Read Paite Chin HOSIA 2 Bible Online

HOSIA 2 - Paite Chin bible

HOSIA 2

¹Na unaute uh, Ammi kiang ah gen un; na sanggamnute uh, Ruhama kiang ah.

²Na nu uh genpih un, genpih un; ka zi ahi kei a, a pasal ka hi sam kei hi; a maitang a kipan a kizuaknate leh a nawi kikal a kipan a angkawmnate koihmang hen;

³Huchilou in zaw vuaktang in ka omsak in, a pianni bang in ka koih in, gamdai bang in ka bawl in, gamkeu bang in ka koih in, dangtakna in amah ka that kha ding hi;

⁴Ahi, a tate tung ah chitna ka neikei ding a; kizuak tate a hih ding ziak un.

⁵A nu uh kizuak a hih ziak in; amaute painu’n zumhuaitak in ahihta hi; “Ka tanghou leh ka tui, ka samul leh ka pat, ka sathau leh ka dawn ding honpia, ka itte ka delh ding” a chih ziak in.

⁶Huaiziak in, ngai in, ling in a lampi ka dal dia, amah dal ding in dai ka kai dia, huchi in a lampite a mu kei ding hi.

⁷Huchi in a itte a nungzuih ding a, himahleh a pha kei ding; amau a zong ding a, himahleh a mu kei ding; “Ka pai dia ka pasal masapen kiang ah ka kik ding; huaichiangin tu sang in kei ding in a hoihzaw ding” a chi ding hi.

⁸A buh leh bal, uain, sathau ka piak leh, a dangka leh a dangkaeng, Baal adia a zat uh, ka hih pungsak chih a theihlouh ziak un.

⁹Huaiziak in buh leh bal a lak hun in ka la nawn ding, ka uain a hun in, a vuaktanna khuhna ding ka samul leh ka pat ka botkhe ding hi.

¹⁰Huchi in tu’n amah itte muh in a zahlakna ka mukhe ding a, ka khut a kipan kuamah in amah a tankhe kei ding hi.

¹¹A vualnopna tengteng ka tawpsak ding a, a ankuangluite, a kha thak, a khawlni, leh a khawmpi kulmut tengteng;

¹²Hiaite ka kipahman ka itte’n kei a honpiak uh ahi, a chihna, a grepguite leh a theipi kungte ka suse vek ding huchi in gammang in ka bawl ding a, gamsate’n huaite a ne ding uhi.

¹³Baalim ni, huaite a gimlim halnite amah tung ah ka kan ding a; a bilbahte leh a suangmantamte a kizem a, a it a zuih a, kei a hon mangngilh ziak in, TOUPA’N a chi.

¹⁴Huaiziak in, ngai in, amah ka khim ding a, gamdai ah ka tonpih ding a, a kiang ah lungmuanhuai tak in thu ka gen ding hi.

¹⁵Huan huai a kipan in a grephuante amah ka pe ding a, lametna kongkhak ding in Akor guam; huan a tuailai nite bang in, Aigupta gam a kipan a a hongpawt khiak lai ni bang in huai ah aman la a sa ding hi.

¹⁶Huai ni chiang in hichi ahi ding hi, Ishi n’on chita dia; Baali n’on chi nawnta kei ding, TOUPA’N a chi.

¹⁷A kam a kipan Baalim minte ka lamangta ding a, a min uh genkhiak a hih nawn taklouh ding ziak un.

¹⁸Huai ni chiang in, gamsate, van vasate, lei a bokvak a pai thilte toh amau ading in thukhun ka bawl ding; thalpeu leh namsau leh kidouna gam a kipan ka hihmangta ding a, galmuangtak in amau ka kualsak ding hi.

¹⁹Huan kei ading in tangtawn in nang k’on khamta ding; ahi, diktatna leh vaihawmna leh, itna siamna leh chitna in kei a ding in nang k’on kham ding hi.

²⁰Ginomna in kei ading in k’on kham ding a; TOUPA na thei ding.

²¹Huai ni chiang in hichi a honghi ding a, ka dawng ding, vante ka dawng ding a, amau lei a dawng ding uh, TOUPA’N a chi.

²²Lei in buh leh bal leh, uain leh, sathau in a dawng ding a, Amau Jezreel a dawng ding uhi.

²³Huan lei ah kei din amah ka tuh ding a; chitna tanglounu tung ah chitna ka musak ding; ka mite hiloute kiang ah, “Ka mite na hi uh” ka chi ding a; amau, “Ka Pathian na hi” a honchi ding uhi.