Read Paite Chin NAMBARS 13 Bible Online

NAMBARS 13 - Paite Chin bible

NAMBARS 13

¹Huan, TOUPA’N Mosi a houpih a:

²“Israel suante ka piak, Kanan gam va enkhe ding in mi sawl in. A nam inkaw chih ua mi, a intekpa pen lak a mi khatchiat na sawl ding” a chi hi.

³Mosi in Paran gamdai apan TOUPA thupiak bang in a kuansakta a; avek un Israel suante lak a intekpa pen chiat ahi uhi.

⁴Hiaite a min uh ahi: Reuben nam lak a mi Zakur tapa Shammua.

⁵Simeon nam lak a mi Hori tapa Shaphat.

⁶Judah nam lak a mi Jephunneh tapa Kaleb.

⁷Issakar nam lak a mi Joseph tapa Igal.

⁸Ephraim nam lak a mi Nun tapa Oshea.

⁹Benjamin nam lak a mi Raphu tapa Palti.

¹⁰Zebulun nam lak a mi Sodi tapa Gaddiel.

¹¹Joseph nam, Manasseh nam a chih uh, lak a mi Susi tapa Gaddi.

¹²Dan nam lak a mi Gemalli tapa Ammiel.

¹³Asher nam lak a mi Mikael tapa Sethur.

¹⁴Naphtali nam lak a mi Vophsi tapa Nahbi.

¹⁵Gad nam lak a mi Maki tapa Geuel.

¹⁶Hiaite gam enkhe dia Mosi in a sawlte min ahi. Nun tapa Oshea Mosi in Joshua a chi hi.

¹⁷Huchi in Mosi in Kanan gam enkhe ding in amaute a sawl a, a kiang uah, “Simlam lampi ah paiphot unla, tangte ah kahtou un.

¹⁸Huai gam bangchibang ahia, huai a teng mipite a hat uh hia, hatlou, a tawm uh leh a tam uh;

¹⁹A tenna gam uh a hoih hia hoihlou, a omna khuate uh bangchibang ahia, puanin maimah hia, kulh nei;

²⁰Huai gam lei thau ahi hia, lei gawng, gammang om hia omlou chih va enkhia un. Hangsantak in om unla, huai gam theigahte honpua un” a chi hi. Tu grep gah masa gah hun laitak ahi.

²¹Huchi in a kuan touta ua, huai gam Jin gamdai apan Hamath lutna Rehob tan in a enkhe vek uhi.

²²Simlam ah a hohtou phot ua, Hebron a va tung ua, huai ah Anak suan Ahiman, Sesai leh Talmai a om uhi. Hebron bel Aigupta gam a Zoan kilam ma kum sagih a kilam khinta ahi.

²³Eskil guam a va tung ua, huai ah grep gahbom khat a hiang toh a sattan ua, chiang in mi nih in a zawng uhi. Theibuhfai leh theipite leng a pua uhi.

²⁴Huai mun Eshkol phaizang a sa ua; Israel suante’n huai a grep bom a satkhiak ziak un.

²⁵Ni sawmli zoh in gam etkhiakna apan a hong kiknawnta uhi.

²⁶Huchi in Paran gamdai a Kadesh ah Mosi leh Aron leh Israel suan mipi tengteng kiang a hongtung ua, a kiang uah leh mipi tengteng kiang ah thu a hontun ua, huai gam theite a ensak uhi.

²⁷A kiang ah, “N’on sawlna gam ah ka va hoh ua, bawngnawi leh khuaizu luanna a na hingei ngut a; hiai a gam thei ahi.

²⁸Himahleh a gam a mi tengte mi hat pipi ahi ua, khuate leng kulh nei, thupi taktak ahi. Anak suante leng ka va mu uhi.

²⁹Amalekte simlam gam ah a teng ua; Hitte, Jebuste, Amorte, tang gam ah a teng uh. Kanante tuipi gei leh Jordan lui dung ah a teng uh” chi in a hilh uhi.

³⁰Huchi in Mosi ma ah Kaleb in mipite a daisak khipkhep a, “Kisa tou zok ni, va latou zok ni, i zou ngeingei ding uh” a chi hi.

³¹Himahleh a hohpihte’n, “I va zou thei vek kei ding e, ei sang in lah a hatzaw ngal ua” a chi uhi.

³²Huchi in Israel suante kiang ah, “Ka va gam etkhiak uh gam, enkhe dia ka va vakna uh, asung a mi tengte nekkhit hatmi ahi ua; a mi om ka muhte uh mi awmkhauh pipi ahi uh.

³³Huai ah Anak suante, miliante, awmkhauh pipi ka va mu ua; khaupe banglel in ka va kimu ua, amau leng khaupe ek banglel in a honmu uh” chi’n a hoihlou lam in a gen uhi.