Read Paite Chin NAMBARS 14 Bible Online

NAMBARS 14 - Paite Chin bible

NAMBARS 14

¹Huan omkhawm tengteng aw suak in a kap ua; huai zan in mite a kap uhi.

²Israel suan tengteng Mosi tung leh Aron tung ah a phun ua; omkhawm tengteng in a kiang uah, “Aigupta gam ah Pathian in honthat geih hileh aw! Ahihkeileh gamdai ah hon na that geih hileh aw!

³Bang a chia namsau a si maimah dia Pathian in hiai gam a honpi ahi diam aw? I zi leh i tate lah mat maimah ding ahi ngal ua. Aigupta gam a kiknawn ei adia hoihzaw lou ding hia? a chi uhi.

⁴Huchi in a kihou khawm ua, heutu bawl ni e, Aigupta gam ah kiknawn ni” a chi uhi.

⁵Huchi in Mosi leh Aron Israel suan mipi omkhawm tengteng ma ah a khupboh uhi.

⁶Nun tapa Joshua leh Jephunneh tapa Kaleb, gam va enkhete lak a telte’n a puan uh a botkek uh.

⁷Israel suan omkhawm tengteng kiang ah, “Enkhe dia ka va vakna gam uh gam hoih tak ahi.

⁸I tung ua TOUPA a kipah leh huai gam ah a hon pilut ding. Huai nawitui leh khuaizu luanna gam a honpe ding hi.

⁹TOUPA tung ah helkei phot le uchin. Huai gam a mite leng lau sam kei un. I an ding uh ahi ua, a kihumbitna uh bangmah ahi kei. TOUPA i kiang uah a om hi, amau lau kei un” chi in a gen uhi.

¹⁰Himahleh omkhawm tengteng in suang a den a sawm ua; huchi in TOUPA thupina Kihoupihna puanin, Israel suan tengteng ma ah a hong kilangta hi.

¹¹Huchi in TOUPA’N Mosi kiang ah, “Hiai mipite’n bang tan hon thusim lou ding ahi ua; a lak ua chiamtehna ka hih zel nangawn a leng bang tan ahia hon taksan louh lai ding uh?

¹²Hipi in ka gawt dia, ka in-gamsak dia, nangmah ah amau sang a thupi leh thilhihthei zaw nam ka bawlkhe zawmai ding” a chi hi.

¹³Mosi in TOUPA kiang ah, “Aigupta mite’n a za kha ding uh. Hiai mite lah a lak ua pan na thilhihtheihna a na pikhiak ahi ngal ua.

¹⁴Hiai gam a teng mite a hilh ding uh. Hiai mite lak ah nang TOUPA na om chih a zata uh. Kimaituah hial a muh in na om a, na meipi a tung uah a om a; sun in meipi ding, zan in mei in a ma uh lah na pi zel hi.

¹⁵Hiai mite na thahgam leh na minthanna za namte’n

¹⁶TOUPA’N hiai mite kichiam a, a chiam gam a a pi theihlouh ziak in gamdai ah a thatta hi, a chi ding uh.

¹⁷Tuin k’on ngen ahi, ka TOUPA thilhihtheihna hihthupi in om hen, thu a na gentak dungzui in;

¹⁸TOUPA lungneltak, migitna hau, thulimlouhnate, tatleknate ngaidam zel; mawh a a sehte khah ngeiloupa, pate thulimlouhna tate, tate tasawnte, suan thumna leh suan lina tan a gawtzel ahi, na chi hi.

¹⁹Na migitna a thupi bang ngei leh Aigupta gam apan tutan a na ngaihdam bang in mipite thulimlouhna ngaidam in” a chi hi.

²⁰TOUPA’N, “Na thu bang in ka ngaidam hi.

²¹Himahleh kei ka hin bang in TOUPA thupina in lei tengteng a dimsak ding.

