Read Paite Chin JONAH 3 Bible Online

JONAH 3 - Paite Chin bible

JONAH 3

¹Huan TOUPA thu Jonah kiang ah a hongtung nawn leuleu hi.

²“Thou inla, Ninevi khua, khopi thupitak ah hoh inla, thugen ding k’on chihpen va tangkoupih in” chi in.

³Huchi in Jonah a thou a, TOUPA thu bang in Ninevi khua ah a hohta hi. Ninevi bel khopi thupi petmah, ni thum pai a ching hi.

⁴Jonah ni khat pai zoh chiang khopi sung ah a vapai phot a, “Tua pat ni sawmli in, Ninevi hihman ahi ding hi” chi in, a kikou hi.

⁵Ninevi mite’n Pathian a gingta ua; anngawl a phuang ua, a lak ua a lianpen a kipan a neupen tan in saiip puan a silh uhi.

⁶Huai thu Ninevi khaw kumpipa bil a hongtungta a, a mangtutphah a kipan a thou a, a kumpipuan a suah a, saiip puan silh in, vut ah a tuta hi.

⁷Kumpipa leh a miliante thupiak in kumpipa’n Ninevi khosung ah thu a phuang in a pulakta hi. “Mihing hiam, gan hiam, bawnghon hiam, belamhon hiamte in bangmah chiam kei uhen: banghiam ne in tui leng dawn kei uhen:

⁸Mihing leh ganhingte’n saiip puan silh uhenla, nakpitak in Pathian sam uhen: ahi, michih in amau lampi hoihlou leh a khut ua hiamgamna lehngatsan uhen.

⁹I manlouhna ding in, Pathian lunghei in lungsim kilehhei in, a heh mahmahna a kipan a kilehhei kei ding chih kuan ahia theithei?” a chi hi.

¹⁰Huchi in Pathian in a thilhihte uh en in, a lampi hoihlou uh a lehngatsan uh chih a mu a; a kiang ua a chihsa, hih a tup thil hoihlou Pathian in a lehngatsan a; a hihta kei hi.