Read Paite Chin NAMBARS 21 Bible Online

NAMBARS 21 - Paite Chin bible

NAMBARS 21

¹Huan, Kananmi, Arad Kumpipa simlam a om in Israel mite Atharim lampi ah a hongpai uh chi a kigen ging a naza a; huchi in Israel mite a dou a, galmat khenkhat a nei hi.

²Israel mite’n TOUPA kiang ah thu a chiam ua, “Hiai mite ka khut ua na honpiak leh a khuate uh ka hihmang ding uh” a chi uh.

³TOUPA’N Israel mite thu a pom a, a kiang uah Kanan mite a pia a, amau leh a khuate a hihmang uhi. Huai mun min Hormah a sa uhi.

⁴Hor tang apan Tuipi San lam ah Edom gam kualkhum in a pai ua; a lampi ziak in mipi a lunglel mahmah uhi.

⁵Mipite’n Pathian leh Mosi kalh in, “Gamdai a si dia bang ding a Aigupta apan honpi khia na hia? Tanghou lah omlou, tui lah omlou. Hiai tanghou kihhuai lah ka hinna un a kih hi” a chi uh.

⁶Huchi in TOUPA’N mipi lak ah gul gukhahte a sawl a, mite a tu ua, Israel mite tampi a si uhi.

⁷Huaiziak in, mite Mosi kiang ah a hongpai ua, “TOUPA leh nang kalh a ka na pau uh ka khialta uhi, i lak ua gulte lamang ding in TOUPA kiang ah thum dihve” a chi uhi. Huchi in mite ading in Mosi a thum hi.

⁸TOUPA’N Mosi kiang ah, “Gul gukhah lim bawl inla, khuam lek ah khai in. Hichi ahi ding a, gultuk mi peuhmah in huai a et uleh a dam ding uh” a chi hi.

⁹Huchi in Mosi in dalgul a bawl a, khuam lek ah a khai a; hichi ahi a, gul tuk mi peuhmah in huai dal gul a et uleh a dam uhi.

¹⁰Israel suante a pai zel ua, Oboth ah giahphual a sat uh.

¹¹Oboth apan a pai nawn ua, ni suahna lam Moab gamdai bul Ije abarim ah giahphual a sat uh.

¹²Huai apan a pai nawn ua, Zered guam ah giahphual a sat uh.

¹³Huai apan a pai nawn ua, Amorte gamgi apan hong dawktuam gamdai a Arnon lehlam ah giahphual a sat uh. Arnon bel Moab gamgi, Moab leh Amorte kikal a om ahi.

¹⁴Huaiziak in, TOUPA kidounate laibu ah, Tuipi San leh Arnon luitate a;

¹⁵Ar tenna a luangkhia luite leh Moab gamgi a omte ah a thilhihte, a chih.

¹⁶Huai apan Beer ah a pai nawn ua; huai bel TOUPA’N Mosi kiang a mipite samkhawm inla, tui ka pe ding, a chihna tuileh ahi.

¹⁷Huchi in Israelte’n hiai la a sa uh. “Aw tuikhuk, hong kikhoh khia inla, a thu la in sa un.

¹⁸Dan petu in a kawkmuh bang a miliante uleh mipite heutute’n a khetbuk u toh a laih uh tuikhuk” chi in. Huchi in gamdai apan Mattanah tan;

¹⁹Mattanah apan Nahaliel ah; Nahaliel apan Bamoth ah;

²⁰Bamoth apan Moab lou a guam leh gamdai sun suk Jeshimon lam nga Pisgah vum ah a pai uhi.

²¹Israel mite’n Amorte kumpipa Sihon kiang ah mi a sawl ua,

²²“Na gam ah hon paisuaksak ve; lou ah hiam, grephuan ah hiam ka pial kei ding ua; tuileh tuite ka dawn kei ding uh. Na gam ka khen masiah uh kumpipa lamlian ah ka pai zel ding uhi” chi in.

²³Himahleh Sihon in Israel mite a gam a a paisuak uh a phalkei hi. Sihon in a mite tengteng a kaikhawm vek a, Israel mite dou ding in gamdai ah a kisa zawta hi. Jahaz a va tung ua; huai ah Israel mite a dou uh.

²⁴Israel mite’n namsau in amah a that ua, a gam Arnon apan Jabok tan in, Ammon suante tan in a lazou uhi. Ammon suante gamgi kulh nei a hih ziak in a gam chianglel a lazou uhi.

²⁵Israel mite’n huai khua tengteng a la ua; Israel mite’n Amorte khua tengteng a luah uhi. Heshbon leh a khopel tengteng ah leng a teng uhi.

²⁶Heshbon khua bel Amorte kumpipa Sihon khua ahi. Amah huai ma a Moab kumpipa a sual a a khut apan gam tengteng, Arnon tan a laksakpa ahi.

²⁷Huaiziak in, paunak gente’n, “Heshbon ah hongpai in, kilamthak hen, Sihon khopi kilamthak hen, a chi uhi.

²⁸Heshbon apan mei a hongpawt a, Sihon khopi apan meikuang. Moab a Ar a kangkhin a, Arnon a munsang a toupate toh.

²⁹Aw, Moab, Na tung a gik hi. Na mangthangta, Aw Kemosh mi! Aman Amorte kumpipa Sihon kiang ah tapate galtaite bang in leh a tanute saltangte bang in a pia hi.

³⁰Himahleh amau ka kap ua, Dibon tan in Heshbon a mangthangta. Huchi in Nophah tan in ka hihmang uh, huai in Medeba tan a pha hi.”

³¹Huchibang in, Amorte gam ah Israel mite a teng uhi.

³²Mosi in Jazer enkhe ding in mi a sawl a, a khuate a la ua, huai a teng Amorte a hawlkhia uhi.

³³A kiknawn ua, Bashan lampi ah a paitou uh. Bashan kumpipa Og, amau dou ding in, amah leh a mite tengteng, Edre-i ah a kisa khia uhi.

³⁴TOUPA’N Mosi kiang ah, “Amah lau ken. Amah, a mite tengteng leh a gam na khut ah k’on pekhinta hi. Heshbon a om Amorte kumpipa Sihon tung a na hih bang in na hih ding ahi” a chi hi.

³⁵Huchi in amah leh tapate hawi himhim neilou in a mite tengteng toh a that ua; a gam a luahsakta uhi.