuangluina inn sung ah a honglut hi; kumpinu’n thu a gen a, “Aw kumpipa, tangtawn in hing in,” na ngaihtuahnate’n hon patausak kei henla, na mel leng lamdang kei heh:

¹¹Na gamsung a mi khat, amah a pathian siangthoute kha omna a om a; na pa damlai in vakna leh theihtheihna leh pilna, pathiante pilna bang, amah ah muh in a om; kumpipa Nebukadnezzar, kumpipa, na pa’n, amah mitkhialdawi tawite leh bummite, Kaldaimite leh aisanmite heutu in a bawl hi.

¹²Lungsim hoihpen, theihna, theihtheihna, mangte hilhchetna, thugen haksa etsakna, ginlelhna hihvengna kumpipa’n Belteshazzar min a sakpa, huai Daniel mah ah muh in a om hi. Tuin Daniel kisam sak henla, aman hilhchetna ensak hen” a chi hi.

¹³Huan Daniel kumpipa ma ah a honpi ua, Kumpipa’n thu a gen a Daniel kiang ah, “Daniel, ka pa’n Judah gam a kipan Judah salmat hon pilut na hi hia?

¹⁴Nang ah pathian kha a om a, vakna leh theihtheihna leh pilna hoihpen nang a muh in a om chih na tanchin ka za hi.

¹⁵Huchi in mipilte, bummite, ka ma ah a hon pilut ua, hiai laigelh sim a, a hilhchetna ka kiang a theisak ding in; himahleh huai thil hilhchetna a ensak theikei uhi.

¹⁶Himahleh hilhchetnate na bawl thei a, ginlelhnate na bawlhoih thei chih na tanchin ka za: tuin laigelh na sim theih a, a hilhchetna n’on hilh theih leh puansandup k’on silhsak ding a; na ngawng kimvel in dangkaeng khi na awk ding a; gamsung ah vaihawmmi thumna na hi ding hi” a chi hi.

¹⁷Huchi in Daniel in a dawng a kumpipa ma ah, “Na thilpiakte nangmah kiang ah hizaw henla, na kipahmante midang kiang ah pezaw in; ahi a, kumpipa kiang ah laigelh ka sim ding a, a hilhchetna amah ka theisak ding hi.

¹⁸Aw nang kumpipa, Tungnungpen Pathian in na pa Nebukadnezzar gam leh thupina, letna leh vaihawmna a honpia hi:

¹⁹Huai amah a piak letna ziak in mi tengteng, namte, paute a ma ah a ling ua a lau uhi: a utut a that a, a utut a hinghawi hi; a utut a kaithou a, a utut a sawnniam hi.

²⁰Himahleh a lungtang a hong kisaktheih a, kiuangsaktak a gamta a a lungsim hihkhauh a a omlai in, a mangtutphah a kipan suan in a om a, amah a kipan a thupina a lakheta hi.

²¹Huan mite tapate a kipan a hawlkhiak in a om a; huchi in a lungtang gamsate a bang a bawl in a om a; bawngtalte bang a loupa a vak in a om a, a pumpi van daitui in a kawt a; Tungnungpen Pathian in mihing gam ah vai a hawm a, a ututte a tung ah ading khesak chih a hontheih matan.

²²Huan nang a tapa, Aw Belshazzar, hiai tengteng na theih in leng na lungtang na niamkhiak kei hi.

²³Himahleh van Toupa dem in na kihihsang a; amau na ma ah Toupa inn a tuium belsuante na lasak a; nang leh na toupate, na zite leh na meite’n, huaite in uain na dawn uhi; dangka leh dangkaeng, dal, sik, sing leh suang pathiante, mu theilou, za theilou, thei theiloute bia in na phat a; Pathian a khut a na hatna a omna leh na lampite tengteng neipa na thupibawl kei hi.

²⁴Huchi in amah a kipan huai khut banghiam tan sawl in a hongom a, hiai laigelh gelh in a omta hi.

²⁵Huan gelh a om laithu hiai ahi” MENE, MENE, TEKEL, UPHARSIN.

²⁶Huai hilhchetna hiai ahi: MENE: Pathian in na gam a simta, a beisakta hi;

²⁷TEKEL; bukna a buk in na om a, na chingzou kei hi;

²⁸PERES; na gam hawm in a om a, Mid mite leh Persia mite kiang ah piak ahita hi” a chi hi.

²⁹Huchi in Belshazzar in thu a pia a, dangkaeng khainiang a ngawng kimvel in a oksak ua; amah tung ah thu a phuang ua, gamsung a vaihawmmi a thumna hi ding in.

³⁰Huai zan in Kaldai kumpipa Belshazzar thah in a om hi.

³¹Mid mi Darias, kum sawmguk leh nih a upa in gam a tangta hi.