Read Paite Chin HOSIA 14 Bible Online

HOSIA 14 - Paite Chin bible

HOSIA 14

¹Aw Israel, TOUPA na Pathian kiang ah kiknawn in, na thulimlouhna ah na pukta hi.

²Thupha tawi inla, TOUPA kiang ah kiknawn in; “Thulimlouhna tengteng lamang inla, a hoihna na sang in; huchi in ka mukte uh thillat bawngtalte bang in ka pe ding uh,” a kiang ah chi in.

³Assuria in a hondam kei dia; sakolte tung ah i tuang kei ding uhi; i khut a bawlte kiang ah, pathiante na hi uh, i chi nawn kei ding hi; nang ah pabeite’n chitna a mu uhi.

⁴A ginomlouhna uh ka hihdam ding a, amaute a thawn in ka it ding, kei a kipan in ka hehna lah a kihei mangta hi.

⁵Israel lak ah daitui bang ka hi ding, lili bang in a paklun dia, Lebanon sing bang in zungkip a ka khesuk ding hi.

⁶A hiangte a bawkpha dia, a kilawmna olive sing bang ahi dia, a gim Lebanon bang ahi ding hi

⁷A lim nuai a tengte a hong kik nawn ding ua, buh leh bal bang in a hong hingthak ding ua, grepgui bang in a paklun ding; a gim Lebanon uain bang ahi ding.

⁸Milimte bangding ka chi nawnta dia? Ephraim in a chi ding hi. Ka dawngkhin a, amah ka limsak ding, meilah sing hing bang ka hi a; kei a kipan na gah muh ahi.

⁹Kua ahia pil a, hiai thilte theithei ding? Pilvang a amaute thei ding? TOUPA lampite a dik a, huaite ah mi diktat a om ding a; himahleh talekte huai ah a puk ding uhi.