Read Paite Chin NAMBARS 25 Bible Online

NAMBARS 25 - Paite Chin bible

NAMBARS 25

¹Huan, Shittim a Israelte a tam sung un, pasalte’n Moab numeite a luppih uhi.

²A pathiante uh ma a kithoihnate ah a chial ua; huchi in a ne ua, a pathiante ma ah a kun uhi.

³Israelte’n Peor Baal a besamta uhi. Huchi in Israelte tung ah TOUPA hehna a kuangta hi.

⁴TOUPA’N Mosi kiang ah, “Mipite heutu tengteng pi inla, TOUPA hehna lauhuai takmai Israelte tung apan a ki khinmang theihna ding in sun khovak ah amaute that in” a chi hi.

⁵Mosi in Israelte vaihawmmite kiang ah, “Peor Baal biakna a tel peuh mahte that vek un” a chi hi.

⁶Ngai in, puanin kongkhak a mite kapa, a om laitak un, Mosi leh Israel omkhawmte mitmuh in Israel mi khat in Midian numei khat a unaute kiang ah a honpi hi.

⁷Siampu Aron tapa Eleazar tapa Phinehas in a muhtak in omkhawmte apan a thou a, teipi khat a lata hi.

⁸Israel mi a puanin sung ah a delhluta, Israel mi toh a nih un a sun paileta, numei pen a gil ah a sun pailet hi. Huchi in Israel suante tung a hipi a daita hi.

⁹Himahleh huai hipi a site sing nih leh sang li ahi uh.

¹⁰TOUPA’N Mosi a houpih a,

¹¹“Siampu Aron tapa Eleazar tapa Phinehas in a lak ua kei adia phatuam a ngaih ziak in Israel suante apan ka hehna a heimang a, huchi in ka thikthusiat ziak in Israel suante ka hih mangthang kei hi.

¹²Huaiziak in, Ngai in, ka lemna thukhun amah ka pe ding hi.

¹³Amah leh a nung a a suante ading in tangtawn siamputna thukhun ahi dia; a Pathian adia phatuam ngai a Israel suante adia kilemna a bawlsak ziak in, chi in gen in” a chi hi.

¹⁴Midian numei toh a thah uh Israel mi min Jimri ahi a, amah Simeonte lak a inkuan a intek pen Salu tapa ahi.

¹⁵A thah uh Midian numei min Kozbi ahi. Amah Zur tanu ahi a, Midiante inkuan lak a heutu ahi.

¹⁶TOUPA’N Mosi a houpih a,

¹⁷“Midiante hih lungzing unla, that un.

¹⁸Amau Peor tungtang thu leh a unaunu uh Midiante heutu tanu Kozbi toh kisai a noute a hon khemlai un, melma bang a honsai uh ahi. Peor ziak a hipi a hongtun in Kozbi thah a om ahi” a chi hi.