Read Paite Chin JOEL 2 Bible Online

JOEL 2 - Paite Chin bible

JOEL 2

¹Zion ah pengkul mut unla ka tang siangthou ah kigalginna phuang un; hiai gamsung a mi tengteng ling uhen; TOUPA ni hongtung ding, a naita hi.

²Mialna leh khonimna ni, meikai ni leh mialsah ni, tangte tung a phalvak tangkhia bang a mipi thupitak leh hattak, huchibang om ngeinailou, tu nung a suan tampi tan a leng om nawn ngei samlou ding a hongtung ding hi.

³A maban uh mei in a kang siang a; a nunglam uh meikuang in a hul a; a ma uah gam lah Eden huan bang ahi, a nunglam uh gamdai gamkeu ahi a; ahi, bangmah in huai a pelkei uh.

⁴A latdan uh sakol latdan bang ahi; sakol tuangmi bang in a tai uhi.

⁵Kidouna kangtalai ging bang in tang tung ah a kilek suausuau ua, buhpawl kang kuang luahluah leh kidouna a mipi hattak mansa a bang uhi.

⁶Amaute mu mipite a lau ua; a melte uh a hong mualkhin uhi.

⁷Mi hattak bang in a tai ua; kidou mi bang in bang ah a kah ua, amau zawn chiat ah a pai ua, a kivolhdan uh a hihbuai kei uhi.

⁸A kiphu kha tuankei ua; amau lampi ah a paichiat ua; galvante a nawk paisuak ua, a pialzak kei uhi.

⁹Khopi tung ah a tawm ua; kulh tung ah a tai ua; insungte ah a kaltou ua; guta bang in tohlette ah a lut uhi.

¹⁰A ma uah lei a ling a; vante a ling hi; ni leh kha a mial a, aksite’n a vak uh a sel uhi;

¹¹Huan TOUPA’N a sepaih honte ma ah a aw a suah a; a giahbukte lah a thupi nga la; a thu tangtungsakpa a hat a, TOUPA ni a thupi in a mulkimhuai mahmah ngal a, kuan a thuak thei dia?

¹²TOUPA’N, Huchipi in leng tuin na lungtang tengteng ua anngawl in, kap in, lungkham in keilam hong nga le uchin.

¹³Na puan uh hilou in na lungtang uh botkek unla TOUPA na Pathian lam nga un; amah hehpihthei tak leh lainatna a dim, lungnel leh chitna hau, thil hoihlou a kipan kiknawn sek ahi, a chi hi.

¹⁴TOUPA na Pathian un lungsim kihei in tangbuang leh dawn ding thillat ah vualzawlna nutsiat in a omkei ding chih kuan a thei a?

¹⁵Zion ah pengkul mut unla, anngawl hun tang siangthou un, kikhoppi taksuaktak bawl un.

¹⁶Mipi kaikhawm unla, kikhawm te hihsiangthou unla, putekte, naupangte, nawitui nelaite kaikhawm unla; mouneite a dantan a kipan in hongpawt uhenla, mou leng a dantan sunggil a kipan in hongpawt hen.

¹⁷Siampu, TOUPA nna semmite inlim leh maitam kikal ah kap uhenla; TOUPA, na mite hawi inla, na goutante gensiat a om a namte’n a tung ua vai a hawmsak ding un pe ken; A Pathian uh koi a om ahita a, chi in a mipite lak ah bangdia chi ding ahi ua? chi uhen.

¹⁸TOUPA’N a gam thikthuse khop in a deihthoh a, a mite a hehpih hi,

¹⁹TOUPA’N a mite kiang ah, Ngai unla, na kiang uah buhte, uainte, sathaute k’on tungsak ding a, huaite in na tai ding ua; namte lak ah gensiat in k’on omsak nawn hetkei ding.

²⁰Himahleh na kiang ua kipan in mallam sepaihhon ka suanmang ding a, gamkeu leh sia ah ka paisak ding, amasa pawl suahlam tuipi ah, a nanung pawl tumlam tuipi ah; a hong uih khe ding a, namsetak in a hong nam ding, thil thupitak a hih ziak in, chi in a dawng hi.

²¹Aw gam, lau ken, nuam in kipak in; TOUPA’N thil thupite a hihta hi.

²²Gante aw, lau kei un, gamdai loupa mun a hongsel a, sing a hong gah a, theipi kung leh grepgui a hong selpha ding hi.

²³Nou, Zion tate aw, kipak un, TOUPA na Pathian uah nuam un; nou a ding in vuah a zusak a, kha khatna a vuah masa leh vuah nanung a hunlel a honpe ding hi.

²⁴Pialkhangte buhin a dim ding a, uain leh sathau belte a dimlet ding uhi.

²⁵Na lak ua ka sepaih hon tampi ka sawl, khaukhup te, singnget khaute, khauhonte, leh khaupete’n a nekkhit kumte nou k’on dinnawn ding hi.

²⁶Tampi na ne ding ua, na tai ding ua, nou lamdangtak a hon ngaihtuah sekpa TOUPA na Pathian min na phat ding uh; ka mite a zahlak ngeikei uhi.

²⁷Huan Israelte lak ah ka om chih leh TOUPA na Pathian uh ka hi, kuamah dang a omkei uh chih na thei ding uh; ka mite a zahlak ngei nawn kei ding uhi.

²⁸Huai nungchiang in hichi a honghi ding a, mi tengteng tung ah ka kha ka sung ding; huchi in na tapate, na tanute un ka thu a gen ding ua, na putekte un mang a man ding ua, na tangvalte un kilaknate a mu ding uhi;

²⁹Huai ni chiang in sikhapate, sikhanute tung ah leng ka kha ka sung baw ding hi.

³⁰Van leh lei ah thillamdangte, sisan, mei leh meikhu ding ka musak ding hi.

³¹Ni mial a suak ding a, kha sisan a suak ding hi, TOUPA ni thupitak leh mulkimhuai a hongtun ma in.

³²Huan, hichi ahi ding, kuapeuh TOUPA min lou peuhmah humbit in a om ding hi; TOUPA’N a gen bang in taikhete Zion tang ah leh Jerusalem khua ah a om ding uhi.