Read Paite Chin NAMBARS 17 Bible Online

NAMBARS 17 - Paite Chin bible

NAMBARS 17

¹Huan, TOUPA’N Mosi a houpih a:

²Israel suante houpih inla, a inkuan chih a tuam ding in chiang khatchiat, a inkuan uh dungzui zel a a intek pen tengteng zah, chiang sawmlehnih la inla; a chiang uah a min uh gelh in.

³Levi chiang ah Aron min gelh inla; a inkuan chih uh ading in chiang khat zel ahi ding ahi.

⁴Kihoupihna puanin thutheihsakna ma ah na koih dia, huai ah i kimu ding.

⁵Hichi ahi ding a, ka tel ding mi chiang a sel ding; huchi in Israel suante na tung a a phunna uh ka daisak ding, a chi hi.

⁶Mosi in Israel suante a houpih a, a intekpen tengteng in amau inkuan chih a tuam ading, intek pen chih in chiang khatzel, chiang sawmlehnih a pia uhi. Huaite lak ah Aron chiang leng a tel sam hi.

⁷Mosi in theihoihna biakbuk ah TOUPA ma ah huai chiangte a koih hi.

⁸A zing in hichi ahi a, Mosi theihpihna puanin ah a va hoh a; ngai in, Levi inkuante adia Aron chiang a na sel a, pakmum a suah a, a pakpalh a, vaisuaklu min a suang hi.

⁹Mosi in TOUPA ma apan chiang tengteng Israel tengteng kiang ah a la khia a; a na en ua, amau chiang chiat a la uhi.

¹⁰TOUPA’N Mosi kiang ah, “Helhat tate ahi uh chih theihsak zelna ding in Aron chiang theihpihna bul ah koih nawn in. Huchi in ka tung a a helna uh na daisak thei ding, a sihlouhna ding un” a chi hi.

¹¹Huchibang in Mosi in TOUPA’N thu a piak bang in a hih hi.

¹²Israel suante’n Mosi kiang ah, “Ngai in, ka si ua, ka mangthang uh, ka vek un ka mangthang uh.

¹³TOUPA biakbuk kiang nai a hongpai peuhmah a si ding uh. Kou leng si in ka mangthang ding u maw?” a chi uhi.