Read Paite Chin HOSIA 10 Bible Online

HOSIA 10 - Paite Chin bible

HOSIA 10

¹Israel in gahtam a suahzel, grepgui pha ahi; a gahtam mahmah dungzui in a maitamte a pungsak; a gam hoihna dungzui in milim kilawm taktak a bawl uh.

²A lungtang uh a kikhen a; huchi in mawhtansak in a om ding uh; a maitamte uh a sat ding a, a khuamte uh a lok ding hi.

³Kumpipa i neikei uh; TOUPA i kihta kei ua; kumpipa leng, ei ading in bang a hihthei dia, tuin a chi ding uhi.

⁴Thukhunte bawlna a zuau a kichiam in, thu bangloute a gen ua; huaiziak in loulehsa a namtul bang in vaihawm na a poukhe ding hi.

⁵Beth-aven bawngnoute ziak in Samaria a tengteng a lau ding ua; huai mite’n siampu a tung a kipakte a sun ding uhi, huai bawngnou ziak in thupina amah a kipan a paimangtak ziak in.

⁶Kumpipa Jareb kiang a thilpiak ding a Assuria lam a puak ahilai ding a, Ephraim in zahlakna a mu dia, Israel amah pilna ah a zahlak ding hi.

⁷Samaria bel tui tung a tuiphuan bang in a kumpipa satkhiak ahi.

⁸Aven mun sangte leng, Israel khelhna hihsiat ahi ding, ling leh loulingnei a maitam tung uah a hong kahtou ding a; mualte kiang ah, “honkhuh un; tangte kiang ah hon pukkhum un,” a chi ding uhi.

⁹Aw Israel, Gibeah nite a kipan na khialta a; huai ah ading ua; Gibeah thulimlouhna tate tung a kidouna in amaute a phak louhna ding in.

¹⁰Ka hun chiang in, amaute ka sawi ding; a tatlekna uh thuah nih ziak a taihilh a hih hun chiang un, amau dou ding in mite a kikhawm ding uh.

¹¹Huan Ephraim bawngla chilsiamsa, buh leh bal chilkhiak ut ahi; himahleh a ngawng kilawm tung ah hakkol ka bat dia, Ephraim tung ah tungtuangmi ka koih ding; Judah in lei a let dia, Jakob in a sai a nawn ding.

¹²Diktatna ah kituh unla, chitna bangzel in at un, na leileh lei uh satkham un; a hongpai a na tung ua diktatna a hon zuksak tan, TOUPA zon hun ahi.

¹³Gitlouhna lei na let ua, thulimlouhna na lata uh; zuaugenna gah na neta ua; na lampi ah, na mihatte ah na muangta uhi.

¹⁴Huaiziak in na mite lak ah buaina a hongpawt ding a, na kulhte uh loh in a om ding hi, kidou lai a Salman in Betharbel a luh bang in; nu a tate toh paihnen in a om uhi.

¹⁵Huchibang mah in na gitlouh mahmah ziak in Bethel in na tung ah a hih ding; nuaisiah in Israel kumpipa satkhiak siang in a omta ding hi.