Read Paite Chin AMOS 2 Bible Online

AMOS 2 - Paite Chin bible

AMOS 2

¹TOUPA’N hichi in a chi: “Moab tatlekna thumte ziak in, ahi, lite ziak in, a gawtna ka daisak kei ding; Edom kumpipa guhte sunu bang zen a a hal ziak in;

²Himahleh Moab tung ah mei ka sawl ding a, Kerioth khaw kumpipa guhte a kangkhin ding; huan Moab buaina leh kikou leh pengkul ging in a si ding hi.

³Huai lak a kipan vaihawmmi ka hihmang ding a, a miliante tengteng, amah toh ka that ding” TOUPA’N a chi.

⁴TOUPA’N hichi in a chi: “Judah tatlekna thumte ziak in, ahi, lite ziak in, a gawtna ka daisak kei ding; TOUPA dan a deihkei ua, a thupiakte a zuikei uh, a pate uh chih sek a zuaugente un amau a pimang ziak in:

⁵Himahleh Judah tung ah mei ka sawl ding a, Jerusalem khaw kumpipa innte a kangkhin ding” chi in.

⁶TOUPA’N hichi in a chi: “Israel tatlekna thumte ziak in, ahi, lite ziak in, a gawtna ka daisak kei ding; dangkasik a mi diktat a zuak uleh khedap but khat a mi tasam a zuak ziak un:

⁷Gentheite leivui bang a sikden ut tuntun a, mizawngte vaihawmna a kaikawi uhi: huan, mi khat leh a pa nungak khat kiang ah ka min hihnin ding in a hoh zel uhi:

⁸Maitam tengteng kiang chin a khamna puanphah tung ah a lumzel ua, a Pathian uh inn a mi a liausak mante un uain a dawn zel uh” chi in.

⁹“Himahleh amau ma ah Amorte, Sidar bang a sang leh tosaw bang a khauh leng ka hihmang a; tunglam a kipan a gah leh nuailam a kipan a zung leng ka hihmang hi.

¹⁰Huan Amorte gam nei ding in Aigupta gam a kipan in k’on pikhia a, gamdai ah kum sawmli sung ka honpi hi.

¹¹Huan zawlnei hi ding in na tapate uh lak a mi leh Nazarit te hi ding in na tangvalte uh lak a mi ka bawl a, Aw Israel tate aw, huchibang in ahi ka hia? TOUPA’N a chi.

¹²Himahleh Nazarit mite kiang ah uain dawn ding na pia ua, zawlneite kiang ah, thu genkei un, chi in thu na pia uhi.

¹³Ngai dih ua, kangtalai a buhphal sawnsip bang in, na mun uah k’on sawn ding hi.

¹⁴Huan mi taihatte hatna a mang ding a, mi hat in tha a suah thei sam kei ding hi; mi hat mahmah leng a kihumbit theikei ding hi.

¹⁵Thalpeu zangmi leng ading thei sam kei ding; paihat theimi leng a kihumbit theikei ding, sakol tungtuang mi leng a kihumbit theikei ding hi:

¹⁶Huai ni chiang in mi thilhihthei mahmah lak a mi hangsan leng vuaktang in a taimang ding uh” TOUPA’N a chi.