Read Paite Chin NAMBARS 22 Bible Online

NAMBARS 22 - Paite Chin bible

NAMBARS 22

¹Huan, Israel suante a pai zel ua, Jeriko zawn Jordan gal a Moab phaizang ah giahphual a sat uhi.

²Jippor tapa Balak in Israel mite’n Amorte a bawldan tengteng uh a na thei hi.

³Moabte’n mite a lau mahmah ua, a tam ngal ua. Israel suante ziak in Moabte a lungkham uhi.

⁴Moabte’n Midian upate kiang ah, “Hiai mipite’n bawng in loupa a nekgaih bang in i kim ua mi tengteng a negai ding uh” a chi uhi. Huailai in Jippor tapa Balak Moab kumpipa ahi.

⁵Huaiziak in Beor tapa Balaam, Pethor a om kiang ah mi a sawl hi. Huai bel a mite suante gam a lui kiang a om ahi. Amah a va sam ua, “Ngai in, Aigupta gam apan hong paikhia mipi a om ua; ngai in, lei tengteng a tuamdim ua, ka kiang chin ah a om uhi.

⁶Hehpih in hongpai inla, hiai mite hong hamsiat dihve. Kei ading in a hat lua ua, ka zoh theih ua ka gam apan ka delhkhiak theih zenzen khak uleh. Na vualzawl peuhmah vualzawl in a om a, na hamsiat peuhmah hamsiat in a om, chih ka thei” a va chisak hi.

⁷Huchi in Moab upate leh Midian upate aisanna ding tawi in a pawtkhia ua; Balaam kiang a va tung ua, Balak thukhah a hilh uhi.

⁸Aman a kiang uah, “Tu zan hiai ah giak unla, TOUPA’N honhilh bangbang thu na kiang ua ka hontun ding,” a chi hi. Huchi in Moab miliante Balaam kiang ah a giakta uhi.

⁹Balaam kiang ah Pathian a hong a, Na kiang a mite kuate ahi ua? a chi hi.

¹⁰Balaam in Pathian kiang ah, “Jippor tapa Moab kumpipa Balak in ka kiang ah,

¹¹Ngai in, Aigupta gam apan a hongpai mipite’n lei tengteng a luahdim uh. Hongpai inla, hong hamsiat in, ka zoh theih a, ka delh khiak theih khak leh’ ” chi in mi a honsawl hi, a chi.

¹²Pathian in Balaam kiang ah, “A kiang ua na hoh ding ahi kei. Huai mite na hamsiat ding ahi kei; mi hampha ahi uh” a chi hi.

¹³Balaam zingsang in a thou a, Balak miliante kiang ah, “Na gam uah pai nawnta un. TOUPA’N na kiang ua hoh dia ka pawt a phal kei” a chi hi.

¹⁴Huchi in Moab miliante a thou ua, Balak kiang ah a pai ua, “Balaam in a honzui utkei” a chi uhi.

¹⁵Balak in milian tamsem, a sang ua zahtakhuai zaw a sawlnawn hi.

¹⁶Balaam kiang a va tung ua, a kiang ah, “Jippor tapa Balak in hichi in a chi, ‘Ka kiang a na honghoh ding bangmah in dal kei hen.

¹⁷Mi thupitak in k’on bawl dia, ka kiang a na gen peuhmah ka hih zel ding. Huaiziak in, hongpai teitei inla, hiai mite hong hamsiat sak mahmah mai in’ ” a chi uhi.

¹⁸Balaam in Balak mite a dawng a, a kiang uah, “Balak in a inn dim dangka leh dangkaeng honpe ding himahleh, a bangmah TOUPA ka Pathian thu pel in ka hih theikei.

¹⁹Huaiziak in, TOUPA’N ka kiang ah bangchi’n ahia a gen nawn ding, tu zan hiai lai ah giak peuhmah phot un” a chi hi.

²⁰Zan in Balaam kiang ah Pathian a hong a, a kiang ah, “Hiai mite nang hong sam a hong a hih uleh, thou inla, a kiang uah hoh in. Himahleh na kiang a ka gen kia na hih ding ahi” a chi hi.

