Read Paite Chin AMOS 5 Bible Online

AMOS 5 - Paite Chin bible

AMOS 5

¹Aw Israel inkawte aw, hiai thu noute sunna ding ka gen za un.

²Nungak, Israel, a pukta hi; a ding nawn kei ding: a gam tung ah paihkhiak ahita hi; amah tungding ding in kuamah a omkei uhi.

³TOUPA’N in hichi in a chi hi: Israel chite kiang ah, khopi, sang pawtna in, za a nuse ding a, khopi, za pawtna in, sawm a nuse ding hi.

⁴TOUPA’N Israel inkawte kiang ah hichi in a chi hi:

⁵“Hon zong un, na hing ding uh: himahleh Bethel khua zong kei unla, Gilgal ah lut sam kei unla, Beer — sheba khua ah galkah kei un: Gilgal khua pellou in sal in a man ding a, Bethel khua a hong vuaksuak ding hi.”

⁶TOUPA zong unla, na hing ding uh; huchilou in zaw Joseph inn ah mei bang in a pawt ding a, a kangkhin ding a, Bethel khua ah mitsak ding kuamah a omkei ding uhi:

⁷Vaihawmna singkha suaksak a, diktatna lei a paikhete aw:

⁸Siguk leh Zuheisuktun bawlpa leh sihna limliap lak a tangsakpa leh sun zan mial a bawlpa, tuipi tuite sam a, leitung a luangsakpa, amah tak zong le uchin; a min TOUPA ahi;

⁹Kulh tung a manthatna hong tungguih zou hial a, mihatte tung a manthatna tungsakpa pen.

¹⁰Kongpi ah taihilhmi a mudah ua, thudiktak genmi a kih uhi.

¹¹Huaiziak in mi gentheite tuan den in buh na laksak ua: suangsek in innte na lam ua, himahleh asung ah na teng kei ding uh. Grep huan nuamte na bawl ua, himahleh uain na dawn kei ding uhi.

¹²Na tatleknate uh tamdan leh na khelhnate uh a thupidan lah ka thei ngal a; mi diktatte na simmawh ua, golhna la a, kongpi a tasamte a hih ding him ua pampaihte aw.

¹³Huchi in hun hoihlou a hih ziak in mi pil zaw huai hun chiang in a daidide ding hi.

¹⁴Na hin theihna ding un hoihlouhna zong lou in, hoihna zong unla: huan na gen bang un, TOUPA sepaihte Pathian na kiang uah a om ding hi.

¹⁵Khelhna hua unla, hoihna it un: kongpi ah vaihawmna kiptak in tung ding un: Joseph inkaw omsunte tung ah TOUPA, sepaihte Pathian in hehpihna a nei kha mai ding hi.

¹⁶Huaiziak in TOUPA, sepaihte Pathian, TOUPA’N hichi in a chi: “Kongzing teng ah nakpi a kahna a om ding a, lamliante tengteng ah, khawk hina mah e: a chi ding uhi; lungkham ding in louneimite leh nakpi a kap ding in sisunsiamte a sam ding uhi.

¹⁷Grephuan teng ah nakpi a kahna a om ding a: na lak uah ka paisuak ding” TOUPA’N a chi hi.

¹⁸TOUPA ni deihte aw, na tung uh a gik hi: Bangdia TOUPA ni deih na hia ua? Vak hilou in mial ahizaw hi.

¹⁹Humpinelkai taisan a, vompi tuakmi bang leh inn a lut a, bang tung a khut nga a gul in a tuk bang ahi.

²⁰TOUPA ni vak hilou in mial ahi sin ka hia? Mial sah leh vakna neilou in?

²¹“Na ankuangluite uh ka hua in ka musit a, na kikhawmpi pisuakte uah leng ka kipak sam kei hi.

²²Ahi, na thillat uleh na buhlat uh honlan mahle uchin, ka sang kei ding a, na gan thau uh lemna thillatte leng ka limsak kei ding hi.

²³Na kaihging ging kilawm uh ka ngaikhe kei ding; huaiziak in kei a kipan bil aphuai na late uh lamang un.

²⁴Himahleh vaihawmna bel tuite bang in leh diktatna lui lian bang in luang hen”TOUPA’N a chi.

²⁵“Aw Israel inkawte aw, kum sawmli sung in gamdai ah kithoihnate leh thillatte ka kiang ah na honlan ngei ua hia?

²⁶Ahi, Molok na milim pathian uh leh Kaiuan na milimte uh, na aksi pathian uh, nou dia na tawisang zaw uhi.

²⁷TOUPA a min sepaihte Pathian in, noute Damaska khokhen ah sal in k’on paisak ding” TOUPA’N a chi hi.