Read Paite Chin JOEL 3 Bible Online

JOEL 3 - Paite Chin bible

JOEL 3

¹Ngai dih ua, huai nite leh buai hun chiang in, Judah leh Jerusalem ah nam tengteng ka kaikhawm ding hi.

²Amaute Jehosaphat phaizang ah ka hon kaikhawm ding a; ka gam namte lak ah a hawmzak ua, ka mite a thehzak ziak un, Israel a ding in amaute ka lang ding;

³Ka min a ding in ai a san ua; kizuak man ding in pasal naupang a pia ua, uain a dawn theihna ding un, a man ding in numei naupang a zuak uhi.

⁴Ahi, aw Tura leh Sidon leh Philistia gam tengteng aw, kei ading in bang na hi ua leh? Na thuk ding ua hia? N’on thuk uleh, hattak in, kintak in na thukna uh na lutung mahmah uah k’on thuksam ding hi.

⁵Ka dangkasik leh a dangkaeng na la ua, ka thilhoihtak deihhuaite na biakin sung uah na tawilut uhi;

⁶Judah tate leh Jerusalem tate leng a gamgi ua kipan a gamlapi ah na suanmang theihna ding un, Grik tapate kiang ah na zuakta uhi;

⁷Ngai dih ua, na zuakna mun ua kipan in tokthou in ka pawtsak ding a, na thukna uh na lutung mahmah uah ka thuk sam ding hi;

⁸Na tapate, na tanute uh Judah tate khut ah ka zuak ding, amau gamlapi ah Sheba mite kiang ah a zuak ding uhi, TOUPA’N a chita hi,

⁹Hiai nam lak ah phuang unla; kidouna kisa unla; mihat mahmahte tokthou unla; kidoumi tengteng te hong nai uhenla, hong paitou uhen.

¹⁰Na leilehna mukzumte uh namsau ding in sek unla na thei kung kuaika temtate uh teipi din sek un; mihatlou in leng ka hat chi hen.

¹¹A kim a nam tengteng aw, kin unla, hongpai unla ki kaikhawm un: Aw TOUPA, huai ah na mihat mahmahte paisuk sak in.

¹²Namte kitokthou uhenla Jehosaphat phaizang ah hong paitou uhen: huai ah a kim a nam tengteng tung a vaihawm ding in ka tu ding hi.

¹³Na kawite uh suah un, buhlak a hun hi: hongpai unla, childen un; grep sukna khuk a dim a, bel a dimlet a; a khelhna uh a thupi hi.

¹⁴Mipi tampite, thukhenna guam a mipi tampite! Thupukna phaizang ah, TOUPA ni a naita hi!

¹⁵Ni leh kha hihmial in om ding ua, aksite’n a vakna uh a sel ding uhi.

¹⁶Toupa Zion tang a kipan in a humham ding a, Jerusalem khua a kipan in a aw a suah ding hi; Lei leh van a ling ding ua; himahleh TOUPA a mite ading in kihumbitna leh Israel suante ading in insang ahi ding hi.

¹⁷Huchi in TOUPA na Pathian uh ka tang siangthou Zion a teng ka hi chih na thei ding uh; huchi in, Jerusalem khua a siangthou ding a, mikhual kuamah a paisuak nawn hetkei ding hi.

¹⁸Huai ni chiang in hichi ahi ding a, tang sangte’n uain khum a kai sak ding ua, tangte nawitui in a luang ding a; TOUPA inn a kipan in tuikhuk a hong kikhohkhe ding a, Shittim luiguam a nawmsak ding hi.

¹⁹Judah tate tung ah engbawl tak a a gam uah sisan a suah ziak un, Aigupta a segawp ding a, Edom gam gamdai gamkeu a suak ding hi.

²⁰Judah gam tangtawn in luah in a om gige ding a, Jerusalem khua suan a kipan suanzel tan in luah in a om ding.

²¹Huan a sisan suahna uh ka sawpsiang louh ka sawpsiang ding a, TOUPA Zion ah a teng gige hi.