Read Paite Chin NAMBARS 27 Bible Online

NAMBARS 27 - Paite Chin bible

NAMBARS 27

¹Joseph tapa Manasseh suan a Manasseh tapa Makir, huai mi tapa Gilead, huai mi tapa Hepher tapa Jelophehad tanute a hongpai ua, a tanute min, Mahlah, Noah, Hoglah, Milkah leh Tirzah ahi uh.

²Kihoupihna puanin kongkhak ah Mosi, siampu Eleazar leh miliante leh omkhawmte tengteng ma a Kihoupihna puanin kongkhak ah a va ding uhi.

³“Gamdai ah ka pu uh a si a, TOUPA kalh a kikhawm, Korah pawl ah a telkei. Himahleh amah khelh ziak in a si a, tapa a neikei hi.

⁴Tapa a neih louh ziak lel in bangdia ka pa uh min a suante apan mang ding ahia? Ka pa unaute lak ah tantuan honpia un,” a chi uh.

⁵Mosi in a thu uh TOUPA ma ah a tun hi.

⁶TOUPA’N Mosi a houpih a,

⁷Jelophehad tanute’n a hihdik uhi. A pa uh unaute lak ah tantuan na bawlsak ding ahi. A pa uh tantuan na piak ding ahi.

⁸Israel suante kiang ah mi tapa neilou a a sih leh a gou a tanute na piak ding uh ahi.

⁹Tanu a neihkei leh a gou a unaute na piak ding uh ahi.

¹⁰Unaute a neihkei leh a gou a pa unaute na piak ding uh ahi.

¹¹A pa’n unaute a neihkei leh a gou a tanau na pe ding ua, aman a luah ding hi. TOUPA’N Mosi thu a piak bang in Israel suante ading in danthupiak kip ahi ding, chi in gen in, a chi hi.

¹²TOUPA’N Mosi kiang ah, “Abarim tang ah hohtou inla, Israel suante ka piak ding gam va en in.

¹³Na muh khit chiang in na unaupa Aron a chipihte kiang a pi ahihmah bang in nang leng pi na hita ding hi!

¹⁴Jin gamdai a kikhawmte a phunlai ua a mitmuh ua tui a kei hon pahtawi dia k’on thupiak kalh a na hel ziak in” a chi hi. Huaite Jin gamdai a Kadesh a Meribah tuite ahi.

¹⁵Mosi in TOUPA a houpih a:

¹⁶“Khawmpite tung a om ding mi khat, sa tengteng khate Pathian, TOUPA’N sep hen.

¹⁷TOUPA mi khawmpite chingtu neilou belam bang a a omlouhna ding un, a ma uh kai ding, amaute pikhia a, pilut ding in” a chi hi.

¹⁸TOUPA’N Mosi kiang ah, “Kha omnapa Nun tapa Joshua pi inla, a tung ah na khut nga in.

¹⁹Siampu Eleazar leh khawmpite ma ah dingsak inla, a mitmuh un amah na guan in.

²⁰Israel suante omkhawm tengteng in a thu a man theihna ding un na zahtakhuaina a tung ah nga in.

²¹Huchi in amah siampu Eleazar ma ah ading dia, aman TOUPA ma ah Urim thu a laksak dia; a thu in a pawt ding ua, a thu in a lut ding ua, amah leh Israel suan tengteng, omkhawmte toh” a chi hi.

²²Mosi in TOUPA thupiak bang in a hih a; Joshua a pi a, Eleazar leh omkhawmte ma ah a dingsak hi.

²³Huchi in a tung ah a khut a nga a, Mosi zang a TOUPA’N a gen bang in na a guanta hi.