Read Paite Chin HOSIA 5 Bible Online

HOSIA 5 - Paite Chin bible

HOSIA 5

¹Nou siampute aw, hiai za un, nou Israel inkawte, ngaikhia un, kumpipa inkawte aw, bildoh un, vaihawmna na tung ua hongtung ding hi; Mizpah a thang leh, Tabor tung a lenthang na hikhinta uhi.

²Mithahna lam ah thukpi in a kihelta ua; himahleh amaute tengteng thuhilhpa ka hi.

³Ephraim ka thei a, Israel ka lak ah sel in a omkei; Ephraim aw, tuin, kizuak in na omta a, Israel a buahta hi.

⁴A thilbawlte un a Pathian kiang lam a ngasak kei ding hi; asung uah kizuakna kha a om a, TOUPA a theikei uhi.

⁵Israel kisaktheihna in a ma ah a theihpih a; huaiziak in Israel leh Ephraim a thulimlouhna uah a kisui ding uhi.

⁶TOUPA zong ding in a bawnghonte uh leh a belamhonte utoh a kuan ding ua; himahleh amah a mu kei ding uh; amau a kipan in a ki hemkheta hi.

⁷TOUPA tung ah lepchiahtak in a gamta ua; ta lamdangte a nei ua; tuin a loute uh toh kha thak in amau a negai ding hi.

⁸Gibeah ah na pengkulbinei uh mut inla, Ramah ah pengkul; Bethaven ah, nanung ah; Aw Benjamin, lauthawngna gingsak un.

⁹Salhna ni’n Ephraim a segawp ding a; a hongom ngeingei ding Israel namte lak ah ka theisakta hi.

¹⁰Judah heutute gamgi chiamtehna lamangte hi uh; tuibang in ka hehna a tung uah ka sungbaw ding hi.

¹¹Epraim nuaisiah in a om, vaihawmna ah delhkhumin a om hi, thupiak zui a om a lungkim ziak in.

¹²Huaiziak in Ephraim ading in puannget leh Judah inkawte ading in siatna ka hi ding hi.

¹³Ephraim in a chinatna a muh a, Judah in a liamna a muh chiang in, huaichiang in Ephraim bel Assuria kiang ah a hohta a kumpipa Jareb kiang ah a sawlta hi; himahleh nang a hon hihdam theikei a, na liamna leng a hihdam thei sam kei hi.

¹⁴Ephraim ading a humpinelkai bang leh, Judah inkawte adia humpinelkai tuailai bang ka hih ziak in; kei, kei mahmah in, ka botnen dia ka paimang ding; ka pawmang ding a; honkhe ding kuamah a omkei ding hi.

¹⁵A tatkhelhna uh thupha a tawi ua, ka mel a zon masiah uh, ka pai dia ka mun ah ka kiknawn ding; a gimthuakna uah chihtaktak in kei a honzong ding uhi.