Read Paite Chin NAMBARS 18 Bible Online

NAMBARS 18 - Paite Chin bible

NAMBARS 18

¹Huan, TOUPA’N Aron kiang ah: Nang leh na tapate leh na inkuan un Mun Siangthou tung a khelhna toh kisai mohpuakna na la ding uh ahi. Nang leh na tapate kia in siampu hihna toh kisai thil hihkhelhte a mohpuakna na puak ding uh ahi.

²Na unaute, Levi suante leh na pa inkawte hon tawnpih in, huchi a amau Mun Siangthou tung a khelhna toh kisai a mohpuakna a lak theihna ding un. Nang leh na tapate’n bel siampu hihna toh kisai thil hihkhelhte ah mohpuakna na lak ding uh ahi.

³Nna nasep a honhuh ding ua, puanin nasep tengteng a tang ding ua, himahleh Mun Siangthou tuium-belsuan leh maitam pen honnaih kei uhen, a sihlouhna ding un, amau hiam, nang hiam in leng.

⁴Puanin nasepna tengteng ah kihoupihna puanin na pen a tang ding uh. Nam dangte’n nou a honnaih ding uh ahi kei hi.

⁵Nang Mun Siangthou nasep leh maitam nasep pen na tang ding, Israel suante tung a hehna a om nawnlouhna ding in.

⁶Ngai in, ke’n na unau Levite, Israel suante lak apan ka telkhia a, Kihoupihna puanin ah a sem ding uh. TOUPA’N nang a hon thilthawnpiak ahi uh.

⁷Nang leh na tapate’n maitam leh puanzak sunglam thu ah na siampu nasep uh na sem ding uh. Nang na sem dia; siampu nasep na sep ding in k’on pia hi. Namdang hong kigolh peuhmah thah ahi ding uh, a chi hi.

⁸TOUPA’N Aron a houpih a: Ngai in, Israelte thilsiangthou teng lak a kei adia vei thillat teng leng k’on pia hi. Thaunilh na hih ziak leh na tapate tangtawn dan ding a hih ziak in huaite k’on pia hi.

⁹Mei adia keptuam, thillat siangthoupente nang a ahi ding uh. A thillat teng uh, tangbuang thillat hiam khelhna thillat hiam mawhna thillat hiam tantuan thillat tengteng nang leh na tapate tantuan ahi uh.

¹⁰Mun siangthou pen ah na ne ding ua; pasal teng in a ne ding ua, nou ading in hiai thil siangthou ahi.

¹¹Hiaite kei a tuam ahi. A thilpiak uh tangbuang thillat, Israel suante vei thillat tengteng tan in. Nang, na tapate leh tanute adia tangtawn a na tantuam ding ua ka honpiak ahi. Na inn a mi siang tengteng in a ne thei ding uh.

¹²Sathau hoih pen, grep hoih pen, buh hoih pen leh gah masa pen TOUPA dia a piak teng uh k’on pia hi.

¹³A lou ua gah min masa pen TOUPA adia a hontawi uh nang a ahi dia; na inn a mi siang teng in a ne thei ding uh.

¹⁴Israelte thillat tengteng nang a ahi ding.

¹⁵TOUPA adia a piak uh sul hong masapen peuhmah mihing leng gan leng nang a ahi ding. Himahleh tapa masapen zaw na tan ngeingei dia, gan sianglou nou suak khe masapen leng na tat ding ahi.

¹⁶Kha khat a hih in tat dingte tatna man na seh dan bang in, Mun Siangthou a sekel hihdan bang a sekel nga a na tat ding ahi, sekel pen gerah sawmnih ahi.

¹⁷Himahleh bawng suakkhe masapen hiam, belam suakkhe masapen hiam, kel suakkhe masapen hiam, na tat ding ahi kei; a siangthou uhi. A sisan uh maitam ah na theh dia, TOUPA adia gimlim ding in a thaute mei a thillat in na hal ding ahi

¹⁸A sa uh nang a ahi dia, vei thillat leh a liang taklam pang nang a a hih bang in.

¹⁹Thil siangthou vei thillat, Israel suante’n TOUPA adia a latte uh tangtawn a na tantuam ding un k’on pia hi. TOUPA ma a nang, na tapate leh na tanute adia tangtawn thukhun ahi, a chi hi.

²⁰TOUPA’N Aron kiang ah, A gam uah goutan na neikei dia, a lak uah leng tantuan na neisam kei ding. Israel suante lak a na tantuan leh na goutan, Keimah ka hi.

²¹Ngai in, a nasep, puanin a a sepman ding un, Israel gam a sawm a khat tengteng Levi suante kiang ah ka pia ahi.

²²Tu apan Israel suante’n Kihoupihna puanin a honnaih het louh ding uh ahi; khelhna pua in a si kha ding uh.

²³Himahleh Levite’n bel Kihoupihna puanin nasep a sem ding ua; Israelte khelhna toh kisai mohpuakna a la ding uh. Hiai a suante tan ading in dan ahi dia; Israel suante lak ah goutan a neikei ding uh.

²⁴Israel suante’n sawm a khat TOUPA adia vei thillat a lat uh Levite goutan ding in ka pia hi. Huaiziak in a kiang uah, Israel suante lak ah goutan a neikei ding uh, ka na chita him ahi, a chi hi.

²⁵TOUPA’N Mosi a houpih a,

²⁶Levite houpih inla, a kiang uah, Na goutan ding ua Israel suante sawm a khat k’on piak na lak chiang un, huai sawm a khat apan sawm a khat TOUPA kiang ah vei thillat ding in na lan ding uh ahi.

²⁷Na vei thillat uh buhphual a buh leh uain tung masapen dia sim ahi ding.

²⁸Huchibang in Israel suante lak a sawm a khat na lak tengteng uah leng TOUPA vei thillat ding in na lan zui zel ding uhi, huai TOUPA vei thillat pen siampu Aron na piak ding uh ahi.

²⁹Na thillat tengteng lak ua a hoih pen, a siangthou pen TOUPA vei thillat ding in na lan ding uhi.

³⁰Huaiziak in, a kiang uah, a hoih pen na vei chiang un Levite buhphual a tung leh grep sukna apan tung bang a sim ahi ding.

³¹Koilai peuh ah leng na ne thei ding uh, nou leh na inkuanpihte un leng; Kihoupihna puanin a nasep man uh ahi ngal a.

³²A hoih pen na vei uh leh a khelh mawh na paw kei ding uh. Israel suante thil siangthou na hih thanghuai kei ding ua, na si kei ding uhi, chi in, a chi hi.