Read Paite Chin DANIEL 9 Bible Online

DANIEL 9 - Paite Chin bible

DANIEL 9

¹Media mi, Ahasueras tapa Darias, Kaldaite gam a kumpipa ding a bawl, vaihawm kum khatna in.

²A vaihawm kum khatna kum in kei, Daniel in laibute a kipan Jerusalem hihsiatna in kum sawmsagih daih ding ahi chih zawlnei Jeremiah kiang a TOUPA thu hongtung tanchin a kipan in ka theisiam hi.

³Huchi in TOUPA Pathian lam ah ka mel ka koih kip a, thumna leh thilngette, anngawlna leh saiip puansilh in, vutlak a tu in Toupa Pathian kiang ah ka ngen ngutngut hi.

⁴Huan TOUPA ka Pathian kiang ah ka thum a, thupha ka tawi hi, “Aw TOUPA, Pathian thupi leh mulkimhuai, Nang hon it a na thupiakte zuite tung a thukhun leh chitna vom;

⁵Ka khialta ua, hoihlou tak in ka gamtang ua, gilou tak in ka na hihta ua, ka hel ua, na thuseh leh na vaihawmte ka na lehngat santa uhi.

⁶Ka kumpipate uh, ka vaihawmtute uleh ka pipute uh leh gam a mi tengteng kiang a na min a thugen, na sikha zawlneite thu leng ka na ngaikhe sam kei uhi.

⁷“Aw TOUPA, diktatna nang a ahi a, himahleh tuni bang in, kou a bel zahlakna leh buaina ahi; Judah a mite, Jerusalem a tengte, Israel tengteng, a nai leh gamla a omte, na tung a a tatlekna ziak un amaute gam tengteng ah delhzak in ka om uhi.

⁸Aw TOUPA, ka kumpipate, ka vaihawmte uh, ka pipute uh leh kou hon suangtute’n na tung a dikloutak a a khelh ziak un zahlakna in honkhuh hi.

⁹Amah tung ah na helta mahle ung chitnate leh ngaihdamte TOUPA ka Pathian uh a ahi;

¹⁰TOUPA ka Pathian uh aw leh a dante a om ding a a sikha zawlneite zang a ka ma ua hon na koihsakte ka na mangta kei uhi.

¹¹“Ahi, Israel tengteng in na dan a tatlek san ua, a hilou lam ah a pial ua, na aw a manlouhna ding un; huaiziak in na tung a ka hihkhelhte ziak in Mosi, Pathian sikha dansung a gelh a om kichiamna hamsia ka tung ah sunbuak in a om hi.

¹²Huan koute demna leh ka tung ua vaihawmmite demna thute leh ka tung ua siatna thupitak in a hihkip khinta hi; Jerusalem tung a kihih bang van nuai pumpi ah lah a kihih ngei ngalkei hi.

¹³Mosi dan sung a gelh a hih bang in, hiai siatna tengteng ka tung uah a hongtung hi; huchipi in leng ka thulimlouhnate uh kiheisan a, na thutak a theihkhen theihna ka neih theihna ding un TOUPA ka Pathian uh deihsakna ka ngen naikei lai uhi.

¹⁴Huaiziak in TOUPA ka Pathian uh a thilhihte tengteng ah a diktat gige man in, TOUPA’N thil hoihlou en gige in, Ka tung uah a hon tungsakta hi; hinapi in kou lah a aw ka na mangta kei uhi.

¹⁵“Huan tuin, Aw Toupa ka Pathian uh, khut hattak a na mite Aigupta gam a kipan pikhepa leh tuni bang a minthanna kimuhpa, tuni bang in ka khialta ua, gilou tak in ka na hihta uhi.

¹⁶Aw TOUPA, k’on ngen hi, na diktatna tengteng ziak in, na hehna leh thangpaihna, na khopi Jerusalem leh na mual siangthou a kipan kihei mangsakin; ka khelhnate uh ziak leh ka pipute uh thulimlouhna ziak in, Jerusalem leh na mite lah ka kim ka vel ua omte tengteng simmawh a hong hita ngal uhi.

¹⁷Huaiziak in tuin, Aw ka Pathian uh, na sikha thumna leh a thilngette ngaikhia inla, TOUPA ziak in, a segawpsa na mun siangthoupen tung ah na mel vaksak in.

¹⁸Aw ka Pathian, na bil hondoh inla, za in; na mitte hak inla, na min a kilou na khopi siatgawpnate en in; ka diktatna ziak un na ma a hiai ka thilngetnate uh lan ka hi ngal kei ua, na chitna thupite ziak in ahizaw hi.

¹⁹Aw Toupa, za in, Aw TOUPA ngaidam in, Aw Toupa, ngaikhia inla hih in; hal ken; nangmah ziak mahmah in, Aw ka Pathian, na khopi leh na mite nang min pute ahi uhi! a chi hi.

²⁰Huchi a thu ka gen a, ka thum a, ka khelhna leh ka mi Israel khelhna thupha ka tawi a, TOUPA ka Pathian ma a ka Pathian mual siangthou ading a thilngetna ka piaklai in;

²¹Ahi, thumna a thu ka gen lai in, Pasal Gabriel, a chil a mengmuhna a ka muh pa, kintak a leng dia bawl a om in, nitaklam thillat hun ding in a hong khoih hi.

²²Huan a hon thuhilh a, a hon houpih a, “Aw Daniel, theihsiamna a siam mahmah a honbawl ding in tuin ka hong paikhia hi, a chi hi.

²³Na thilngetna kipat phet in a dawnna piak ahi; nang hilh ding a hongpai ka hi, nakpitak a it lah na hi ngal a; huaiziak in thu ngaihtuah inla, mengmuhte theisiam in:

²⁴“Na mite leh na khopi siangthou ading in tatlekna hihbeina ding, khelhnate tawpsakna ding leh thulimlouhna adia kilemna bawlna ding, tangtawn diktatna laklutna ding leh mengmuhte leh genkholhnate khakkhum bikbekna ding leh a siangthoupen thaunilhna ding in na tung ah nipikal sawmsagih hunseh leh thupiak ahi.

²⁵Huaiziak in thei inla, theikak in, Jerusalem tung ding nawn ding leh lam dia thupiak a paikhiak a kipan sathau nilh a om pa, vaihawm tan in, nipikal sagih ahi ding; huan nipikal sawmguk leh nih sung in hun haksa mahmahte a kongzing leh bukna guam toh a kilam nawn ding hi.

²⁶Nipikal sawmguk leh nih khit chiang in sathau nilh a om pa satkhiak in a om ding a, bangmah a neikei ding hi; huchi in a hongom ding vaihawmpa leh mite’n khopi leh Mun Siangthou pen a hihse ding ua; huntawpna tuikhang bang in a hongtung ding hi, a tawp dong in kidouna leh siatgawpnate a om ding a guankholhsa ahita hi.

²⁷Huchi in nipikal khat ading in tampi toh thukhun khauh tak a bawl ding a; nipikal kimkhat ading in kithoihna leh thillat a tawpsak ding hi; munsiangthou ah mulkimhuai leh kihhuai a tungkhe ding a; amah tung a tung dia guankholhsa huntawp leh thangpaihna a tung ah sunbuak a hihtan a om ding hi” a chi hi.