Read Paite Chin NAMBARS 20 Bible Online

NAMBARS 20 - Paite Chin bible

NAMBARS 20

¹Huan Israel suan omkhawm tengteng huai kha khatna in Jin gamdai a lut ua; mipite’n Kadesh ah giahphual a sat ua; huai ah Miriam a si a, huai ah a vui uhi.

²Omkhawmte ading in tui a omkei a; Mosi leh Aron kalh in a kikhawm uh.

³Mite’n “TOUPA ma a i unaute a sihlai un Pathian in honthat geih mai leh aw!

⁴Bangdia TOUPA mipite sidia gamdai a pilut na hia, kou leh ka gante utoh?

⁵Bangziak in ahia hiai gam hoihloupi a hon pilut dia Aigupta gam apan n’on pawt khiak sak mahmah? Buh leh balte, theipite, grepkungte, theibuhfaite omlouhna mun ahi, tui dawn ding mahmah leng a omsam kei hi” a chi uhi.

⁶Huchi in Mosi leh Aron mipi apan Kihoupihna puanin kongkhak ah a hoh ua, a khupboh ua; TOUPA thupina a kiang uah a hong kilang hi.

⁷TOUPA’N Mosi a houpih a,

⁸“Chiang la inla, mipite omkhawm sak inla, nang leh na unaupa Aron toh, huai suangpi in a mitmuh ua tui pawtsak ding in thupia in. Suangpi apan tui na lakkhiak sak dia, mite leh a gante uh na dawnsak ding ahi” a chi hi.

⁹Mosi in TOUPA ma apan chiang, a thupiak bang in a la hi.

¹⁰Mosi leh Aron in mipite suangpi bul ah a omkhawm sak ua, Mosi in a kiang uah, “Nou mihelte aw, ngai un, hiai suangpi apan tui k’on lak khiaksak ding ua hia?” a chi uhi.

¹¹Mosi in a ban a zak a, suangpi a chiang in nihvei a sat a; huchi in tui tamtak a hongpawt a, mipite leh a gante un a dawn uhi.

¹²TOUPA’N Mosi leh Aron kiang ah, “N’on gintak louh ua, Israel suante mitmuh a n’on pahtawi louh ziak un hiai omkhawmte ka piak gam ah na pilut kei ding uh” a chi hi.

¹³Hiai Meribah tui ahi. Israel suante’n TOUPA a kinakpih ua, huai ah amau a Amah pahtawi a a om ziak in.

¹⁴Mosi in Kadesh apan Edom kumpipa kiang ah mi a sawl a, “Na unaupa Israel in hichi in a chi, Ka tung ua thuakna hongtung tengteng na thei hi.

¹⁵Ka pipute uh Aigupta gam ah a hohsuk ua, sawtpi Aigupta gam a ka om uh, Aigupta mite’n kou leh ka pipute hoihlou tak in honbawl uh.

¹⁶Huchi in TOUPA ka sam ua, ka aw uh a naza a, angel a honsawl a, Aigupta gam apan a hon pikhia a, ngai in, na gam naih pen khua Kadesh ah ka om uhi.

¹⁷Hehpih in na gam ka tawn paisuak ding uh aw. Lou hiam, grephuan hiam ka tawn kei ding ua, tuileh tuite leng ka dawn kei ding uh. Kumpipa lamlian ah ka pai ding ua, na gam ka khen masiah uh taklam hiam, veilam hiam ah ka pial kei ding uh” a chi hi.

¹⁸Edom in a kiang ah, “N’on palsuak ding ahi kei. N’on pal leh hondou ding in namsau toh ka hong kuan ding” a chi hi.

¹⁹Israel suante’n a kiang ah, “Lamlian ah ka paitou ding ua; kou leh ka gan un na tui ka dawn uh leh aman k’on pe ding uh. Thil dang bangmah hihlou in a pai in ka paisuak mai ding uh” a chi uhi.

²⁰Aman, “Paisuak lou ding” a chi hi. Huchi in Edom mipite tampi leh mihat taktakte toh amau dou ding in a hong kuanta uhi

²¹Hiai bang in Edom in Israel mite a gam a a paisuak uh a phal kei a, Israel mite’n a kiksan nawnta uhi.

²²Huchi in Kadesh apan a pawt ua; Israel suan mipi tengteng Hor tang a hongtung uh.

²³TOUPA’N Mosi leh Aron, Edom gam naih Hor tang ah a houpih a,

²⁴“Aron a chipihte kiang a pi ahi ding. Meribah tui a ka thu kalh a, a hel ziak in Israel suante ka piak gam ah a lut kei ding.

²⁵Aron leh a tapa Eleazar Hor tang ah honpi tou in.

²⁶Aron puansilhte suah sak inla, a tapa Eleazar silhsak in. Aron a chipihte kiang a pi ahi ding, huai ah a si ding” a chi hi.

²⁷Mosi in TOUPA thupiak bang in a hih a; mipi tengteng mit muh in Hor tang ah a paitou uhi.

²⁸Huchi in Mosi in Aron puansilh a suahsak a, Eleazar a silh sak hi. Aron mual vum ah a sita a, Mosi leh Eleazar mual vum apan a hong paikhe suk uhi.

²⁹Mipi tengteng in Aron a si chih a theih un, Israel tengteng in ni sawmthum a sun uhi.