Read Paite Chin AMOS 8 Bible Online

AMOS 8 - Paite Chin bible

AMOS 8

¹Hichibang in TOUPA Pathian in a hon ensak a; en dih ua, nipi theibawm na hi hi.

²Aman “Amos, bang ahia na muh?” a chi a. Ken Nipi theibawm, ka chi hi. TOUPA’N ka kiang ah, “Ka mi Israelte tung ah tawpna a hongtungta; amaute gawtna ding ah ka lungsim ka kheng nawn kei ding hi chi in.

³TOUPA Pathian in, huai ni chiang in biakin a lasakte dahla ahi ding a; munchih ah siluang tampi om ding a, daidide in a paikhe ding uh” a chi hi.

⁴Hiai ngaikhia in, Aw tasamte nebei nuam a; gam a migentheite hihmang nuamte aw,

⁵“Buh ka zuak theihna ding un kha thak chikchiang a bei ding a, tangbuang buh ka zuak theihna ding ua khawlni chikchiang a bei hiam, chi in; Ephah hihneu a sekel hihlian, diklou pia bukna khemna in na zang uhi;

⁶Dangkasik a mi genthei lei a, mi tasamte khedap but khat a lei a, buhsi i zuak theihna ding in” chi in.

⁷TOUPA, Jakob thupina lou in a kichiam a, “Pellou in a nasep himhim ka mangngilh hetkei ding” chi in.

⁸Hiai ziak in gam pumpi ling in asung a om peuhmahte a lungkham kei ding ua hia? Ahi, tuilian bang in a hong khangvek ding a; Aigupta gam lui bang in a hong buai in a kiam ding hi.

⁹TOUPA Pathian in, huai ni chiang in, hichi a honghi ding a, sunlai in ni ka tumsak ding a, nisat lai in lei ka mialsak ding hi.

¹⁰Na ankuangluite uh lungkhamna leh na la tengteng uh kahna ka suaksak ding a; kawng tengteng saiip puan ka tengsak ding a, lu chih sip ah giauna k’on tungsak ding; tapa tang neih sunna ding in lungkhamna leh, a tawpna khatna ni bang in ka bawl ding hi.

¹¹“TOUPA Pathian in, Ngai dih ua, nite a hongtung lellel; huai ni chiang in gam ah kial ka sawl ding a, an kialna hilou in, tui a kialna hi sam lou in, TOUPA thu theihna kialna pen a chi hi.

¹²Huan tuipi a kipan in tuipi ah leh mal a kipan suahlam ah leng a vakvai ding ua; TOUPA thu zong ding in ning chih ah a tai ding ua, a mu kei ding uhi.

¹³Huai ni chiang in nungak siangthou leh tangvalte dangtak in a bah ding uhi.

¹⁴Samaria khaw khelhna lou a kichiam a, ‘Aw Dan, na Pathian a hing bang in’ leh ‘Beer — sheba khaw lampi a hing bang in’ chi, huai mite leng a puk ding ua, a thounawn hetkei ding uh” a chi hi.