Read Paite Chin AMOS 4 Bible Online

AMOS 4 - Paite Chin bible

AMOS 4

¹Nou Bashan bawngpite, Samaria tangtung a om a, genthei simmoha, tasamte nuaisiaha, a toupate uh kiang a, “Honla unla i dawn ding uh,” chite aw, hiai thu za un:

²TOUPA Pathian in amah siangthouna lou in a kichiam a; “Ngai dih ua, sikkuaika a nou a hon lakmang a, na lak ua omsun ngakuai a a hon lakmang ni a hongtung ding hi.

³Huan awngvang ah na paisuak ding ua, michih tangtak in a pai ding uh; Harmon mun ah nou leh nou na kipai ding uh” TOUPA’N a chi.

⁴“Bethel ah hong unla, talek un; Gilgal ah hong unla, tatlekna pungsak un; huan, na kithoihnate uh zingsang teng in honla unla, na sawm ua khatte uh ni khat hal zel in honla un;

⁵Huan silngou pang kipahthu gen kithoihna lan unla, amau deihdan a lante hilh unla, phuang un; Aw Israel tate aw, hiai lah na deih ngal ua” TOUPA Pathian in a chi.

⁶“Huan ken leng na khopi tengteng uah hasianna leh na mun tengteng uah taksapna k’on pia a; huchi in leng ka kiang ah na hongkik kei uh” TOUPA’N a chi.

⁷“Buhlak hun ding kha thum a hihlai in na tung ua vuahzu ding leng ka len a; khopi khat tung a ka zuksak in, khopi dang tung ah ka zusak kei hi; mun khat tung ah ka zusak sek a, a zuk louhna mun a keu hi.

⁸Huchi in khopi nih leh thum ah tui dawn ding zong in a taikhawm ua, a taikei uh: huchi in leng ka kiang ah na hongkik kei uh” TOUPA’N a chi.

⁹“Keuna leh apna in k’on gawt a; na huante uh, na grephuante uh, na theipi kungte uh, na olive singkungte uh singnget lungin a nekhin vekta hi: huchi in leng ka kiang ah na hongkik kei uh” TOUPA’N a chi.

¹⁰“Aigupta gam bang in na lak uah huihpi ka sawl a; namsau in na tangvalte uh ka that a, na sakolte uh ka pimang a; na giahphualte uh gim namsia na nak ua nam khop in k’on omsak a: huchi in leng ka kiang ah na hong kikkei uh” TOUPA’N a chi.

¹¹“Sodom leh Gomorrah khua Pathian in a chipsak lai bang in, na lak uah mi khenkhat ka hihchim a, singkang lakkhiak bang na hi ua: huchi in leng ka kiang ah na hongkik kei uh” TOUPA’N a chi.

¹²Huaiziak in, “Aw Israel, na tung ah hichibang in ka hih ding: na tung a hiai ka hih ding ziak in, Aw Israel, na Pathian tuak ding in mansa in om in.”

¹³“Ngai in, tangte dingkhe sak a, huih bawl a, mihing kiang a a ngaihtuahna bang ahia chih genkhiak sak a, zingsang mialsak a, leimun sangte chilpa a min TOUPA, sepaihte Pathian ahi!”