Read Paite Chin AMOS 6 Bible Online

AMOS 6 - Paite Chin bible

AMOS 6

¹Zion tang a nuam lua a omte leh Samaria tang a bittak a omte leh Israel nam lian lak a inkuan mi thupite tung a gik hi:

²Kalneh khua ah hoh unla, en un; huai a kipan in Hamath khaw thupi ah hoh unla: Philistia gam Gath khua ah paisuk unla: hiai gamte sang in noute na hoihzaw uhia? Nou gam sang in a gam uh a zazaw ahia?

³Nou ni hoihlou gamlapi a koih leh hiamgam tunna naihsakte aw,

⁴Saiha lupna a lum a, a tutphah sau tungte ua kizia a, belamhon lak a belamnoute leh bawnghonte lak a kipan bawng tuaite ne a;

⁵David bang a kaihging tumtum a, lasak ding na bawlbawl uhi;

⁶Belhbu lian a uain dawn a, sathau hoihpen a kinuhte mah; himahleh Joseph haksatna ziak in a lungkham kei uhi.

⁷Huchi in tua sal dia pai masate toh sal in a pai ding ua, nuamsa a kiziate nuamsakna lakmang in a om ding hi.

⁸TOUPA, sepaihte Pathian, TOUPA Pathian in amah leh amah kilou in a kichiam a; “Jakob kisaktheihna ka kih a, a kumpipa innte ka mudah a: huaiziak in khua leh asung a om tengteng ka mansak sin ahi.”

⁹Hichi a honghi ding a, inn khat mi sawm a om leh a sivek ding uhi.

¹⁰Huan misite gang, amaute halpa ngei in inn sung a kipan a a guh lakhe ding in, inn sungtawng pen a mi om kiang ah, “Na kiang ah kuapeuh a damlai a om uhia?” a chih a, aman, “Omlou” a chih leh; aman, “Dai sipsip in! TOUPA min i lou ding uh ahi ngalkei a” a chi ding hi.

¹¹Ngai dih ua, TOUPA’N thu a peta hi; inn lian a chim lemlum ding a, inn neu leng a khang kham ik iak ding hi.

¹²Sakolte suangpi tung ah a tai ding ua hia? Huai ah min bawng in lei a let ding ua hia? Noute’n vaihawmna lah gu na suaksak ua diktatna gah singkha na suaksak uh:

¹³Nou thil bangmahlou tung a kipak a, i hatna in ahi kei maw kite i lak ua? chite aw.

¹⁴“En dih ua, Aw Israel inkawte aw, nou hondou ding in nam ka ding khesak ding a; huan Hamath khomual a kipan in Arabah luitan in nou a hon engbawl ding uh” TOUPA, sepaihte Pathian in a chita hi.