Read Paite Chin JONAH 4 Bible Online

JONAH 4 - Paite Chin bible

JONAH 4

¹Himahleh huai in Jonah a lungkim hetkei a, a heh hi.

²TOUPA kiang ah a thum a, “AW TOUPA, k’on ngen hi, hiai ka gam ua ka omlai a ka gen hilou hia? Hiai ziak in Tarsis lam ah ka taimang pah a: hehpih thei Pathian, lainatna a dim, heh mengmeng lou, chitna hau, thil hoihlou lehngatsan sek na hi chih ka thei hi.

³Huaiziak in AW TOUPA, tuin ka hinna hon laksak ding in k’on ngen hi; kei ading in hin sang in sih a hoihzaw hi” a chi hi.

⁴Huan TOUPA’N, na heh mawk na hih dik hia? a chi hi.

⁵Huchi in Jonah bel khopi a kipan a paikhia a, khopi suahlam pang ah a tu a, huai ah sawlbuk a lam a, khopi tung a thil hongtung ding muh tum in a nuailim ah a tu nilouh hi.

⁶TOUPA Pathian in umgui Jonah tung ah a zamsak a, a haksatna a kipan honkhe ding a a lu liah ding in a nasep khawl hi. Huchi in Jonah umgui ziak in a kipak mahmah hi.

⁷Himahleh Pathian in, a zingsang phalvak in, leikha a nasep khawl a, huai in umgui a keitan a ahong vuaita hi.

⁸Hichi ahi a, ni a hongsuah in Pathian in suahlam huih a na sepkhawl a; ni in Jonah lu a hai a, a sibup a, amah adin sih a ngen hi, “Kei ding in hin sang in sih a hoihzaw” a chi hi.

⁹Pathian in Jonah kiang ah, “Umgui tungtang thu ah na heh mawk na hih dik hia?” a chi hi. Aman, “Sih ut hial a ka heh, ka hih dik hi” a chi hi.

¹⁰TOUPA’N, “Na gim pihlouh, na khansak leng hi samlou, zan khat thu a hongom a, zan khat thu a mang nawn umgui na hehpih leh;

¹¹Ninevi khua, khopi thupitak, asung a mi nuai khat leh sing nih sang a tam, a taklam uleh a veilam uleng khen theiloute leh ganhon tampi omna, ka hehpih kei dia hia?” a chi hi.