Read Paite Chin NAMBARS 15 Bible Online

NAMBARS 15 - Paite Chin bible

NAMBARS 15

¹Huan, TOUPA’N Mosi a houpih a:

²Israel suante houpih inla, a kiang uah, tenna ding a gam k’on piakna na tun chiang un,

³TOUPA kiang a mei a thillat ahihkeileh haltum thillat ahihkeileh thuchiam tangtun dia kithoihna ahihkeileh noumau ut thu a thillat ahihkeileh Ankuanglui hunbi ahihkeileh ganhon lak ahihkeileh belamhon lak ahihkeileh TOUPA adia gimlim bawl ding a na lat chiang un,

⁴TOUPA kiang a thillat lan mi peuhmah in tangbuang thillat, tangbuang nelte ephah mun sawm a khen, mun khat, sathau hin mun li a khen, mun khat a mek a lat ding ahi.

⁵Dawn thillat dia uain hin mun li a khen, mun khat haltum thillat ahihkeileh kithoihna belamnou khat adia na bawl ding uh ahi.

⁶Belamtal a tangbuang thillat, tangbuang nelte, ephah mun sawm a khen, mun nih, sathau hin mun thum a khen, mun khat mek na bawl ding uh ahi.

⁷Dawn thillat dia TOUPA ading a gimlim ding uain hin mun thum a khen, mun khat na lat ding uh ahi.

⁸Haltum thillat ding ahihkeileh thuchiam tangtun dia kithoihna ahihkeileh TOUPA kiang a lemna thillat a bawngtal na lat chiang un;

⁹Bawngtal lat toh kiton in tangbuang thillat tangbuang nelte ephah mun sawm a khen, mun thum sathau hin kimkhat a mek na lat ding uh ahi.

¹⁰Dawn thillat dia uain hin kimkhat, TOUPA adia gimlim mei a thillat na lat ding uh ahi.

¹¹Huchibang in bawngtal ahihkeileh belampa ahihkeileh belamnou, ahihkeileh kelnou ahi ding ahi.

¹²A tamdan uh dungzui zel in na bawl ding ua, a tamdan uh dungzui zel in na lan ding uhi.

¹³Huai gam a piang tengteng in hichibangzelin TOUPA adia gimlim mei a thillat a lat chiang un a hih ding uhi.

¹⁴Namdang mi na kiang ua tengsa him ahihkeileh kuapeuh na kiang ua teng zelzel ding hiamte’n leng TOUPA adia gimlim mei a thillat lan nuam peuhmah in na hih bang ua a hih sam ding uhi.

¹⁵Na suante uh leh mipite leh namdang na kiang ua omte adia leng dan khat kia a om ding ahi. TOUPA ma ah namdangte noumau bang ahi ding uh.

¹⁶Nou ading leh na kiang ua namdang omte ading in dan khat leh hih dan kibang khat kia a om ding, a chi hi.

¹⁷TOUPA’N Mosi a houpih a:

¹⁸Israel suante houpih inla, a kiang uah, hichi ahi dia, k’on pina ding gam na va tun ua,

¹⁹huai gam tanghou na nek chiang un, TOUPA kiang ah vei thillat na lan ding uh ahi.

²⁰Na tanghou mek masakpen lak ua beu khatvei thillat dia na lat ding uh ahi. Buhphual a vei thillat dia na vei bang un na vei ding uhi.

²¹Na suante uh tan in na tanghou mek masakpen uh TOUPA kiang a vei thillat dia na lat zel ding uh ahi.

²²Hiai thupiak tengteng, TOUPA’N Mosi kiang a a gen, tup mawng hilou a zuih khaklouh na neih uleh,

²³TOUPA’N thu a piak tung apan na suante uh tan adia Mosi zang a thu a piak tengteng chihna ahi.

²⁴Hichi ahi dia, omkhawmte’n theilou a, a hihkhak uh ahihleh, omkhawm tengteng in haltum thillat TOUPA adia gimlim ding in bawngtuai khat a lan ding ua, a dan ngeina bang in tangbuang thillat leh dawn thillat toh, khelhna kithoihna ding in keltal khat leng a lantel ding uh ahi.

²⁵Siampu in Israel suan omkhawm tengteng ading in kilemna a bawlsak dia, ngaihdam ahi ding uh. Theilou a hihkhak a hih ziak leh a thillat uh TOUPA adia mei a thillat leh a hihkhelh uh sik a khelhna kithoihna a lattak ziak un.

²⁶Israel suante omkhawm tengteng ngaihdam ahi ding ua, a lak ua namdang omte leng; mipi tengteng in a hihkhak uh a hih ziak in.

²⁷Min theilou a thil a hihkhelh leh khelhna kithoihna ding in kelnu khat kum khat a upa a lat ding ahi.

²⁸Theilou a TOUPA ma a hihkhialmi ading in siampu in kilemna a bawl ding hi; huchi in ngaihdam ahi ding hi.

²⁹Theilou a hihkhialmi ading in, Israel suante, huai gam a piangte ading leh namdangmi na lak ua omte ading in leng dan khat na neih ding uh ahi.

³⁰Himahleh tup mawng a hihkhial ahihleh, huai gam a piang hiam, namdang hiam leng hitaleh TOUPA gensia ahi a; huai mi a chipihte lak apan satkhiak ding ahi.

³¹TOUPA thu a musit a, a thupiak a bohsiat ziak in, huai mi satkhiak ding ahi, a thulimlouhna mawh aman a paw ding, chi in, a chi hi.

³²Israel suante gamdai a omlai un mi khat Sabbath ni a sing tom a mu uh.

³³A sing tom mumite’n amah Mosi leh Aron leh mipite kiang ah a honpi uhi.

³⁴Bangchi a hih ding ahia chih genkhiak nailouh a hih ziak in tanna in ah a khum uhi.

³⁵TOUPA’N Mosi kiang ah, hiai mi hihlup ngeingei ding ahi, giahphual pua ah mipi tengteng in suang in a deng ding uh, a chi hi.

³⁶Huchi in TOUPA’N Mosi thu a piak bang in mipi tengteng in giahphual pua ah a pi ua, suang in a denglumta uhi.

³⁷TOUPA’N Mosi a houpih a:

³⁸Israel suante kiang ah, a suante uh tanpha a, a puanmong ua a gei bawl ding leh a mong teng gei a a dum khak ding in gen in.

³⁹Huai a mong na et ua, TOUPA thupiak tengteng na theihgige ua na zuihna ding un leh; kizuak a na om zel bang ua na lungtang uh deih leh na mit uh la lam peuh deih a na om louhna ding un.

⁴⁰Ka thupiak tengteng na theihgige ua na zuih ua, na Pathian uh adia na sianthou theihna ding uh ahi.

⁴¹Na Pathian uh hidia Aigupta gam apan nou hon pikhepa TOUPA, na Pathian uh ka hi. Kei TOUPA na Pathian uh ka hi, a chi hi.