²²Aigupta gam leh gamdai a ka thupina leh ka thillamdang hihte mu a, huchi pipi a leng sawmvei tak hon ze-et lailai a, ka thu zuilou lai mi tengteng in;

²³a pipute uh kiang a kichiam a ka chiam huai gam a mu kei hial ding uh. A lak ua kei hon ngaineute mawngmawng in leng a mu sam kei ding uh.

²⁴Ka sikha Kaleb in bel lungsim dang a put a, a honzuih taktak ziak in, amah zaw a va hohna gam ah ka pilut dia, a suante’n huai a luah ding uhi.

²⁵Phaizang a Amalekte leh Kanante teng uh ahihman in Zingchiang in kihei unla, Tuipi San lampi lam gamdai ah lut un” a chi hi.

²⁶TOUPA’N Mosi leh Aron a houpih a,

²⁷“Hiai mi thulimlou omkhawmte, ka tung a phunphunte bang tan ahia ka dohzoh ding? Israel suante phunna, ka tung a a phunnate uh ka za hi.

²⁸A kiang uah, Ka hinna lou in ka gen ahi, ka bilbuk ngei a na gen bang un na tung uah ka hih ding hi.

²⁹Na luang uh gamdai ah a puk dia; na lak ua simsa mi tengteng, kum sawmnih apan a tunglam ka tung a phun teng,

³⁰Banzak hial a, k’on omsak ding, ka chih gam ah Jephunneh tapa Kaleb leh Nun tapa Joshua kia loungal na lut kei ding uh.

³¹Himahleh mat ding lel ahi ding uh, na chih uh na tate uh ka pilut dia, na ngaihneu uh gam a thei ding uhi.

³²Nou bel na luang uh hiai gamdai ah a puk ding hi.

³³Na tate uh gamdai ah kum sawmli sung a vakvai ding ua, gamdai a na luangte uh a mawk man masiah na kizuakna uh amau a thuakloh ding uhi.

³⁴Gam na va etkhiak ni zah uh, ni sawmli, ni khat tang in kum khat zel, kum sawmli sung na tatlekna uh na thuak loh ding ua, huchi in ka thuchiam ka hihlamdan dan na thei ding uhi.

³⁵Kei TOUPA’N migilou omkhawm, kei hon kalh a omkhawmte tung ah hiai ka hih ngei ding ka na chikhinta hi. Hiai gamdai ah a mangthang ding ua. Huai ah a si ding uh” a chi hi.

³⁶Gam enkhe dia Mosi mi sawl hong kiknawnte’n, gam omdan a hoihlou lam a gen un amah tung ah omkhawmte a phunsak hi.

³⁷Huai gam omdan a hoihlou lam a gente ngei TOUPA ma ah hipi in a sita uhi.

³⁸Gam enkhe dia hohte lak a Nun tapa Joshua leh Jephunneh tapa Kaleb bel a si kei uhi.

³⁹Mosi in huai thute Israel suan tengteng a hilh a; huchi in mipite’n nakpitak in a sun uhi.

⁴⁰Huchi in zingsangpi in a thou ua, mualvum ah a hohtou ua, “Ngai in, hiai ah ka hongpai uh. TOUPA’N a hon chiamna mun ah ka hoh ding uh, ka na khialta uhi” a chi uhi.

⁴¹Mosi in, “Tu a bangdia TOUPA thupiak palsat na hi ua? Hiai a lohching kei ding.

⁴²Na kiang ua TOUPA a omlouh ziak in hohtou kei un; melmate thah a na omlouhna ding un, a chi hi.

⁴³Na ma uah Amalekte leh Kanante a om uhi. Namsau a thah na hi phet ding uh. TOUPA na lehngatsan tak ziak un na kiang uah TOUPA a omkei ding” a chi hi.

⁴⁴Himahleh mualvum a hoh a tum ua; himahleh TOUPA thukhun bawm leh Mosi giahphual apan a pawtkhe kei uhi.

⁴⁵Huchi in huai mual a om Amalekte leh Kanante a hong kuansuk ua, a hong dou ua, Hormah tanpha in a satpuk phengphung uhi.