Read Paite Chin AMOS 9 Bible Online

AMOS 9 - Paite Chin bible

AMOS 9

¹Maitam chin a TOUPA ding in ka mu a: aman kongpi bulte a lin theihna ding ua a lu bawkte uh khen inla, avek ua lu tung ah hihzan vek in: ken a sibangte namsau in ka that ding a; khat lel leng a taimang kei ding uhi, khat lel leng a suakta hetkei ding uh a chi hi.

²Misi khua pha in paisuak mahle uh, huai a kipan in ka khut in ka lakhe ding a; van ah kaltou mahle uh huai a kipan ka kaikhe ding hi.

³Karmel mual vum ah bu mahle uh ka zong ding a, huai a kipan amau ka lasuk ding a, tuipi taw ah ka mitmuh louh in bu mahle uh, huai a kipan gul thu ka pe ding a amau a tu ding hi.

⁴A melmate uh ma ah sal in pai mahle uh, huai a kipan namsau thu ka pe ding a, amau a satlum ding ua: hoihna hilou in, hoihlouhna ding in a tung uah ka mit ka nga ding hi.

⁵Gam khoih a, zulsakpa TOUPA, sepaihte Pathian ahi ngal a; huailai a omte tengteng a lungkham ding ua; luipi bang in a khang ding ua, Aigupta lui bang in a kiam nawn ding uhi;

⁶Van a a dantante bawl a, leitung a a dantan kual bawl a, tuipi tuite sam a, leitung asung bawpa, a min TOUPA ahi.

⁷TOUPA’N “Aw Israel tate aw, ka tung ah Ethiopia tate bang in na omkei ding ua hia? Aigupta gam a kipan Israel leh Kaphtor gam a kipan Philistia mite leh Kir gam a kipan Suria mite ka pikhe ka hia? a chi hi.

⁸TOUPA’N, Ngai dih ua, TOUPA Pathian mit gam gilou tung ah a tu a, leitung a kipan ka hihmang ding a; himahleh Jakob inkawte a hihse vek kei ding” a chi hi.

⁹“Ngai dih ua, thu ka pe ding ahi; hakvang a buh a haih bang un, Israel inkawte nam tengteng lak ah ka haih ding a; himahleh tang neupen leng leitung ah a ke kei ding hi.

¹⁰‘Ka mite mikhial tengteng, hoihlouhna in a hon delhpha kei ding a, honpha sam kei ding’ chite namsau in a si ding uh” a chi hi.

¹¹TOUPA, hiai thil hihpan, “Huai ni chiang in David bawkta chim ka tungding ding a, a awngvangte ka hu ding a; a siate ka lemtou ding a, nidanglai a a om bang in ka lam thak ding hi chi in;

¹²Edom mun a omlaite leh ka min a sap nam tengtengte a neih theihna ding un” a chi hi.

¹³TOUPA’N, “Ngai dih ua, nite a hongtung lellel ahi” huai ni chiang in leiletmi in buh atmi a delhpha ding a, grep chilmi’n chithehmi a delhpha ding a; tangsang in uain khum a taksak ding; tang tengteng a zul ding uhi.

¹⁴Huan ka mi Israelte sal a kipan ka pikik nawn ding a; khua kigawpsate a bawl nawn ding ua, a luah ding uhi; huan grephuante a bawl ding ua, a uain a dawn ding uh; huante leng a bawl ding ua, a gah a ne ding uhi.

¹⁵A gam uah amau ka phutkip ding a, a kiang ua ka piak a gam ua kipan bohkhiak in a om nawnta kei ding, TOUPA na Pathian in a chi hi.