²¹Huchi in zingsang in Balaam a thou a, a sabiltung tung ah tutphah a phah a, Moab miliante a zuita hi.

²²A hoh ziak in Pathian a heh mahmah a, amah a na lamdal ding in TOUPA angel lampi ah a na ding hi. A sabiltung tung a tuang ahi a, a sikhate nih leng a kiang ah a om uhi.

²³Sabiltung in TOUPA angel, namsau tawi a lampi ading a mu hi. Huchi in sabiltung lampi apan a pialkhia a, gamlak ah a pai a, Balaam in sabiltung lampi a kiksak tum in a sat hi.

²⁴TOUPA angel grephuan umna kikal kuak ah ading hi.

²⁵Sabiltung in TOUPA angel a mu a, grephuan umna a vangai a, Balaam khe dai umna toh a nehden hi. Balaam in a sabiltung a satnawn hi.

²⁶TOUPA angel a pam deuh ah a pai a, mun kawchik laitak, taklam hiam, veilam hiam a leng pialna om louhna laitak ah ading hi.

²⁷Sabiltung in TOUPA angel a mu a, Balaam a kualpihta hi. Balaam a heh mahmah a, a chiang in sabiltung a sat hi.

²⁸TOUPA’N sabiltung a pausak a, Balaam kiang ah, “Bang k’on chih a ahia? Thumvei tak n’on huchi sat?” a chi hi.

²⁹Balaam in sabiltung kiang ah, “N’on simmawh ziak in ahi. Namsau tawi hileng, k’on that khinta hial ding” a chi hi.

³⁰Sabiltung in Balaam kiang ah, “Tu tan a na tuanna gige na sabiltung ka hi ka hia? Hichibang in k’on hih ngei ahia?” a chi hi. Aman, “Hih ngeilou e” a chi hi.

³¹TOUPA’N Balaam mit a vaksak a, TOUPA angel namsau tawi a lampi ading a muta a; a kuna, a mai a leisi in a khupboh hi.

³²TOUPA angel in a kiang ah, “Bang achia hichibang a na sabiltung thumvei sat na hia? Ngai in, na gamtatdan ka mitmuh a a siat ziak in hon na lamdal dia hong pawtkhia ka hi.

³³Sabiltung in a honmu a, ka ma a thumvei pial ahi. Pial kei leh amah that lou a, nang hon thatkhin ding ka hi” a chi hi.

³⁴Balaam in TOUPA angel kiang ah, “Ka na khialta hi. Hon na lamdal ding in lampi ah na ding chih ka theikei hi” a chi hi.

³⁵TOUPA angel in Balaam kiang ah, “Hiai mite kiang ah hoh inla; himahleh na kiang a ka thugen ding kia na gen ding ahi” a chi hi. Huchi in Balaam in Balak miliante a zuita hi.

³⁶Balak in Balaam a hong chih a zak in Arnon lam a gamgi chiang ah Moab khopi pha in a vadawna, huai bel gamgi tawpna ahi.

³⁷Balak in Balaam kiang ah, “Phatuamngai tak a nang hong sam dia mi k’on sawl ahi kei maw? Bangdia ka kiang a hong nuam lou na hia? Mi thupitak in k’on bawl thei ka hia?” a chi hi.

³⁸Balaam in Balak kiang ah, “Ngai in, ka honghi. Bangmah gen theihna mawngmawng ka nei ahia? Pathian in ka kam a thu a koih kia ka gen ding” a chi hi.

³⁹Huchi in Balaam Balak kiang ah a hohta a, Kiriath huzot a vatung uhi.

⁴⁰Balak in bawng leh belam a lan a, khenkhat Balaam leh a kiang a om miliante kiang ah a khak hi.

⁴¹Hichi ahi a, a zingsang in Balak in Balaam a pi a, Baal mun sangte ah a hohtouhpih a, huai apan mite omna chiang a mupha hi.