Read Paite Chin NAMBARS 19 Bible Online

NAMBARS 19 - Paite Chin bible

NAMBARS 19

¹Huan, TOUPA’N Mosi leh Aron a houpih a:

²Hiai TOUPA thupiak dan ahi. Israel suante bawngla san, dembei, gensiatbei, hakkol bulhsak ngei hetlouh na kiang a honkai ding in hilh un.

³Siampu Eleazar nape dia, aman giahphual pua ah a pikhe dia, a ma ah mi khat in a gou ding hi.

⁴Siampu Eleazar in a khut in a sisan a la dia, Kihoupihna puanin ma ah a sisan sagihvei a theh ding.

⁵Mi khat in huai bawngla a mitmuh in a hal dia; a vun, a sa, a sisan leh a ek a haltum ding hi.

⁶Siampu in sidar sing, hussop leh khausan a la dia, bawngla a hal uah a pailut ding ahi.

⁷Siampu in a puansilhte a sawp dia, a kisil dia, huaikhit in giahphual ah a hoh dia, nitaklam tan in siampu sianglou ahi ding.

⁸A hal mi in a puansilhte a sawp dia, a kisil dia, nitaklam tan in sianglou ahi ding.

⁹Mi siang in bawngla vu a lakhawm dia, giahphual pua a mun siang a ngaih ah a koih dia, Israel suan mipite kisiansakna tui dia zat ding ahi. Hiai khelh siansakna ahi

¹⁰Bawngla vu lakhawm min a puansilhte a sawp dia, nitaklam tan in sianglou ahi ding. Hiai Israel suante leh namdang a kiang ua omte ading in tangtawn dan ding ahi.

¹¹Kuapeuh siluang khoih peuhmah ni sagih sung sianglou ahi ding.

¹²Amah ni thum ni’n a kisiangsak dia, ni sagih ni’n a siang ding. Himahleh, ni thum ni a a kisiansak kei leh ni sagih ni’n leng a siang kei ding hi.

¹³Kuapeuh siluang khoihmi, a kisiansak kei leh TOUPA biakbuk a hihnin ahi. Huai mi Israel mite apan satkhiak ding ahi. Kisiansakna tui a tung a a thehlouh ziak in a siangkei dia, a sianlouhna a tung ah a omlai hi.

¹⁴Puanin a mi a sih leh hiai a dan ding ahi. Puanin a lut peuhmah leh puanin sung a om peuhmahte ni sagih sung sianglou ahi ding uh.

¹⁵Tuium-belsuan kihong, sitlouh peuhmah a sianglou ahi uh.

¹⁶Gamlak a namsau a thah hiam, misiluang hiam, mihing guh hiam, han hiam mi’n a khoih leh ni sagih sung sianglou ahi ding.

¹⁷A siangloute a tuam ding in khelh thoihna vu a la ding ua, bel ah tuikhuk tui toh asung ding uhi.

¹⁸Mi siang in, hussop a la dia, tui ah a diah dia, puanin tung, tuium-belsuan tengteng, huai a ommi tengteng, guh hiam, thah siluang hiam, misiluang hiam, han hiam khoih mite tung ah a theh ding.

¹⁹Mi siang in ni thum ni leh ni sagih ni’n mi sianglou a theh dia, ni sagih ni’n a hihsiang dia; a puansilhte a sawp dia, a kisil dia, nitaklam in a hong siangta ding hi.

²⁰Mi sianglou kisiangsak lou in TOUPA Mun Siangthou a hihnit ziak in huai mi omkhawmte apan satkhiak ding ahi. Kisiansakna tui a thehlouh ahi a, sianglou ahi.

²¹Hiai amau ading in tangtawn dan ding ahi. Kisiansakna tui a theh peuhmah in a puansilhte a sawp dia; a kisiansakna tui khoih peuhmah nitaklam tan in sianglou ahi ding.

²²Mi sianglou in a khoih peuhmah sianglou ahi zel dia; huai khoih mi kuapeuh nitaklam tan in sianglou ahi ding, a chi hi.