Read Paite Chin NAMBARS 24 Bible Online

NAMBARS 24 - Paite Chin bible

NAMBARS 24

¹Israelte vualzawl ding TOUPA deihlam ahi chih Balaam in a theih in nidang a a hihbang in bumna zat tumlou in gamdai lam a nga zawta hi.

²Balaam a vandak a, Israel mite a nam dungzui zel a om a mu a; Pathian Kha a tung ah a hongtung hi.

³Huchi in hiai thu a gen a, “Beor tapa Balaam in a gen a, a mit a kichian tak a mupa’n a gen hi.

⁴Pathian thute za a, Bangkim hihtheipa kilakna mu a khup a puk a, a mitte hong vakpa in a gen hi.

⁵Jakob aw, na puaninte hoih hina e, Israel aw, na biakbukte uh!

⁶Phaizang bang in a kiphah a, luidung a huante bang in, TOUPA suan tawsaw bang in, luidung a sidar singte bang ahi uh.

⁷A baltinte apan tui a sungkhe dia, a haichi tui tampite ah a om dia, a kumpipa Agag sang in a sangzaw dia, a lalgam tawisang in a om ding hi.

⁸Aigupta apan Pathian in a pikhia a, gam bawngtal hatna bang a nei a, A melma uh namdangte a negai dia, a guhte uh a tansak dia, a thaltangte in a kap pailet ding hi.

⁹A kun a, humpinelkai bang in a kual a, humpinelkai bang mai in; kua’n a tokthou dia? Hon vualzawl peuhmah vualzawl in om uhenla, hon hamsiat peuhmah hamsiat in om hen” a chi hi.

¹⁰Balaam tung ah Balak a heh mahmah a; a khutte nuaituah in Balak in Balaam kiang ah, “Ka melmate hamsiat ding in k’on sam a, tuin, thumvei tak amau na vualzawlta.

¹¹Huaiziak in, na mun ah taimang in. Thupitak a hon tawisang ding k’on chih na hi a; himahleh, ngai in, TOUPA’N nang k’on tawisang ding a dal” a chi hi.

¹²Balaam in Balak kiang ah, “Na misawlte kiang ah ka genkei maw?

¹³‘Balak in a inn dangka leh dangkaeng a dim honpe ding himahleh, a hoih lam hiam, a selam hiam TOUPA thu khen lam ah keimah lungsim a suak in bangmah ka hih theikei. TOUPA’N a gen peuhmah ka gen ding,’ chi in.

¹⁴Ngai in, ka mite kiang ah ka paita ding. Huaiziak in, honghoh in, tunung a na mite tung a hiai mite’n a hih ding uh k’on hilh ding,” a chi hi.

¹⁵Hiai thu a gen a, Beor tapa Balaam mitvak tak a mu in a gen hi.

¹⁶“Pathian thute za a, Tungnung Pen theihna thei, Bangkim hihthei kilakna mu, a khup a puk a mit hongvakta in;

¹⁷Amah ka mu, himahleh tuin hilou in; Amah ka en a, naichik ah hilou in. Jakob apan aksi khat a hongsuak khe dia, Israel apan lalchiang a hong dingkhe dia, Moab gam nawlte a dou dia, Seth tate a hihse ding hi.

¹⁸A melma Edom leh Seirte lakzoh in a om ding ua; Israel in hattak in a hih ding hi.

¹⁹Jakob apan ukmi khat a hong paikhe dia, khopi a omsunte a hihmang ding” a chi hi.

²⁰Amalek lam a nga a, thu a gen a, Amalek bel nambul pen ahi na a, a dawn lam tangtawn a manthatna ahi, a chi hi.

²¹Kente lam a nga a, thu a gen a, Na tenna mun a kip a, suangpi ah na bu na sep hi.

²²Asshurte’n sal a a hon pimang masiah, hih manthat in na om ding uh, a chi hi.

²³Thu a gennawn a, Pathian in hiai a hih, kua a hing zou dia?

²⁴Himahleh Kittim gam apan longte a hongtung ding ua, Asshur a hihgim dia, Eber a hihgim ding ua, Amah leng a mangthang ding” a chi hi.

²⁵Huchi in Balaam ading khia a, a khua ah a paita. Huchi in Balak leng a paisamta hi.