Read Paite Chin HOSIA 8 Bible Online

HOSIA 8 - Paite Chin bible

HOSIA 8

¹Na kam ah pengkul bulh in, muvanlai bang in TOUPA inkawte dou ding in a hong hi: ka thukhun tung a a tatlek ua, ka dan a a tatlek ziak un.

²Ka Pathian, kou Israel in k’on thei uh, chi in, kei lam ah a kikou khe ding uhi.

³Israel in a hoih a nawlkhin a: melma in amah a delh ding hi.

⁴Kumpipate a tungkhia ua, himahleh kei thu in bel a hi kei hi; heutute a bawl ua, ken ka theikei: satkhiak a a om theihna ding un a dangka uleh a dangkaeng un milimte a bawl uhi.

⁵Aw Samaria, na bawngnou milim in hon satkheta; amaute tung ah ka hehna a sou: hoihna a tunma un bang tan hi ding ahia?

⁶Bawngnou milim Israel a kipan in ahi a: nasemmite’n a bawlkhiak uh ahi, huai Pathian ahi kei, ahi, Samaria bawngnou milim a kitam zan ding hi.

⁷Huih a tuh ua pingpei a at ua, buh leh bal ding lai a neikei; a vui in an a suah kei hi; huchi ahihleh suah hen, mikhualte’n a nawmvalh khin ding uhi.

⁸Israel nawmvalh in a om, kipahna omlouhna bel bang in tuin namte lak ah a om uhi.

⁹Gam sabiltung tangom bang in, Assuria zuan in a paitou uhi: Ephraim in itmite a guaita hi.

¹⁰Ahi, namte lak a kizuak mahle uh, amaute ka kaikhawm ding; heutute kumpipa dangte puakgik ziak in a lungkham ding uhi.

¹¹Khial ding a Ephraim in maitam a punsak ziak in, amah adin maitamte khelhna ding ahi.

¹²Amah ading in ka danthuseh sang sawm in gelh mah leng, thil lamdang bang a sim in a om uhi.

¹³Ka thillatte kithoihna thu ahihleh, sa in a kithoih ua a ne uh; himahleh TOUPA’N huaite a sang kei hi; tuin a gitnatlouhna uh a theigige ding a, a khelhnate un a veh ding; Aigupta ah a kik ding uhi.

¹⁴Israel in amah bawlpa a mangngilh a, munsangte a lamta hi: himahleh a khopite tung ah mei ka sawl ding a, huai a kulhpite a kangtum ding uhi.