Read Paite Chin AMOS 7 Bible Online

AMOS 7 - Paite Chin bible

AMOS 7

¹Huchibang in TOUPA Pathian in a hon ensak a; en dih ua, hai poi nanung zaw pen dot pattungna a khaukhup a bawl a; ngai dih ua, kumpipa tangseu khit a pou nanung zaw ahi.

²Huan huchi a honghi a, huai gam a loupa a nek khitnung un, “Aw TOUPA Pathian, ngaidam in, k’on ngen hi: Jakob bangchi’n ading thei dia? Amah lah a neu ngal a” ka chi hi.

³Hiai thu ah TOUPA’N a lung hei in: “TOUPA’N, hiai hongtung nawn kei ding” a chi hi.

⁴Huchibang in, TOUPA Pathian in a hon ensak a; huan en dih ua, TOUPA Pathian mei a dou ding in a sam a; mei in tuithuk lian a kangkhin a, gam leng kat a utlai hi.

⁵Ken, “Aw TOUPA Pathian, khawl in k’on ngen ahi: Jakob bangchi’n ading thei dia? Amah lah a neu ngal a” ka chi hi.

⁶Hiai thu ah TOUPA’N a lungsim hei in; “TOUPA Pathian in, huai leng a hongtung nawn kei ding” a chi hi.

⁷Hichibang in a hon ensak a: ngai dih ua, TOUPA bel ulum a bawl bang kiang ah ading a, a khut a ulum toh.

⁸Huan ka kiang ah TOUPA’N “Amos, bang na mu a?” a chi a. Ken, “Ulum” ka chi hi. TOUPA’N, “Ngai in, ka mi, Israelte lak ah ulum ka koih ding a; amau ka paikheng nawnta kei ding:

⁹Isak mun sangte a hong segawp ding a, Israel mun siangthoute hihsiat ahi ding ua: Jeroboam inkawte namsau in ka dou ding hi” a chi hi.

¹⁰Huan Bethel khaw siampu Amaziah in Israel kumpipa Jeroboam kiang ah: “Amos in Israel inkawte lak ah nang hon kalh a: gam in a thu tengteng a thuak theikei chi in.

¹¹Amos in lah hichi in a chi ngal a, “Jeroboam namsau in a si ding, pellou in a gam a kipan in Israel sal in a pikhe ding” chi in thu a khak hi.

¹²Huan Amos kiang ah Amaziah in, “Aw nang zawlnei, kuan inla, Judah gam ah taimang inla, huai ah an ne inla, thu hilh in:

¹³Himahleh Bethel khua ah thuhilh nawn ken: kumpipa Mun Siangthou leh kumpipa in a hih ziak in” a chilai hi.

¹⁴Huan Amaziah kiang ah Amos in, “Zawlnei ka hi kei a, zawlnei tapa leng ka hi sam kei; ganhon vengpa leh theipi sing kempa ka hi zaw hi:

¹⁵TOUPA’N ka kiang ah, kuan inla, ka mi Israelte kiang ah thu gen in, honchi hi.

¹⁶Huchi in tuin TOUPA thu za in: Nang Israel kalh in thu gen kenla, Isak inkawte kalh in thu khak ken na chih;

¹⁷Huaiziak in TOUPA’N hichi in a chi, Na zi khopi ah kizuaknu ahi ding a, na tapate, na tanute namsau in a puk ding ua, na gam tehna khau in a hawm ding ua; nang leng sianglou mun ah na si ding a; pellou in Israel a gam a kipan sal in a pimang ding uh a chi” chi in a dawng hi.