Read Paite Chin NAMBARS 16 Bible Online

NAMBARS 16 - Paite Chin bible

NAMBARS 16

¹Levi tapa Kohath, huai tapa Izhar, huai tapa Korah pen Eliab tapate, Dathan leh Abiram leh Peleth tapa On leh Reuben tate’n mite a pi ua;

²Israel suante, mi tallang deuhdeuh mipi lak a heutu vaihawmmi dia telte lak a mi za nih leh sawmnga toh Mosi ma ah a va kisa uhi.

³Mosi leh Aron kalh in a kikhawm ua, a kiang uah, “Na uang lua uh, Na uang lua uh, mipite a siangthou chiat ua, TOUPA a lak uah a om chih mu zenpi a, bangziak a TOUPA mipi omkhawmte tung a kikoih na hi ua?” a chi uh.

⁴Mosi in huai a zak in a mai a leisi in a khupboh hi.

⁵Korah leh a pawlte tengteng kiang ah, “Zingchiang in TOUPA’N amah a te kuate ahi ua? Misiangthoute kuate ahi ua, chih a taklang ding. A kiang ah a hon painai sak ding. Aman a mi tel ngei tan in a kiang nai ah a paisak ding hi.

⁶Hichi in hih un, Korah leh a pawlte tengteng aw, zingchiang in meilaknate tawi unla;

⁷Huai ah mei koih unla, TOUPA ma ah gimlim buak un. TOUPA’N a tel peuhmah a siangthou ding. Levi tapate, na uang lua uh” chi in a gen hi.

⁸Mosi in Korah kiang ah, “Nou Levi tapate aw, ngaikhia unla,

⁹TOUPA biakbuk nasep sem ding leh, khawmpi na sem dia khawmpite ma ading a, amah kiang a hon om naisak dia, Israel Pathian in Israel khawmpite apan nou a hon omsak, nou adia thil neuchik phet a kilang hia?

¹⁰Amah kiang ah a hon om naisakta a, na kiang a na unau Levi tapa tengteng, siamputna leng na zong ua hia?

¹¹Huaiziak in nang leh na pawl tengteng TOUPA kalh in na kikhawm uh ahi. Aron in bang a hih a ahia, a tung a na phun uh?” a chi hi.

¹²Mosi in Eliab tapa Dathan leh Abiram a samsaka; “Amau k’ong paitou kei ding uh.

¹³Gamdai a honthat dia nawitui leh khuaizu luanna gam apan n’on pikhiak thil neuchik ahi hia? Ka tung uah na kilalsak nawn ngal a.

¹⁴Nawitui leh khuaizu luanna gam ah n’on pilut kei a, lou ding leh grephuan gou ding lah n’on pe kei a; hiai mite mitte na mialsak ding maw? Ka hong paitou kei hial ding uh” a chi uh.

¹⁵Huchi in Mosi a heh mahmah a, “TOUPA kiang ah, a thillat uh sang ke’n. A sabiltung uh khat lel leng ka lakei, kuamah ka hihna kei” a chi hi.

¹⁶Mosi in Korah kiang ah, “Zingchiang in nang, na mi kikhawmte leh Aron TOUPA ma ah a na om un.

¹⁷A meilakna uh tawi chiat uhenla, gimlim buak uhen. TOUPA ma ah a meilakna uh hontawi uhenla, meilakna za nih leh sawmnga hontawi uhen. Nang leh Aron in leng na meilakna uh tawituak tuak un” a chi hi.

¹⁸Huchi in michih in a meilakna uh a tawichiat ua, mei a koih ua, gimlim a buak ua, Mosi leh Aron toh Kihoupihna puanin kongkhak ah a va ding uhi.

¹⁹Korah in mipi tengteng a ma ah Kihoupihna puanin kongkhak ah a omkhawm sak a; mipi tengteng kiang ah TOUPA thupina a honglangta hi.

²⁰TOUPA’N Mosi leh Aron a houpih a,

²¹“Hiai mite apan kihui khia un, amau ka hihmang guih theihna ding in” a chi hi.

²²Amau a khupboh ua, “Pathian aw, sa tengteng kha Pathian, mi khat khelh ziak in mipi tengteng tung ah na heh dia hia?” a chi uhi.

²³TOUPA’N Mosi a houpih a,

²⁴“Mipite kiang ah, Korah, Dathan leh Abiram puanbuk apan kihemkhia un” chi in gen in, a chi hi.

²⁵Mosi a thou tou a, Dathan leh Abiram kiang ah a vahoh a; Israelte upate’n a zui uhi.

