Read Paite Chin JONAH 2 Bible Online

JONAH 2 - Paite Chin bible

JONAH 2

¹Huan Jonah ngapi gilsung a kipan in, TOUPA a Pathian kiang ah a thum a, Hichi in a chi a:

²“Ka haksatna ziak in TOUPA ka sam a, aman a hon dawng a; Sheol gilsung a kipan in ka kikou a, nang ka aw na zata hi.

³Thukpi ah, tuipi sunggil ah n’on pailut a, tui tampi ka kimvel ah a om a; na tuikihawt leh na tui kisep tengteng in a hontum zel hi.

⁴Huan na mitmuh a kipan paihkhiak ka hi a; himahleh na biakin siangthou lam ka nga nawn ding, ka chi hi.

⁵Tuite’n ka hinna tan in a hon umkim ua; tui thuk ka kim ka vel ah a om hi; louhingte’n ka lu a tuamsuak hi.

⁶Tangte taw ah ka paisuk a; lei in tangtawn a ding in a kalhnate’n a hon khakkhum a; himahleh nang AW TOUPA ka Pathian, kawhawm a kipan ka hinna na lakhia hi.

⁷Ka hinna ka sung ah a bahlai in, TOUPA ka theigige ding a: Ka thumna na biakin siangthou ah na kiang a hongtung hi.

⁸Thilginalou leh zuaulel limsakmite’n amau chitna a lehngatsan uh ahi.

⁹Ken zaw kipahthu genna aw toh na kiang ah kithoihna ka lan ding; ka chiamsa thu ka tangtun ding. Hotdamna TOUPA a ahi.

¹⁰Huan TOUPA’N nga a houpih a, Jonah gam ah a lawkheta hi.