Read Paite Chin AMOS 1 Bible Online

AMOS 1 - Paite Chin bible

AMOS 1

¹Judah kumpipa Uzzia vaihawm lai leh Israel kumpipa Joas tapa Jeroboam vaihawm lai a zinling ma kum nih in, Tekoa mun ganhon vengmite lak a mi Amos thu Israel tungtang a muh:

²Huan aman, “Toupa Zion tang a kipan a humham ding a, Jerusalem a kipan in a aw a suah ding a; belam vengmite gantatna munte a lungkham ding ua, Karmel tangvum a vuai ding,” a chi hi.

³TOUPA’N hichi in a chi: “Damaska khaw tatlekna thumte ziak in ahi, lite ziak in, a gawtna ka daisak kei ding; Gilead gam buhgawina sikte a a gawi ziak un;

⁴Himahleh Hazael inn ah mei ka sawl ding a, Benhadad kumpipa innte a kang khin ding hi.

⁵Huan Damaska khaw kongkhak sik ka hihtan ding a, Aven guam a kipan a luahmite leh Eden inn a kipan kumpipa chiang tawipa ka mangsak ding a; Suria gam mite Kir gam ah sal in a om ding uh,” TOUPA’N a chi hi.

⁶TOUPA’N hichi in a chi: “Gaza khaw tatlekna thumte ziak in, ahi, lite ziak in, a gawtna ka hihtawp kei ding; Edom kiang a piak ding in mi tengteng sal a a pi ziak un:

⁷Himahleh Gaza kulh tung ah mei ka sawl ding a, a kumpipa innte a kang khin ding hi;

⁸Huan Ashdod khua a kipan a luahmi leh Askelon kua a kipan kumpipa chiang tawimi ka hihmang ding a; huan, Ekron khaw tung ah ka khut ka lik ding a, Philistia mi omlaite a mang ding uh,” TOUPA Pathian in a chi hi.

⁹TOUPA’N hichi in a chi, “Tura khaw tatlekna thumte ziak in, ahi, lite ziak in, a gawtna ka daisak kei ding; Edom kiang a mi tengteng a piak ua, unau tung a a thukhun a theihgige louh ziak un:

¹⁰Himahleh Tura khaw kulhtungah mei ka sawl ding a, a kumpipa innte a kang khin ding” a chi hi.

¹¹TOUPA’N hichi in a chi: Edomtatlekna thumte ziak in, ahi, lite ziak in, gawtna ka daisak kei ding; a unau namsau in a delh a, a hehpihna tengteng a paimang a, a hehna in a botkek gige a, tangtawn a a hehna a vom nilouh ziak in:

¹²Himahleh Teman tung ah mei ka sawl ding a, Bozrah khaw kumpipa innte a kang khin ding, a chi hi.

¹³TOUPA’N hichi in a chi: “Ammon tate tatlekna thumte ziak in ahi, lite ziak in a gawtna ka daisak kei ding; a gam uh a zatsak theihna ding un, Gilead khaw numei naupaite a kuihkek ziak un:

¹⁴Himahleh Rabah khaw kulh tung ah mei ka mut kuang ding a, huan, kidouna ni a kikou toh, pingpei ni a huihpi toh, a kumpipa innte a kangkhin ding:

¹⁵A kumpipa uh sal in a man ding ua, a miliante toh kiton in” TOUPA’N a chi.