Read Paite Chin NAMBARS 1 Bible Online

NAMBARS 1 - Paite Chin bible

NAMBARS 1

¹Aigupta gam a kipan a hongpawt uh a kum nihna, a kha nihna, a ni khat ni’n Sinai gamdai ah Kihoupihna puanin ah TOUPA’N Mosi a houpih a:

²Israel suan omkhawm tengteng, a inkuan kuan in, a min uh kizomdan bangzel in pasal tengteng simvek in; a chi hi.

³Kum sawmnih apan a tunglam Israel lak a galdou thei chiang peuhmah nang leh Aron in a pawlpawl in na simvek ding uh ahi.

⁴Na kiang ah namchih lak a khat, inkuan a lupen zel a om ding uh ahi.

⁵Hiaite na kiang a om dingte min ahi: Reuben nam a Shedeur tapa Elizur,

⁶Simeon nam a Zurisadai tapa Shelumiel.

⁷Judah nam a Amminadab tapa Nahson.

⁸Issakar nam a Zuar tapa Nethaneel.

⁹Zebulun nam a Helon tapa Eliab.

¹⁰Joseph tate, Ephraim nam a Ammihud tapa Elisama. Manasseh nam a Pedazur tapa Gamaliel.

¹¹Benjamin nam a Gideoni tapa Abidan.

¹²Dan nam a Ammisaddai tapa Ahiezer.

¹³Asher nam a Okran tapa Pagiel.

¹⁴Gad nam a Deuel tapa Eliasaph.

¹⁵Naphtali nam a Enan tapa Ahira.

¹⁶Hiaite mipite tel, a pi leh pute uh nam a lupen Israel inkuan a lupente ahi uh, chi in.

¹⁷Mosi leh Aron in huai mi a min uh a lohte a pi uhi.

¹⁸Mi tengteng a kha nihna, ni khat ni’n a samkhawm vek ua; a inkuan kuan in, a min uh kizomdan bangzel in kum sawmnih apan a tunglam teng a pipute uh min a taklang uhi.

¹⁹TOUPA’N Mosi thu a piak bang in Sinai gamdai ah a simta uhi.

²⁰Israel tapa upapen Reuben tate suante a chichi in, a inkuan kuan in, a min uh kizomdan bangzel in pasal kum sawmnih apan a tunglam, galdou theiteng a sim uh.

²¹Reuben nam, a simte uh sing li leh sang guk leh za nga ahi.

²²Simeon tate suante a chichi in, a inkuan kuan in, a min uh kizomdan bangzel in pasal kum sawmnih apan a tunglam galdou theiteng a sim uh.

²³Simeon nam, a simte uh sing nga leh sang kua leh za thum ahi uh.

²⁴Gad tate suante a chichi in, a inkuan kuan in, a min uh kizomdan bangzel in pasal kum sawmnih apan a tunglam, galdou theiteng a sim uh.

²⁵Gad nam a, a simte uh sing li leh sang nga leh za guk leh sawmnga ahi uh.

²⁶Judah tate suante a chichi in, a inkuan kuan in, a min uh kizomdan bangzel in kum sawmnih apan a tunglam, galdou theiteng a sim uh.

²⁷Judah nam a, a simte uh sing sagih leh sang li leh za guk ahi uh.

²⁸Issakar tate suante a chichi in, a inkuan kuan in, a min uh kizomdan bangzel in kum sawmnih apan a tunglam, galdou theiteng a sim uh.

²⁹Issakar nam a, a simte uh sing nga leh sang li leh za li ahi uh.

³⁰Zebulun tate suante a chichi in, a inkuan kuan in, a min uh kizomdan bangzel in kum sawmnih apan a tunglam, galdou theiteng a sim uh.

³¹Zebulun nam a, a simte uh sing nga leh sang sagih leh za li ahi uh.

³²Joseph tate lak a Ephraim tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou thei teng a sim uh.

³³Ephraim nam a, a simte uh sing li leh za nga ahi uh.

³⁴Manasseh tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou thei teng a sim uh.

³⁵Manasseh nam a, a simte uh, sing thum leh sang nih leh za nih ahi uh.

³⁶Benjamin tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou theiteng a sim uh.

³⁷Benjamin nam a, a simte uh, sing thum leh sang nga leh za li ahi uh.

³⁸Dan tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou theiteng a sim uh.

³⁹Dan nam a, a simte uh, sing guk leh sang nih leh za sagih ahi uh.

⁴⁰Asher tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou theiteng a sim uh.

⁴¹Asher nam a, a simte uh, sing li leh sang khat leh za nga ahi uh.

⁴²Naphtali tate suante a chichi in, a inkuan kuan in, a min uh tam dan bangzel in kum sawmnih apan a tunglam, galdou theiteng a sim uh.

⁴³Naphtali nam a, a simte uh, sing nga leh sang thum leh za li ahi uh.

⁴⁴Hiaite Mosi leh Aron in Israel lupen sawmlehnih, inkuan a lupente toh a simte uh ahi.

⁴⁵Huchi in Israel suan a inkuan kuan ua kum sawmnih apan a tunglam, galdou theiteng, Israel gam a te sim ahi uhi.

⁴⁶A sim teng uh nuai guk leh sang thum leh za nga leh sawmnga ahi uh.

⁴⁷Levite pipute a sim telkei uh.

⁴⁸TOUPA’N Mosi a houpih a,

⁴⁹Levi chi na sim tel ding ahi kei, Israel mite lak ah na sim tel ding ahi sam kei.

⁵⁰Levite theihpihna biakbuk kemmite leh van tengteng kemmite dia sehzawk ding ahi. Biakbuk a van tengteng a zawng ding ua, a kem ding ua, biakbuk a kimvel in a omkhum ding uhi.

⁵¹Biakbuk malam a a pai chiang in Levite’n a phel ding ua; biakbuk kaihding chiang in Levite mah in a kainawn ding uh. Namdang hong kigolh peuhmah hihlup ding ahi.

⁵²Israel suante’n amau mun chiat ah, a pawlpawl in a tam dan uh dungzui zel in a puaninte uh a kai ding uh.

⁵³Himahleh Levite’n Israel suante khawmpi tung a hehna a om louhna ding in theihpihna biakbuk kimvel ah a kaiding uhi. Levite’n theihpihna biakbuk a kep ding uh ahi.

⁵⁴Huchibang in Israel suante’n TOUPA’N Mosi kiang a thu a piak tengteng bang in a hihta uhi.