Read Paite Chin NAMBARS 11 Bible Online

NAMBARS 11 - Paite Chin bible

NAMBARS 11

¹Huan, mipite’n TOUPA zak a phun in thil hoihlou pipi a gen ua; TOUPA’N huai a zak in a hehta hi. Huchi in TOUPA mei a lak uah a hong kuang a, giahphual pawnung pen a omte a kangta hi.

²Huchi in mipite’n Mosi a sam ua; Mosi TOUPA kiang ah a thum a, huai mei a mitta hi.

³Huai mun min Taberah a sa hi, TOUPA mei a lak ua a hong kat ziak in.

⁴A lak ua mikihel pawl khat in sa lunggulhna a hon neita ua; Israel suante leng a kap nawn ua, “Kua’n ahia nekding sa honpe ding?

⁵Ut leh dah a Aigupta gam a ngasa i nekzelte i theigige ua, tangmaite, mazelte, phulun sialnek chite, vaiphulunte, phulun ngou leng.

⁶Himahleh tuin i guhngek uh a keu khinta, bangmah lamet ding a omkei, manna lel loungal” a chi uhi.

⁷Manna bel koriander tang bang, a latdan in bedeli suang bang ahi.

⁸Mite’n a tomkhawm ua, gawinelna in a gawinel ua, sum in a su ua, belte ah a huan ua, tanghou in a bawl uhi. Nek in sathau a kan tanghou a bang hi.

⁹Giahphual a zan a dai a kiak in manna leng a hong kia hi.

¹⁰Mipite a inkuan kuan un a puanin kongkhak chiat uah a kap uh, chih Mosi in a naza hi. TOUPA a heh mahmah a; Mosi leng a lungkim kei hi.

¹¹Huchi in TOUPA kiang ah, “Bangziak in ahia na sikha n’on sukgim, bang ahia na mit ka tunlouhna, hiai mite tengteng puakgik ka tung a na ngak?

¹²Hiai mipite tengteng ka suan ahi ua hia? A pi leh pute uh kiang a kichiam a piak na chiam gam a pilut di’n. Naupommi in nawitui nelai a pom bang in na angsung ah pom in, n’on chih dia ka pikhiak?

¹³Hiai mipi tengteng piak ding sa koi apan ka nei dia? ‘Ka nek ding un sa honpia in,’ chi in a kap ngal ua.

¹⁴Hiai mipi tengteng keimah kia in ka paw zoukei. Kei ading in a gik lua hi.

¹⁵Hichibang a honhih ding na hihleh, hon hehpih inla, hon sisak vanglak in, honhih genthei nawn mahmah ken” a chi hi.

¹⁶TOUPA’N Mosi kiang ah, “Israelte Upa, mipite Upa leh a heutute uh hi a na theih mi sawmsagih ka kiang ah hon pikhawm inla, Kihoupihna puanin ah nangmah toh ding khawm di’n honpi in.

¹⁷Huchi in ka hongpawt dia, huai ah k’on houpih ding. Na tung a om kha om pen a tung uah ka koih ding. Nang kia’n pawlou in mipite puakgik a hon puakpih ding uhi.

¹⁸Nang mipite kiang ah, Zingchiang a ding in kihih siangthou vek unla; huchi in sa na ne ding uh. Sa nekding kuan ahia honpe ding? Aigupta gam a nuam i saksak utoh, chi in TOUPA zak in na kap ua; huaiziak in, TOUPA sa nou a honpe dia, huchi in na ne ding uhi.

¹⁹Ni khat kia, ni nih kia, ni sawm kia, ni sawmnih kia leng na ne kei ding ua;

²⁰Himahleh kha khat pumlum, na nakvang ua a hongpawt khiak a nou adia kihhuai a hong hih masiah na ne ding uhi. Na lak ua om TOUPA na deihlouh ua, Aigupta gam apan bangdia paikhia i hi ua? chi a, a ma a na kah ziak un” a chi hi.

²¹Mosi in, “Ka ompih mipite khe a paithei kia leng nuai guk ahi ua; kha khat pumlum nek ding in sa ka pe ding, na chi hi.

²²Belamhon leh ganhon leng gohsak lehang leng, a kham ding ua hia? Tuipi a ngasa tengteng leng matsak vek lengle, a khamzou ding ua hia?” a chi hi.

²³TOUPA’N, Mosi kiang ah,“ TOUPA khut a tomsak ahita hia? Na tung ah ka thu bang a, a tun leh tunlouh na theimai ding” a chi hi.

²⁴Mosi a pawt a, TOUPA thu mipite a hilh hi. Mipite Upa sawmsagihte a samkhawm a, puanin kim ah a dingsak hi.

²⁵TOUPA meipi ah a hongsuk a, a hong houpih a, amah tung a om Kha pen Upa sawmsagihte tung ah a koih hi. Hichi ahi a, kha a tung ua a koihtakin thu a gen ua; a genzom sawtkei uhi.

²⁶Himahleh giahphual ah mi nih a omlai ua, khat min Eldad ahi, a khatpen min Medad ahi. Kha a tung uah a om a, upate lak a minkhum ahi ua, himahleh Kihoupihna puanin ah bel a hohkei uhi. Giahphual ah thu a gen uhi.

²⁷Huchi in tangval khat a va tai a, Mosi a va hilh a, “Eldad leh Medad in giahphual ah thu a gen uh” a chi hi.

²⁸Nun tapa Joshua, a tuailai apan Mosi nasempa’n a dawng a, “Ka toupa Mosi, kham ve” a chi hi.

²⁹Mosi in a kiang ah, “Kei gum a na thikthu sia hia? Pathian mi tengteng zawlnei hivek le uh, TOUPA’N a tung uah tua Kha koihchiat leh chih zawmah lai ka hi!” a chi hi.

³⁰Huchi in Mosi leh Israel Upa tengteng giahphual ah a lut nawn uhi.

³¹TOUPA apan huih a hongnung a, tuipi apan vengkeng a hon mut leng a, giahphual lehlam sang ni khatlam, a lehlam ni khat lamtuak dimsuak in giahphual kim ah tong nih ding a sang in a kesak hi.

³²Mipite’n huai ni nitum leh zankhua leh a zing nitum in vengkeng a va tomkhawm ua; a tom tawmpen in leng homer sawm a tom hi. Giahphual kim ah amau a chiat a phou uhi.

³³Huai sa a neklai un, a nek khit ma un, mipite tung ah TOUPA a heh mahmah a, mipite hipi thupi mahmah in TOUPA’N a gawtta hi.

³⁴Hiai mun min Kibroth-hattaavah a sa a; huai a saduhte a vui ziak un.

³⁵Kibroth-hattaavah apan mipite Hazeroth ah a pai ua; Hazeroth ah a giahphual a sat uhi.