Read Paite Chin NAMBARS 23 Bible Online

NAMBARS 23 - Paite Chin bible

NAMBARS 23

¹Balaam in Balak kiang ah, “Hiai ah maitam sagih hon bawlsak inla, bawngtal sagih leh belampa sagih hon suktuah sak in” a chi hi.

²Balak in Balaam gen bang in a hih a; Balak leh Balaam in maitam chin ah bawngtal khat leh belam khat a lan uhi.

³Balaam in Balak kiang ah, “Na haltum thillat bul ah a na ding gige inla, kei ka va paituam ding. Kei hon houpih ding in TOUPA a hongpai kha thei hi. Aman a honhilh peuhmah k’on hilh ding” a chi hi.

⁴Huchi in mual giau velvul ah a hohtou hi. Pathian in Balaam a na kituahpih hi. Balaam in a kiang ah, “Maitam sagih ka bawlkhin a; maitam chih ah bawngtal khat leh belampa khat ka lan chiat” a chi hi.

⁵TOUPA’N Balaam kam ah thu a koih a, “Balak kiang ah kiknawn inla, vagen sawn in” a chi hi.

⁶Huchi in a kiang ah a kiknawnta a; ngai in, a haltum thillat bul ah amah leh Moab milian tengteng leng a na ding lai uhi.

⁷Aman thu a genta a, “Aram apan Balak in a honpi a, Suahlam tang a Moab kumpipa’n, ‘Hong inla, Jakobte hon hamsiat sak in, hong inla, Israelte hong dalsak in!’ a chi a.

⁸Bangchi’n Pathian hamsiat louh ka hamsiat dia? Bangchi’n Pathian dal louh ka dal dia?

⁹Amau lah suangpi tung apan ka mu ngal a, tangte apan amau ka mu a, ngai in, mite a tuam in a teng ding ua, namte lak a sim tellouh ding ahi uh.

¹⁰Jakobte leivui kua’n a simthei dia, Israelte mun li a khen, mun khat kua’n ahia simthei ding? Mi diktat sih in si sam ning, ka tawpna amah a bang hi hen!” a chi hi.

¹¹Balaam kiang ah Balak in, “N’on bawldan bangchidan ahia? Ka melmate hamsiat ding in ka honpi a, na vualzawl zaw mawk ngal a!” a chi hi.

¹²Aman a dawng a, “TOUPA’N ka kam a a koih ka gen ding mah hilou ding maw?” a chi hi.

¹³Balak in a kiang ah, “Mun dang ah hohnawn dih ni e, huai apan na thei vek ding. A omna chiang uh na mu ding, avek un zaw na mu vek khol kei ding. Huai apan hon hamsiat sak in” a chi hi.

¹⁴Huchi in Zophimte tenna Pisgah vum ah a pitou a, maitam sagih a doh a, maitam chih ah bawngpa khat leh belampa khat a lan hi.

¹⁵Balak kiang ah, “Pam a TOUPA ka va houpih sung in na haltum thillat bul ah a na ding lai in” a chi hi.

¹⁶TOUPA’N Balaam a na kituahpiha, a kam ah thu a koih a, “Balak kiang ah kiknawnta inla, a kiang ah, va gensawn in” a chi hi.

¹⁷A kiang ah a va hoh a, ngai in, a haltum thillat bul ah a na ding nilouh hi. Moab miliante leng a kiang ah a om uh. Balak in a kiang ah, “TOUPA’N bang a na gen a?” a chi hi.

¹⁸Aman thu a genta hi: “Thou inla, Balak, ngaikhia in. Jippor tapa, ka thu ngai in.

¹⁹Pathian zaw Zuauhat mihing ahi kei. Kisik hat mihing tapa leng ahi sam kei. A gensa ahihkei dia hia? A na gensa a hih piching kei dia hia?

²⁰Ngai in, vualzawl ding in thupiak ka mu a, aman a vualzawl khin a, ken ka hih lamdang theikei.

²¹Jakobte ah thulimlouhna a mu kei a, Israelte ah phengphitna a mu sam kei. TOUPA a Pathian uh a kiang uah a om a, a lak uah kumpipa kikou husa a om hi.

²²Aigupta apan Pathian in a pikhia a, gam bawngtal tha bang a nei uhi.

²³Jakobte tung ah bumhaina a omkei a; Israelte tung ah leng khimhaina a omsam kei hi. Jakobte leh Israelte kiang ah Pathian thilhih hihlat ahi!

²⁴Ngai in, mipite humpinelkai lian bang in a thou ua, humpinelkai dawng bang in a ding tou ua; a sa mat uh a nek ma un a kual kei ding uh, a mat uh sisan a dawn ma un” a chi hi.

²⁵Balak in Balaam kiang ah, “Hamsiat kenla, vualzawl leng Vualzawl het ken” a chi hi.

²⁶Himahleh Balaam in a dawng a, Balak kiang ah, “TOUPA’N a gen tengteng ka hih ngeingei ding ahi chi in k’on hilhkhin ahi kei maw?” a chi hi.

²⁷Balak in Balaam kiang ah, “Hong dih, mun dang ah konpi nawn dia, huai apan n’on hamsiat sak Pathian in a phal kha zenzen hiam” a chi hi.

²⁸Huchi in Balak in Balaam Jeshimon lam nga, Peor vum ah a pitouta hi.

²⁹Balaam in Balak kiang ah, “Hiai ah maitam sagih hon bawlsak inla, bawngpa sagih leh belampa sagih hon suktuah sak in” a chi hi.

³⁰Balak in Balaam gen bang in a hih a, maitam chih ah bawngpa khat leh belampa khat a lan hi.