Read Paite Chin HOSIA 13 Bible Online

HOSIA 13 - Paite Chin bible

HOSIA 13

¹Ephraim in thu a genlai in, midangte ling uh a; Israel ah amah leh amah a kiliansak; himahleh Baal milim bia in, a sita hi.

²Huchi in a khial semsem ua, a dangka un milim sun a bawl ua, amau theihtheihna dungzui a milimte mahmah avek ua khutsiammite nasep; A kithoihmite’n bawngnoute tawp uhen chi in, huaite a tungthu a gen uhi.

³Huaiziak in zingsang meipi, daitui hulmang pah bang, phual a kipan a pingpei lak a buhsi bang a mut leng leh, meikhu suahna a kipan a meikhu bang ahi ding uhi.

⁴Hinapiin kei Aigupta gam a kipan TOUPA na Pathian ka hi; kei loungal pathian na theikei ding, kei chih louh hondampa a omkei hi.

⁵Gamdai ah k’on theita a, khawkhalna gam ah.

⁶A loupa hing nou mitmet mun uh bang in, a maute hihdim in a om ua; hihdim in a om ua, huan a lungtang uh hihlet in a om; huaiziak in kei a hon mangngilhta uhi.

⁷Huaiziak in amau ading in humpinelkai bang ka hi a; gialbem bang in lampi kiang ah ka tang ding hi;

⁸Vompi a noute sun bang in amaute ka maituah ding a, a lungtang ua kipan a lap uh ka kaikhe ding; huai ah humpinelkai bang in amaute ka nebei ding; gamsa bang in amaute ka botnen ding hi.

⁹Aw Israel, na panpihpa dou a, kei n’on dou, na siatna ahi.

¹⁰Na khopi tengteng a nang hon hondam ding na kumpipa tua kaw om ahia? Kumpipa leh hetute honpi un, na chihnate uh, na vaihawmmite uh koi ah?

¹¹Hehngoh in kumpipa ka honpia a, hehngoh in amah ka lamangta hi.

¹²Ephraim thulimlouhna koihhoih in a om a, a khelhna chiamtehna a koih in a om hi.

¹³Numei nauvei lungkhamna a tung ah a hongtung ding; tapa pillou suang ahi a, naupian hun tungta a, a mun a a omom ding ahita ngal kei a.

¹⁴Han thilhihtheihna a kipan amau ka tan ding a; sihna a kipan amau ka tan ding; Aw sihna, na gu koi ah a om ua? Aw han, na hihsiatna koi ah a om a? Ka mit a kipan kisikna sel ahi ding hi.

¹⁵A unaute lak ah gahpha mahleh, suahlam huih a hong kuan dia, gamdai a kipan TOUPA huih a hongnung dia, a tuinak a hong keu dia, a luikhuk a kangvek ding; bel kipahhuai tengteng a a gou loh in a om ding hi.

¹⁶Samaria in a mawh a paw ding; a Pathian tung ah a hel a; namsau in a puk ding ua; a naungekte uh paihgawp in a om ding uh, nau toh kithuah a numeite uh dawt pailet in a om ding uhi.