Read Paite Chin NAMBARS 2 Bible Online

NAMBARS 2 - Paite Chin bible

NAMBARS 2

¹Huan, TOUPA’N Mosi leh Aron a houpih a:

²Israel suante’n a inkuan chiamtehna uh takchiat in a pawl uh hih dan bang in a puanin uh a kai ding uhi. Kihoupihna puanin nga chiat in a kimvel in a kai ding uhi.

³Ni suahna lam suahlam pang ah a pawl uh tam dan dungzui zel a puanin kai dingte Judah pawlte ahi ding ua; Judah tate lak a lupen ding Aminadab tapa Nashon ahi.

⁴Sima ompawlte tam dan, sing sagih leh sang li leh za guk ahi uh.

⁵Amah zom a puanin kai dingte Issakar chi ahi ding a; Issakar tate lak a lupen ding Zuar tapa Nethaneel ahi.

⁶Sima om, pawlte tam dan sing nga leh sang li leh za li ahi uh.

⁷Zebulun chite, Zebulun tate lak a lupen ding Helon tapa Eliab ahi.

⁸Sima om, a pawlte tam dan, sing nga leh sang sagih leh za li ahi uh.

⁹A pawl uh tam dan bangzel in sim a om Judah inkuante nuai khat leh sing giat leh sang guk leh za li ahi uh. Amaute’n ma a kai zel ding uh.

¹⁰A pawl uh tam dan bangzel in a simlam pang ah Reubente pawl a om ding ua; Reuben tate lak a lupen Sedeur tapa Elizur ahi.

¹¹Sima om, a pawlte tam dan, sing li leh sang guk leh za nga ahi uh.

¹²A zom a dingte Simeon chi ahi ding ua; Simeon tate lak a lupen ding Zurisadai tapa Selumiel ahi.

¹³Sima om, a pawlte tam dan, sing nga leh sang kua leh za thum ahi uh.

¹⁴Huaikhit in Gad chite ahi ding ua, Gad tate lak a lupen ding Reuel tapa Eliasaph ahi.

¹⁵Sima om, a pawlte tam dan, sing li leh sang nga leh za guk leh sawmnga ahi uh.

¹⁶Reubente tam dan nuai khat leh sing nga leh sang khat leh za li leh sawmnga ahi uh, a pawl uh dungzui in. A zom in amau a pawtkhe ding uhi.

¹⁷Kihoupihna puanin ah a kipan khe ding ua, Levite a lai ah a om ding ua, a omna thu zil bangzel in a pawlpawl in a paichiat ding uh.

¹⁸A pawl tam danthu in a tumlam pang ah Ephraimte a om ding ua, Ephraim tate lak a lupen ding Amihud tapa Eliasam ahi.

¹⁹Sima om, a pawlte tam dan, sing li leh za nga ahi uh.

²⁰A zom in Manasseh chi ahi ding a; Manasseh tate lak a lupen ding Pedazur tapa Gamaliel ahi.

²¹Sima om, a pawlte tam dan, sing thum leh sang nih leh za nih ahi uh.

²²A zom nawn in Benjamin chite, Benjamin tate lak a lupen ding Gideoni tapa Abidan ahi.

²³Sima om, a pawlte tam dan, sing thum leh sang nga leh za li ahi uh.

²⁴Ephraimte tam dan nuai khat leh sang giat leh za khat ahi. A zom nawn in a paikhe ding uhi.

²⁵A pawl uh tam dan bangzel in Dante a mallam pang ah a om ding ua; Dan tate lak a lupen ding Amisadai tapa Ahiezer ahi.

²⁶Sima om, a pawlte tam dan, sing guk leh sang nih leh za sagih ahi uh.

²⁷A zom a puanin kai dingte Asher chi ahi ding a; Asher tate lak a lupen ding Okran tapa Pagiel ahi.

²⁸Sima om, a pawlte tam dan, sing li leh sang khat leh za nga ahi uh.

²⁹A zom nawn in Naphtali chite; Naphtali tate lak a lupen ding Enan tapa Ahira ahi.

³⁰Sima om, a pawlte tam dan, sing nga leh sang thum leh za li ahi uh.

³¹Dante tam dan nuai khat leh sing nga leh sang sagih leh za guk ahi ua; amau a pawlpawl a pawtkhia in a nanung pen ahi ding uhi.

³²Hiai Israel suante inkuan teng a mi a simte uh, tam dan ahi a, nuai guk leh sang thum leh za nga leh sawmnga a pha uhi.

³³Levite Israel suante lak a sim tel ahi kei uhi, TOUPA’N Mosi thu a piak bang in.

³⁴Huchibang in Israel suante’n a hih ua; TOUPA’N Mosi thu a piak bangzel in a pawlpawl in puanin a kai uhi. Huchi mah bang in a chichi in, a inkuan kuan zel un a kipan khe zel uhi.