Read Paite Chin NAMBARS 10 Bible Online

NAMBARS 10 - Paite Chin bible

NAMBARS 10

¹Huan, TOUPA’N Mosi a houpih a:

²Dangka pengkul nih bawl inla; sekthoh in bawl in. Mipite sapkhawmna ding leh pawtsakna dia na zat ding ahi.

³Huai a kimut chiang in mipi tengteng na kiang ah Kihoupihna puanin kongkhak bula a hong kikhop vek ding uh ahi.

⁴Khat lel a mut uleh Israel mipite heutu intekpente kia na kiang a a hong paikhawm ding uh ahi.

⁵Gallau mut a na mut uleh suahlam pang a omte a pawt ding uhi.

⁶Gallau mut a na mutnawn uleh simlam pang a omte a pawt ding uhi. A pawtna ding un gallau mut bang a a mut ding uh ahi.

⁷Himahleh mipite hong paikhawmna ding in na mut peuhmah ding ua, gallau mut a bel mutlou in.

⁸Aron tapa siampute’n pengkul a mut ding uh ahi. Huai nou ading in na suante uh tan a tangtawn dan ahi ding hi.

⁹Na gam ua melma, nou hon nuaisiahte dou dia na kuan chiang un gallau mut in pengkulte na mut ding uhi. Huchi in TOUPA na Pathian ma uah theihgigena ahi ding ua, na melmate ua pan humbit na hi ding uh.

¹⁰Nuam nasak nite un, a hunbi a na ankuangluinate uah, na kha thakte uah, na haltum thillat uahte leh na kilemna thillat kithoihnate uah pengkul na mut ding uh ahi. Huchi in na Pathian ma uah nou ading in theihgigena ahi ding. Kei TOUPA na Pathian uh ka hi, chi in.

¹¹Kum nihna, kha nihna, huai kha ni sawmnih ni’n, hichi ahi a, meipi in theihsakna biakbuk tung a tungkah santa hi.

¹²Huchi in Israel suante a paidan dungzui in Sinai gamdai apan a pawt ua; Paran gamdai ah meipi a khawlta hi.

¹³Mosi zang a TOUPA thupiak bang in a pawt uhi.

¹⁴A masapen in Judah pawlte, a pawl uh tamdan dungzui zel in a pawt ua; a heutu uh Aminadab tapa Nashon ahi.

¹⁵Issakarte heutu Zuar tapa Nethaneel;

¹⁶Zebulunte heutu Helon tapa Eliab ahi.

¹⁷Biakbuk a phel ua, Gershon tapa leh Merari tapa biakbuk zawngmite a pawt uhi.

¹⁸Reubente a pawl uh tamdan dungzui in a pawt ua; a heutu uh Sedeur tapa Elizur ahi.

¹⁹Simeonte heutu Zurisadai tapa Selumiel ahi.

²⁰Gadte heutu Deuel tapa Eliasaph ahi.

²¹Kohathte’n Mun Siangthou a zawng ua, a pawt ua; a dangte’n a tun ma un biakbuk a na lam uh.

²²Ephraimte a pawl uh tamdan dungzui in a pawt ua; a heutu uh Emihud tapa Elisama ahi.

²³Manassehte heutu Pedazur tapa Gamaliel ahi.

²⁴Benjaminte heutu Gideoni tapa Abidan ahi.

²⁵A nanungpen in Dante a pawl uh tamdan dungzui in a pawt ua; a heutu uh Amisadai tapa Ahiezer ahi.

²⁶Asherte heutu Okran tapa Pagiel ahi.

²⁷Naphtalite heutu Enan tapa Ahira ahi.

²⁸Hiai bang ahi Israel suante pawl a tamdan dungzui ua a paidan uh, hiai bang in a paizom zel uhi.

²⁹Mosi sungpa Midianmi Reuel tapa Hobab kiang ah, Mosi in, “K’on pe ding, TOUPA’N a chihna mun ah ka pai ding ua, ka kiang uah hongsam inla, hoihtak in na tung ah ka hih ding uh. TOUPA’N Israel suante tungtang thu lah hoih in a genta ngal a” a chi hi.

³⁰Aman a kiang ah, “Ka hong dahmai ding, ka gam uah ka tanaute kiang ah ka paizaw mai ding” a chi hi.

³¹Aman, “Hon paisan mahmah ken, gamdai ah lah giahphual satna ding na theizaw ngal a, kou ading in mit na honghi ding hi.

³²Hichi ahi dia, ka kiang ua na hongsam leh, ahi, hichi ahi ding. TOUPA’N thil hoih hon hihsak bang in k’on hihsak samzel ding uhi” a chi hi.

³³Huchi in TOUPA tang apan ni thum lam ah a pai ua; TOUPA thukhun bawm amau adia kingakna mun zong in a ma uah ni thum lam ah a na pai masa hi.

³⁴A buk ua pan a pawt un TOUPA meipi sun in a tung uah a om hi.

³⁵Hichi ahi a, huai bawm a pawt ding peuhmah chiang in Mosi in, “TOUPA aw, hong kisa inla, na melmate hawlzak in, nang hon hawte na ma ah taikek uhen,” a chi zel hi.

³⁶A kingakna peuh ah, TOUPA aw, Israel mipi sang tampite kiang ah hong kiknawn in, a chi zel hi.