Read Paite Chin HOSIA 11 Bible Online

HOSIA 11 - Paite Chin bible

HOSIA 11

¹Israel naupang a hihlai in, amah ka it a, Aigupta a kipan ka tapa ka sam khia hi.

²Amaute a sap chiang un, amau a kipan a pai gamla sem ua, Baal kiang ah a kithoih ua, lim bawltawmte kiang ah gimlim a hal uhi.

³Hinapiin Ephraim pai ka kisinsak a; ka ban in amau ka pom a; himahleh amau ka hihdam chih a theikei uhi.

⁴Mihing khaute leh itna gui in amau ka kai a, amau adin a muk tung uleh a muk nuai ua kibat hakkol ka lakkhiaksak a, a ma uah an ka lui hi.

⁵Aigupta gam ah a kiknawn kei ding a; himahleh Assuria mi a kumpipa ahi ding, kiknawn a nial ziak un.

⁶Huan, a khopite tung ah namsau lik in a om dia, a siktawnte a hul in, a negai ding, a thuhilhte uh ngei ziak in.

⁷Huchi in ka mite’n kei a kipan nungtawn a tum chiltel uh; amah tung sang a ompa sam mahle uh, kuamah in amah a liansak kei ding uh.

⁸Ephraim, bangchi’n k’on tawpsan dia? Israel, bangchi’n k’on tankhe dia? Admah bang in bangchi’n k’on bawl dia? Zeboim bang in bangchi’n k’on koih dia? Ka sung ah ka lungtang a kilumlet a, ka lainatnate toh a kuang khawm hi.

⁹Ka heh mahmahna ka suak khesak kei ding a, Ephraim hihse ding in ka kihei kei ding; mihing hilou in, Pathian ka hi a, nang lak a Misiangthou, khopi sung ah ka lut kei ding hi.

¹⁰Amau TOUPA deihdan in a om ding ua; Amah humpinelkai bang in a humham ding a, Amah humham ding a, huchi in tumlam a kipan tate ling kawm in a hongpai ding uhi.

¹¹Aigupta a kipan a vasa bang in ling kawm in a hongpai ding ua, Assuria gam a kipan a vakhu bang in; a innte ua teng ding in amau ka bawl ding, TOUPA’N a chi hi.

¹²Ephraim in zuauthu in kei a hon umsuak a, Israel inkuan in khemna in; himahleh Judah in Pathian toh vai a hawmlaia, misiangthoute toh a ginom lai hi.