Read Paite Chin HOSIA 1 Bible Online

HOSIA 1 - Paite Chin bible

HOSIA 1

¹Judah kumpipate, Uzzia, Jotham, Ahaz, Hezekiah leh Israel kumpipa, Joas tapa Jeroboam damlai a, Beeri tapa Hosia kiang ah hongtung TOUPA thu ahi.

²Hosia zang a TOUPA’N thu a gen masak lai in, Hosia kiang ah TOUPA’N, kuan inla, kizuakmi na zi ding in pi in kizuakmi tate: gam in kizuakna nakpitak in a hihta hi. TOUPA a kipan paikhia in, a chi hi.

³Huchi in a kuan a Diblaim tanu Gomer a pi a; a hong gai a, tapa a neihsak hi.

⁴Huan TOUPA’N a kiang ah, “A min Jezreel sa in; sawtlou nung chiang a, Jehu inkaw tung a Jezreel sisan phuba la ding ka hi, Israel inkaw lalgam ka tawpsak ding hi.

⁵Huai ni chiang in hichi a honghi ding a, Jezreel guam ah Israel thalpeu ka kitansak ding” a chi hi.

⁶Huan a gai nawn a, tanu a nei hi. TOUPA’N a kiang ah, “A min ding in Lo-ruhama sa in: amaute bangchi mah a ngaidam ding in, Israel inkaw tung ah chitna ka neih nawnlouh ding ziak in” a chi hi.

⁷Himahleh Judah inkaw tung ah chitna ka nei ding a, TOUPA a Pathian un amaute ka hondam ding a, thalpeu, namsau, kidouna, sakol, sakol tungtuangmite in amau ka hondam kei ding hi, a chi hi.

⁸Huan Lo-ruhama nawitui a ngawlhsak in, a gai nawn a, tapa a nei hi.

⁹Pathian in “A min ding in Lo-ammi sa in: ka mite na hihlouh ua, na Pathian uh ka hihlouh ding ziak in” a chi hi.

¹⁰Hinapi in Israel suante zah tuipi piaunel, tehtheihlouh, simtheih louh bang ahi ding; a kiang ua, “Ka mite na hi kei uh” chih a a omna mun uah, hichi ahi ding a, “Pathian hing tate na hi uh,” a kiang ua chih ahi ding hi.

¹¹Huchi in Judah suante leh Israel suante kaihkhawm ahi ding ua, amau ading in lu khat a kiguan ding ua, gam a kipan a kuantou ding; Jezreel ni thupi ding ahi.