Read Paite Chin HOSIA 7 Bible Online

HOSIA 7 - Paite Chin bible

HOSIA 7

¹Israel ka sukdam chiang in, huai chiang in Ephraim thulimlouhna muhkhiak ahi, Samaria gitlouhna toh; zuauthei ahi ngal ua: gutate’n inn a luh ua, a pawlam ah suamhatte’n mite a suam uhi.

²A gitlouhna tengteng uh ka theigige chih a lungtangte un a ngaihtuah kei uh: tuin amau thilhihte ngei in amaute a hihbuai hi; tuate ka mai ma ah a om uhi.

³A gitlouhna un a kumpipa uh a kipaksak ua, a zuau un a heutute uh.

⁴Avek un angkawmte ahi uh; thuk sa gige, tanghou kangmi in tangbuang mekman silngou in a zelh suah masiah meisawn kullou thuk bang ahi.

⁵I kumpipa uh ankuangluini in heutute uain sa in amau leh amau a ki china sak ua; simmohhatte toh a khut a zankhia uhi.

⁶A lungtang uh thuk khuk sa bang ahi a, mite zuau in a buk ua, zankhua in a hehna uh a am a zingsang in meikuang bang in a kuangkhia hi.

⁷Thuk bang in a sa vek ua, a vaihawmmite uh a negai uh; a kumpipa tengteng uh a pukta uh: kei lam a hong patau kuamah a omkei uhi.

⁸Ephraim, mite lak ah a kidiaha; lumleh louh tanghou beu ahi.

⁹Mikhualte’n a hatna a gai ua, aman a theikei: ahi, a lutung koi lailai hiam a samkang a omlam a theikei hi.

¹⁰Huan Israel kisaktheihna a mel ah a lang hi: TOUPA a Pathian lam ah a kihei kei ua, hiai tengteng ziak in, Amah a zong tuankei uhi.

¹¹Ephraim vakhu hai bang, theihsiamna bei ahi; Aigupta lam ah a sam ua, Assuria kiang ah a pai uhi.

¹²A pai chiang un, a tung uah len ka zak ding; van a vasate bang in amau ka kaikhe suk ding: ka sawi ding a, a khawmpi un a zaksa bang un.

¹³A tung uh a gik hi; kei a kipan a taimang ziak un, a tung uah siatna a tung hi, keimah tung ah a talekta ua; a maute tankhe ut mah leng, ka siatna ding in zuau a gengen uhi.

¹⁴A lungtang utoh ka kiang ah a kap kei ua, a lupna tung uah a kap zawsop uh: buh leh bal leh uain zong in a kikaikhawm ua, ka tung ah a hel uhi.

¹⁵A khut uh sinsakin hatsakta mah leng, ka siatna ding in a ngaihtuah uhi.

¹⁶A kik ua, himahleh tungsanga ompa kiang ah ahi kei; thalpeu gilou bang ahi uh: a lei hehna ziak in namsau in a heutute uh a puk ding uh: Aigupta gam ah hiai nuihsana a omna uh ahi ding hi.