Read Paite Chin HOSIA 9 Bible Online

HOSIA 9 - Paite Chin bible

HOSIA 9

¹Aw Israel, midangte bang in nuamsa in kipak ken; Pathian a kipan in kizuak in na omkhinta ngal a, phual tung teng ah kizuakman na itta hi.

²Phual leh uain suknate’n amau a vak kei ding a, uain thak in amah a zuausan ding hi.

³TOUPA gam ah a tengkei ding ua; himahleh Ephraim Aigupta ah a kik ding, Assuria ah an sianglou a ne ding uhi.

⁴TOUPA kiang ah uain thillatte a sungkhe kei ding ua, amah ading in lungkimhuai ahi sam kei ding uh: a kithoihnate uh amau ading in sisunmite tanghou bang ahi ding; huai ne tengteng hihnit in a om ding uh; a tanghou uh a gilkialna uh ading ahi; TOUPA inn sung ah a hongpai kei ding hi.

⁵Kikhawmpi chik leh TOUPA Ankuanglui ni’n bang na hih ding ua?

⁶Ngai un, Assuria ah a pai ding uh; Aigupta in amau a khawm ding, Memphis in amau a vui ding. Dangka a bawl a gou manphate uh lahou in a khuh ding; a puaninte uah lingte a om ding hi.

⁷Vehna nite a hongtung, thukna nite a hongtung; Israel in a thei ding hi zawlnei mihai a seh ahi a, khamite leng mihai ahi, na ginatlouhna a tam mahmah ziak in leh muhdahna a thupi ziak in.

⁸Ephraim galvilmi Pathian toh a om hi; zawlnei tungtang ahihleh a lampi tengteng ah thangkampa thang a om a, muhdahna Pathian inn ah a om hi.

⁹Gibeah nite a bang in, nakpi’n amau leh amau a kihihsia ua: a thulimlouhna uh a theigige ding a, a khelhnate uh a gawt ding hi.

¹⁰Gamdai a grepte bang in Israel ka mu a; theipi kung a hun masapen lai a min masa bang in na pipute uh ka muta hi. Himahleh Baal-peor ah a hong ua, thil zumhuai lam ah a kipumpiak ua, a thil deihte uh bang in amaute kihhuai a hong hita uhi.

¹¹Ephraim ahihleh, vasa bang in a thupina uh a leng mang ding a: naupianna, naupaina leh nau neihna himhim a omkei ding hi.

¹²A tate uh khoi lian mahle uh, amau ka sunsak ding a, piching a hawi in a omkei ding hi: ahi, amaute ka nutsiat hun chiang in a tung uah a tunggikna a om ding hi:

¹³Ephraim, Tura ka muhsa bang in, mun nuam a phuh in a om: himahleh Ephraim in a tate tualthatmi kiang ah a hon pikhe ding hi.

¹⁴Aw TOUPA amau pia in; bang na pedia? Sul naupai theilou leh nawi zu neilou pia in.

¹⁵A gitlouhna tengteng uh Gilgal ah a om a; huai ah amau ka mudahta hi; a thilhihte uh gitlouh ziak in ka inn a kipan amau ka delhkhe ding: Ka it nawn kei ding a; a heutute tengteng uh mihel ahi uhi.

¹⁶Ephraim sat in a om, a zung uh a keu, gah a suang kei ding uh; tate suang mahle uh, a sulgah it uh ka that ding hi.

¹⁷Ka Pathian in amau a paimang ding a, amah a ngaihkhiak louh ziak uh; huchi in namte lak ah vakvai in a om ding uhi.