Read Paite Chin HOSIA 4 Bible Online

HOSIA 4 - Paite Chin bible

HOSIA 4

¹Nou Israel suante, TOUPA thu za un: “Gamsung a thutak a omlouh a, Pathian theihna a omlouh ziak in, gam a tengte TOUPA’N a kinakpih hi.

²Kichiam leh ginna hihsiat, thah, guktak, leh angkawm hih chih ngallouh bangmah a omkei hi; a ki tungkhia ua, sisan a kisuah zialzial uhi.

³Huaiziak in, gam a dah ding a, asung a tengte leh gamsate leh tungleng vasate a bah ding ua, ahi, tuipi ngasate tengteng a mangthang ding uhi” a chi hi.

⁴“Hinapiin kuamah in sual kei henla, kuamah in sal kei heh; na mite siampute kisualpihte bang ahi uh” chih Toupa thupawt ahi.

⁵Huan sun in na kisui ding a, nang toh zawlnei leng zan in a kisui ding uhi; huchi in na nu ka hihse ding hi.

⁶Ka mite theihna taksap ziak in hihsiat in a om ua; theihna na deih louh ziak in, ken leng, kei dia siampu na hih louhna ding in k’on sam kei ding; na Pathian dan na mangngilhta chih thei in, ken leng na suante ka mangngilh ding hi.

⁷“A hongpun bangzel un, ka tung ah thil a hihkhial uhi; a thupina uh zumna in ka khek ding hi.

⁸Ka mite khelhna kivakna’n a nei ua, a thulimlouhna uah a lungtang uh a koih kip uhi.

⁹Huan mipite hi in siampute a kibang ua, a tatdante uh ziak in amau ka gawt ding, a thilhihte uah kipahman ka pe ding hi.

¹⁰A ne ding ua, a kham kei ding uh; a kizuak ding ua, a pung kei ding uh; TOUPA lam a pilvang dia a awlmoh louh ziak un.

¹¹TOUPA’N “Kizuakna leh uain leh uain thak in theihtheihna a lamang hi! a chi hi.

¹²Ka mite’n a milimte uh thu a dong ua, a kiang uah a aisan in thu a genkhia hi; angkawmna kha in amaute takhial sak in, a Pathian uh nuai a kipan angkawm in a omta uhi.

¹³Mualvumte tung ah a kithoih ua, tangte tung leh, tosaw singte leh a hiang singte leh nainei singte nuai ah, huai nuailim a hoih ziak in, gimlim a hal uh; huaiziak in na tanute un kizuakna a hih ua, na moute un kizuakna a hih ua; na moute un angkawmna a hih uhi.

¹⁴Na tanute un a kizuak chiang un ka gawt kei ding a, na jite un ang a kawm chiang leng un ka gawt kei ding a; pasalte kizuakna a paizak ua, tempula kizuakte kiang ah a kithoih uh; ‘huchi in theihna neilou mite nuaisiah in a om ding uhi.’

¹⁵“Nang Israel in, kizuakna hihmah leteh, Judah ahihleh mawh kei hen, Gilgal ah hongpai kei unla, Bethaven ah leng hohtou sam kei un, TOUPA a hing bang in chi in kichiam kei un.

¹⁶Bawngla genhak bang in, Israel genhak tak in a kibawla; mun za a belamnou bang in tuin TOUPA’N amaute a vak ding hi.

¹⁷Ephraim milimte toh a kizom a; a omom in om hen.

¹⁸A dawnkham nung un leng kizuak in a om lailai ua, thupina sang in zumhuaina a it tuntun uhi.

¹⁹Huih in a kha in amaute mutmang ding a, a kithoihna ziak un a zum ding uhi.