²⁶Omkhawmte kiang ah, “Hiai migiloute puanin apan pawtkhia un. A bangmah uh khoih kei un, huchilou in zaw a khelhna tengteng uah na pangkha ding uh” chi in a gen hi.

²⁷Huchi in Korah, Dathan leh Abiram puanbuk apan a pawtkhe duamduam ua; Dathan leh Abiram a puanin ua pan a hong pawtkhia ua, a puanin kongkhak uah a zite, a tapate leh a tanu neu chikchikte uh toh ading uhi.

²⁸Mosi in, “Keimah lungsim a pawtkhia ahi kei a, hiai thilhih ding in TOUPA’N a honsawl ahi, chih hiai ah na thei ding uh.

²⁹Hiai mi tengteng dan banglel a a sih ua, mi tengteng gawt banglel a gawt a hih uh leh Pathian in kei hon sawllou ahi ding.

³⁰Himahleh TOUPA’N thil thak a bawl a, lei in a kam a kat a, amau leh amau a tengteng a valh a, Sheol a hing a a lut ule bel hiai mite’n TOUPA a na hehsak uh, chih na thei ding uh” a chi hi.

³¹Hichi ahi a, huai thu tengteng a gen khit in a nuai ua lei a hong khangkham phok hi.

³²Lei in a kam a ka a, a inkuan un Korah mi tengteng, a neih tengteng utoh a valhkhin vekta hi.

³³Huchi in amau leh amau a tengteng Sheol ah hing in a tum vek ua, lei in a kam a chihkhum a, omkhawmte lak apan a mangthangta uhi.

³⁴Huchi in a kim ua Israel tengteng a kikou husa uah a taizak ua, lei in ei leng a honvalh kha ding, a chi uhi.

³⁵TOUPA apan mei a hong pawtkhia a, gimlim lan mi za nih leh sawmnga a hong kanglumta hi.

³⁶TOUPA’N Mosi a houpih a:

³⁷Aron tapa siampu Eleazar kiang ah thu gen inla, aman mei apan meilaknate lakhe ding in hilh in, thil siangthou ahi ngal a.

³⁸A hinna tung mah a hiai mikhialte meilaknate maitam khuhna kuang ding in sek hi uhen, TOUPA ma a lat ahi ngal a. Huaiziak in a siangthou hi, huai Israel suante ading in chiamtehna ahi ding, a chi hi.

³⁹Siampu Eleazar in mi kangte dal meilaknate a la a; maitam khuhna ding in a sekta hi.

⁴⁰Israel suante adia theihgigena hi ding in huchi a Aron tate hilou namdang himhim, TOUPA ma a gimlim hal dia a hongpai nailouhna ding un. Mosi zang a a kiang a TOUPA’Na gen bang a, Korah leh a pawlte bang a hong hihlouhna ding in.

⁴¹Himahleh a zingsang in, TOUPA mite na that uh, chi in Israel suan tengteng Mosi leh Aron tung ah a phun uhi.

⁴²Hichi ahi a, Mosi leh Aron tung a mipi a phunkhawm lai un, Kihoupihna puanin lam a en ua; ngai in, meipi in a honkhuh a, TOUPA thupina a hong kilang hi.

⁴³Mosi leh Aron Kihoupihna puanin kongkhak ah a hoh uhi.

⁴⁴TOUPA’N Mosi a houpih a:

⁴⁵“Hiai mipi lak apan kihemkhia un, amau ka hihmang guih theihna ding in” a chi hi. Amau a mai ua leisi in a khupboh uhi.

⁴⁶Mosi in Aron kiang ah, “Na mei lakna tawi inla, maitam apan mei koih inla; gimlim buak inla, mipi kiang ah paipih meng inla, amau a di’n kilemna bawl in. TOUPA hehna a hongsuak hi; hipi a leng panta” a chi hi.

⁴⁷Aron in Mosi gen bang in a tawi a, omkhawmte lak ah a tailut a, ngai in, huai hipi mipi lak ah a hongleng pan a; gimlim a buak a, mipi ading in kilemna a bawl hi.

⁴⁸Misi leh mihing kikal ah ading a, hipi a khawlta hi.

⁴⁹Huchi in Korah tungtang thu a site simlouh, hipi a si tengteng sing khat leh sang li leh za sagih ahi uh.

⁵⁰Aron Kihoupihna puanin kongkhak a Mosi kiang ah a kiknawn a, huchi in hipi a khawlta hi.