Read Paite Chin AMOS 3 Bible Online

AMOS 3 - Paite Chin bible

AMOS 3

¹Aw, Israel tate aw, Aigupta gam a kipan a k’on pikhiak inkawte aw, TOUPA’N hichibang a nou a hondemna thu ngaikhia un,

²“Noute kia khovel a inkuan tengteng a ka theih na hi ua: huaiziak in na thulimlouhna tengteng uah k’on gawt ding” a chi hi.

³A sawm kei un mi nih a paikhawm ding ua hia?

⁴Humpinelkai in gammang a sa a matlai louh ngal in, a humham ngei ahia? Humpinelkai lunlai in bangmah a matkei leh a kawhawm sung a kipan a humham ngei ahia?

⁵Amah ding a tah a omkei leh, vasa leitung a thang ah a awk thei ahia? Thang pen bangmah awk lou in lei a kipan in a kisai dia hia?

⁶Khopi ah mi launa lou ah pengkul a mut ding ua hia? TOUPA hih louh in khopi ah hoihlouhna a hongom dia hia?

⁷Diktak in TOUPA Pathian in a nasemmi, a zawlneite kiang ah a thuguk hilhlou in bangmah ahihkei ding hi.

⁸Humpinelkai a humham a, kua a laulou ding? TOUPA Pathian in thu a gen a, kuan a genlou thei ding?

⁹Ashdod khaw kumpipa innte leh Aigupta gam kumpipa innte ah gen unla, “Samaria tang tungte ah kikhawm unla, huai a buaina liantak omte leh huai lak a simmohna omte en un” chi in.

¹⁰“A kumpipa uh innte a, hiamgamna leh kisuamna koihkhawm mite’n lah hihdik dan a siam ngal kei ua” TOUPA’N a chi.

¹¹Huaiziak in TOUPA Pathian in hichi in a chi: Gam kimvel in melma a omlai ding a: na hatna na kiang a kipan a lakhe ding a, na kumpipa innte a hihse ding uhi.

¹²TOUPA’N hichi in a chi; “Belampu in humpinelkai kam a kipan a khe nih hiam, bil them hiam, a honkhia bang in, huchibang in Samaria khua a teng Israelte lupna ning leh lupna maimom puanphan lukham them toh hutkhiak in om ding uhi.

¹³Ngai unla, Jakob inkawte tung ah theisak un.”

¹⁴“Israel tatleknate amah tung ah ka gawt leh, huai ni chiang in, Bethel khua a maitamte leng ka gawt ngal dia; maitam kite a tansum ding ua, lei ah a ke ding uhi” sepaihte Pathian, TOUPA Pathian in a chi.

¹⁵“Huan phalbi leh nipi inn ka satse ding a; saiha innte a mangthang ding a, inn thupite’n tawpna a nei ding uh” TOUPA’N a chi hi.