Read Paite Chin NAMBARS 12 Bible Online

NAMBARS 12 - Paite Chin bible

NAMBARS 12

¹Huan, Miriam leh Aron in Mosi in Kus numei zi a, a neih ziak in a gensia ua; Kus numei bel a neingei hi.

²Amau, “Mosi kiang kia ah hia TOUPA’N thu a gen tuam? Ei kiang ah leng a gensam ka hia?” a chi uh. TOUPA’N huai a naza hi.

³Mosi bel leitung a mihing tengteng sang in a migi mahmah ahi.

⁴Thakhat in TOUPA’N Mosi, Aron leh Miriam kiang ah, “Na thum un hong paisuk unla, kihoupihna puanin ah hongpai un:” a chi hi. Huchi in a thum un a va hoh uhi.

⁵TOUPA meipi ding ah a hong paisuk a, puanin kongkhak ah a hong ding a, Aron leh Miriam a sam a; a nih un a hong paisuk uhi.

⁶Aman, “Ka thu ngaikhia un. Na lak ua zawlnei na om uleh amah kiang ah kei TOUPA kilakna in ka kihil dia, manglam in ka houpih ding.

⁷Ka sikha Mosi bel huchibang ahi kei. Ka inkaw tengteng ah a muanhuai hi.

⁸Amah toh paukam in thuguk omlou in teltak in ka kihou ding ua; TOUPA mel leng a mu ding. Huaiziak in ka sikha Mosi bangchidan a gense ngam na hi ua?” a chi hi.

⁹Huchi in TOUPA a tung uah a heh mahmah a, a pai nawnta hi.

¹⁰Puanin tung a meipi a kikhinta hi. Ngai in, Miriam vuk bang a ngou in a hong phakta a; Aron in Miriam a en a, ngai in, phak a na hita maimah hi.

¹¹Huchi in Aron in Mosi kiang ah, “Ka toupa aw, ka tung uah khelhna nga mahmah ken. Haihuaitakin ka na hihta ua, ka na khialta uhi.

¹²A nu sul apan sisa phial mahmah a a hongpawt bang in amah omsak ken” a chi hi.

¹³Huchi in Mosi in, “Pathian aw, damsak nawn dihve:” chi in TOUPA a ngen hi.

¹⁴TOUPA’N Mosi kiang ah, “A pa’n a mai chilsiat hilhial leh leng ni sagih a zakta kei ding maw? Giahphual pua ah ni sagih kibu henla; huaikhit chiang in pilut nawn hi hen” a chi hi.

¹⁵Huchi in giahphual pua ah ni sagih sung Miriam khumtuam in a om hi. Miriam a pilut nawn ma un mipite a kisuan kei uhi.

¹⁶Huaikhit in mipite Hazeroth apan a pawt ua, Paran gamdai ah giahphual a sat uhi.